Read Sangir PẸ̌TATIẠ 4 Bible Online

PẸ̌TATIẠ 4 - Sangir bible

PẸ̌TATIẠ 4

¹MAWU e něngoro si Musa rẹ̌duang Harun

²pẹ̌kẹ̌koạ pěndarol᷊ẹ̌ u tau Lewi wọu gal᷊ipohong Kehat tuhụ balagʼu sěmbaụ-sěmbaụ,

³mase němohẹ arengu kěbị manga esẹ umbure těllum pul᷊o sarang limam pul᷊o su taunge, kụ makatohạ mẹ̌koạ munaran sire su Tentaʼm MAWU.

⁴Karadiahang i sire ute kai měndiagạ apal᷊iwụ kụ něngalembong kasusiange.

⁵MAWU e něngonggọu tiahane ini si Musa: Mạeng sen tempone měnggolang pẹ̌darasengang, i Harun dingangu manga anạe sumuẹ̌ su Tentaʼm MAWU, měngol᷊ohu ral᷊anse bọu těngon Petiʼm Pẹ̌dariandi, ringangu měnakạ Peti ene ringangu hekạ ene.

⁶Bọu ene, i sire harusẹ̌ měnakạ kapia ringangu pisị al᷊usẹ̌, bọu ene měmilạ u hekạ birụ sěmpědi su wowone, ringangu měnuhing kalu papasanengang u Peti ene.

⁷I sire harusẹ̌ měmilạ u hekạ birụ su wowon meda tampạ u borotẹ̌ sẹ̌sadiang baugu MAWU, dingangu su wowong meda ene, i sire harusẹ̌ měměllọu lainumang, baki tampạ u wuwụ, baki tampạ u sasěmba, ringangu ketelẹ̌ baugu sasěmba akẹ u anggorẹ̌. Borotẹ̌ sẹ̌sadiang harusẹ̌ ene su meda ene.

⁸I sire harusẹ̌ měnakạ u hekạ mahamụ sěmpědi su wowong kěbị ene, mase měmilạu pisị al᷊usẹ̌ sěmpědi su wowone, ringangu měmasẹ̌ u kalu papasanengangu meda ene.

⁹I sire harusẹ̌ měngal᷊ạ hekạ birụ sěmpědi ringangu měnakạ dal᷊aedu sol᷊o, bawurěsi sobun sol᷊o ringangu pěnanugheěnge, ringangu kal᷊awọu tampạ u lanang zaitun.

¹⁰Laedu sol᷊o ringangu kal᷊awọu apal᷊iwụ e harusẹ̌ pikunang i sire ringangu pisị al᷊usẹ̌ sěngkal᷊ěpa bọu ene ipěllọ su wowong tampạ u papasanengang.

¹¹Bọu ene i sire harusẹ̌ měmilạ u hekạ birụ sěmpědi su wowong pananěmbaěng bọu wul᷊aeng ene, ringangu měnakạ u pisị al᷊usẹ̌ sěngkal᷊ěpa, bọu e měmasẹ̌ u kalung papasanengang pananěmbaěng ene.

¹²Kal᷊awọu apal᷊iwụ kụ pẹ̌paketang su ral᷊ungu Huange Susi e harusẹ̌ al᷊akeng i sire mase pikunangu hekạ birụ sěmpědi. Bọu ene i sire harusẹ̌ měnakạ u pisị al᷊usẹ̌ sěmpědi kụ měměllọ ene su wowong papasanengang.

¹³I sire harusẹ̌ měmurěsi awul᷊ẹ̌ bọu pananěmbaěng ene, bọu e měmilạ u hekạ kamumụ sěmpědi su wowone.

¹⁴Dingangu su wowone ene harusẹ̌ ipěllọ i sire kal᷊awọu apal᷊iwụ pẹ̌paketang i sire su ral᷊ungu pẹ̌tatahamawuʼn sire su pananěmbaěng ene kere: tampạ u putung, porokẹ̌, sasoẹ, dingangu basi. Bọu ene i sire harusẹ̌ měnakạ kěbị ene ringangu pisị al᷊usẹ̌ sěngkal᷊ěpa ringangu měmasẹ̌ u kalung papasanengang.

¹⁵MAWU e něhengetang si Musa rẹ̌duang Harun, ”Su tempong i kamene měnggolang pẹ̌darasengang, i Harun dingangu manga anạ e harusẹ̌ mahunsuẹ̌ su ral᷊ungu Tenta-Ku ringangu měnakạ kěbị apal᷊iwụ dingangu sabarangkewe apang ene ěndaị sene. Bọu ene wuhụ e tau Kehat botonge makakarěnta měmikul᷊ẹ̌ ene. Kaiso i sire tawe wotonge měmanda, duměduhẹ̌ arau měnenggehẹ̌ apal᷊iwụ tamai ene, batụu kai seng nihae waugu Iạ. Kereu i sire mal᷊aing mẹ̌koạ ene tangú i sire sarung mate. Ual᷊ingu ene tadeạu tau Kehat ene kumbahang marědasẹ̌ bọu hěnton Lewi, i Harun dingangu manga anạ e harusẹ̌ měngoro sěngkatau-sěngkatau apěmunara sutal᷊oaran sire apa hinong bawaěng i sire. Seng ene hal᷊ẹ̌ i sire tau Kehat su tempong Tenta-Ku e al᷊ingang. I Eleazar, anạ i Harun, masasingkạ u patikụ Tenta-Ku, lanan sol᷊o, buwụ, sasěmba gandung baugu sasadia tatapẹ̌, lanang dal᷊anisẹ̌ dingangu kěbị apang ene su ral᷊ungu Tenta-Ku ene.”

²¹MAWU e něngoro si Musa,

²²mẹ̌koạ pěndarol᷊ẹ̌ su tau Lewi wọu hěntong Gerson tuhụ balagʼu sěmbaụ-sěmbaụ.

²³I Musa harusẹ̌ měmohẹ arengu kěbị manga esẹ kụ umbure těllum pul᷊o sarang limam pul᷊o su taunge kụ makaumal᷊ẹ̌ mẹ̌koạ munara su Tentaʼm MAWU.

²⁴I sire nioro apěhengkẹ apal᷊iwụ tamai ini:

²⁵Hekạ u seloʼn Tenta ene ringangu tatakạ e watuhụ ral᷊unge ringangu watuhu l᷊ikude wọu pisị al᷊usẹ̌, hekạ su tukadu Tenta,

²⁶manga senggọ dingangu manga tal᷊ine waugu rěllahẹ̌ sěnaung mělikụ Tenta ringangu pananěmbaěng, hekạ su pasěllangeng u rělahẹ̌, dingangu kal᷊awọu apal᷊iwụ kụ ipakẹ baugu pěnaketang kal᷊awọu sabarang ene. I sire masasingkạ u kěbị munara kụ piạ kal᷊ahěmpukange ringangu sabarang tamai ene.

²⁷I Musa rẹ̌duang Harun harusẹ̌ měnitị, tadeạu munara kụ nisarakang si Harun dingangu manga anạ e su taumatan Gerson ene koateng bue, dingangu patikụ sabarang kụ hinong hengketang ute harusẹ̌be hengkẹ.

²⁸Seng ene e hal᷊ẹ̌ u taumatang Gerson su ral᷊ungu Tenta; manga hal᷊ẹ̌ tamai ene harusẹ̌be koạ, su kawasang pěngangahạ Itamar, anạu Imang i Harun.

²⁹MAWU e něngoro si Musa pẹ̌děndol᷊ẹ̌ tau Lewi wọu gal᷊ipohong Merari tuhụ balagu sěmbaụ-sěmbaụ.

³⁰I Musa harusẹ̌ pěmohẹ arengu kěbị manga esẹ umbure těllum pul᷊o sarang limaʼm pul᷊o su taunge kụ makaumal᷊ẹ̌ munara su Tentaʼm MAWU.

³¹I sire nirolohẹ̌ baugu pělẹ̌hengkẹ manga kakoạ u Tenta ene, balake, sal᷊awakune, ringangu ěnsal᷊ị e.

³²Kerene lai manga rarihin dělahe nangělikụ Tenta ene ringangu wawětạ e, papasị e ringangu manga laikị e ringangu kal᷊awọu apal᷊iwụ hinong paketang baugu ipěndarisị. Apan taumata lẹ̌oroěng pẹ̌bẹ̌bawa apal᷊iwụ seng nitantu.

³³Kai ene hal᷊ẹ̌ u gal᷊ipohong Merari; patikụ munaran sire su Tentaʼm MAWU e harusẹ̌ koateng su kasingkạ u těmbonange i Itamar, anạu Imang i Harun.

³⁴Natuhụ kere su parentam MAWU, i Musa, i Harun dingangu manga těmbonangu umatẹ̌ nẹ̌koạ pěndarol᷊ẹ̌ bọu ghal᷊ipoho tatěllu su ral᷊ungu hěnton Lewi, kụ kai wọu ghal᷊ipohong Kehat, Gerson dingangi Merari. I sire nẹ̌koạ pěndarol᷊ẹ̌ ene wọu apam balagẹ̌. I sire němpěmohẹ arengu kěbị manga esẹ umbure těllum pul᷊o sarang limam pul᷊o su taunge kụ makaumal᷊ẹ̌ mẹ̌koạ munaran sire su Tentaʼm MAWU, kụ seng ini e tětal᷊e: [Ghal᷊ipoho] — [Kal᷊awọu taumata] Wọi Kehat — 2.750 Wọi Gerson — 2.630 Wọi Merari — 3.200 — Kěbị e: 8.580

⁴⁹Ual᷊ingu parentam MAWU e si Musa, apan taumata nirol᷊ẹ̌ dingangu nighěllirangu wawawaěnge sěngkatau-sěngkatau baugu apang kụ hinong tangkianenge arau apang kụ hinong pasanengange.