Read Sangir PẸ̌TATIẠ 33 Bible Online

PẸ̌TATIẠ 33 - Sangir bible

PẸ̌TATIẠ 33

¹Samurin tau Israel naněntangu Misirẹ̌, su ral᷊ungu ghapaěngu tuhụ bansa sěmbaụ-sěmbaụ su al᷊ungu ahạ i Musa rẹ̌duang Harun, i sire notong su tampạ piram baụ.

²MAWU e něngoro si Musa apěmẹ̌mohẹ areng bọu apan tampạ kụ niotongang i sire.

³Tau Israel naněntangu Misirẹ̌ su tanggalẹ̌ kapul᷊o l᷊imane su wul᷊ang humotong, sěhěllo nal᷊iung Paskah humotong. Su al᷊ungu pěngangěllungu MAWU i sire naněntangu soang Rameses, nisahidiangu tau Misirẹ̌,

⁴kạpěnẹ̌nampạ e manga rariọ laiakang i sire kụ seng nipakapaten MAWU. Kụ ual᷊ingu pẹ̌kakoạ kerene tangú, MAWU nělahẹ u i Sie limembong katoghase wọu manga ruatan tau Misirẹ̌.

⁵Samurin tau Israel naněntangu Rameses, i sire nẹ̌buạ kapia kụ nẹ̌daseng su Sukot.

⁶Mase i sire nẹ̌buạ kapia kụ nẹ̌daseng su Etam, su wiwihu kěhu l᷊inggi.

⁷Bọu ene i sire nẹ̌sul᷊e sarang Pi-Hahirot, su sěmběkan daki wọu Baal-Zefon, bọu e nẹ̌daseng su rẹ̌duhu Migdol.

⁸Bọu ene i sire naněntangu Pi-Hahirot, limiu laudẹ̌ dingangu simuẹ̌ su kěhu l᷊inggin Etam; nal᷊iung těllu ěllo rimal᷊eng, i sire nẹ̌daseng su Mara.

⁹Bọu ene i sire měngkatewe naněpasẹ̌ kụ nẹ̌daseng su Elim; sene piạ matang akẹ mapul᷊o dua su waụ e ringangu kalung korma pitum pul᷊o su puěnge.

¹⁰Bọu ene i sire naněntangu Elim kụ nẹ̌daseng su rěduhu Wěngạ u Suez.

¹¹Tuhụ e i sire nẹ̌daseng su Kěhu L᷊inggin Sin, kụ maraning Dofka, bọu ene su Alus, dingangu wọu ene su Rafidim, kaiso sene tawẹ apa akẹ inumang.

¹⁵Bọu Rafidim i sire natěpasu Wul᷊udu Hor kụ nědaseng su tampạ pira-pira ini: kěhu l᷊inggin Sinai, Kibrot-Taawa, ”Kubul᷊u Karal᷊ehẹ”, Hazerot, Ritma, Rimon-Peres, Libna, Risa, Kehelata, Bul᷊udu Syafer, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ezion-Geber, Kěhu L᷊inggi Zin, dingangu Wul᷊udu Hor, su pẹ̌saraěngu ěntanang Edom.

³⁸ Ual᷊ingu titaʼm MAWU, Imang kụ i Harun naawị sarang Bul᷊udu Hor. Sene i sie nate su tanggalẹ̌ humotong bul᷊ang kal᷊imane su taung kaěpạ u pul᷊one samuring umatu Israel naněntangu Misirẹ̌. Su tempong kapapatene i Harun umbure 123 su taunge.

⁴⁰ Těntal᷊ang ene ratung banuang Arad, su ěntanan Negeb, Kanaan su sěmběkan Timuhẹ̌, nakahombang habarẹ̌ u umatu Israel kạpẹ̌tẹ̌timonane wanuane.

⁴¹Su raral᷊engang bọu Wul᷊udu Hor sarang bal᷊ang Moab, tau Israel nẹ̌daseng su tampạ pira-pira ini: su Zalmona, Funon, Obot, su wanua naombọ Abarim, su wanuang Moab, Dibon-Gad, Almon-Diblataim, Bul᷊udu Abarim maraning Bul᷊udu Nebo, ringangu su wal᷊ang Moab su wiwihu Sal᷊ụ u Yordan, maranin soang Yerikho, su wěllạu Bet-Yesimot dingangu su Wal᷊ang Sitim.

⁵⁰Su walang Moab ene, su wiwihu Sal᷊ụ u Yordan, masandigu soang Yerikho, MAWU e něngonggọ si Musa,

⁵¹kal᷊awọu parenta ini waugu tau Israel, ”Kereu i kamene lumiu Sal᷊ụ u Yordan mědeạu sumuẹ̌ su wanuang Kanaan,

⁵²i kamene harusẹ̌ měnokol᷊ẹ̌ kal᷊awọu tumanạ u wanua ene. Goghahěko kěbị pakal᷊uang i sire wọu watu ringangu manga wul᷊aeng dingangkewen apan tampạ u pẹ̌kakal᷊iomanengang i sire.

⁵³Ěntana ene harusẹ̌be pul᷊ahong kamene, batụu kawe Iạ něngonggọu ene si kamene.

⁵⁴ Bọu ene i kamene harusẹ̌ měmahiạ u ene makoạ pusakạ u manga ghal᷊ipohong kamene ual᷊ingu pẹ̌dal᷊ahurị. Baugu apang ghal᷊ipohone ghaghuwạ harusẹ̌be ghěllireng bahageange ghaghuwạ dingangu ghal᷊ipohone kadodọ bahageange kạdodọ.

⁵⁵Kaiso kamagengu tumanạ u wanua ene madiri tokol᷊ang i kamene, ute i sire apan těbe mạtanạ sene sarung mapakasigěsạ i kamene kere ene su matang kamene arau tune su laedʼi kamene. Kụ seng i sire e sarung měnekẹ si kamene.

⁵⁶Kereu i kamene tawe měnokol᷊i sire, Iạ e sarung mapakawinasang kamene kerẹewe seng Takụ nikaraki waugʼi sire.”