Read Sangir PẸ̌TATIẠ 36 Bible Online

PẸ̌TATIẠ 36 - Sangir bible

PẸ̌TATIẠ 36

¹Apan těmbonangu wal᷊e sěmbaụ su ral᷊ungu ghal᷊ipohong Gilead, anạ i Makhir, pulung i Manasye, anạ i Yusup, tamai nẹ̌těngon Musa ringangu manga pangahạ e wal᷊ine.

² Angkuěng i sire, ”MAWU něngoro si kamene apẹ̌mahiạ ěntana ene su tau Israel dingangu pělahurị. I sie lai něngoro si kamene pẹ̌gẹ̌gěllị ěntana pusakạu anạ u sěmbaụ i kami i Zelafehad su manga anạ e wawine.

³Kaiso hinon tahěndunge u kamageng i sire ene nẹ̌kawingu manga esẹ bọu ghal᷊ipoho wal᷊ine, ěntanan sire manawo su l᷊imang ghal᷊ipoho ene. Ual᷊ingu kerene tangú ěntana kụ tinantu kere wanuang kami sarung maghaing.

⁴Su Taungu Pěnanul᷊e, su tempong kal᷊awọu arětạ pusakạ kụ seng niwal᷊ụ maul᷊e kapia su taghuange kal᷊imona, ěntanang manga anạ i Zelafehad bawine ene sarung tatapẹ̌ makoạ tataghuanengu apang kawing i sire, hakịu ghal᷊ipohong kami e kailangengu ěntana ene.”

⁵Mase i Musa něhabaru ene su tau Israel parenta ini wọu MAWU, ”Apan niwerang kal᷊awọu taumata hěnton Yusup e mamben těngadẹ̌,

⁶dingangu ual᷊ingu ene MAWU něhengetang su manga anạ i Zelafehad bawine e botonge mẹ̌kawing balạewe měnsang dingang i sai ikapulun sire, asal᷊u ghal᷊ipohone mẹ̌sul᷊ung dingang i sire.

⁷Ěntana pusakạ u apan tau Israel sarung tatapẹ̌ kạl᷊aikị su ghal᷊ipohone.

⁸Manga wawine apang němusakạ ěntana su sěmbaụ bọu ghal᷊ipohon tau Israel, harusẹ̌be pẹ̌kawing dingangu hěnto ene lai. Ual᷊ingu kerene tangú apan tau Israelẹ̌ e sarung těbewe makapěnaghuang ěntana pusakạ u manga i upunge,

⁹hakịu ěntana pusakạ ene tawe mẹ̌pẹ̌pangal᷊ing bọu hěnto sěmbaụ sarang hěnto wal᷊ine. Apang hěnton tau Israel sarung managhuang ěntana pusakạ e hala.”

¹⁰Kụ natuhụewe ringangu su titaʼm MAWU si Musa, u anạ i Zelafehad bawine ene kụ kai Mahla, i Tirza, i Hogla, i Milka dingangi Noa nẹ̌kawing dingang i sire apam bědang anạ u sěmbaụ bọʼi amang i sire.

¹²I sire nẹ̌kawing dingangu taumata apam bọu manga hěnton Manasye, anạ i Yusup. Kụ kai kerene ěntana pusakạ i sire makoạ bageangu pal᷊ahanạ hěntong i amang i sire.

¹³Kai ene pělatorang dingangu manga tiahane kụ nionggọ u MAWU su tau Israel limiung Musa, piạ e nạung tau Israel ene su wal᷊ang Moab su wiwihu Sal᷊ụ u Yordan, masandigu soang Yerikho.