Read Sangir PẸ̌TATIẠ 5 Bible Online

PẸ̌TATIẠ 5 - Sangir bible

PẸ̌TATIẠ 5

¹MAWU e něhengetang si Musa,

²”Gěllịko tita ini su tau Israel: Patikụ taumata kụ piạ sakị e su pisị makạtatakụ dingangu piạ sakị e su wadang pělli, arau apạewen seng nanenggehẹ̌ maietẹ̌, harusẹ̌be apasěbang bọu pẹ̌darasengangu tau Israel.

³I sire harusẹ̌ irolohẹ̌ pakapul᷊ẹ, tadeạu tawe makal᷊amuhụ daseng, su piạ Iạ mạtanạ dingangu manga umatẹ̌-Ku sěngkapẹ̌tanạ.”

⁴Tau Israel mẹ̌kẹ̌koạ parenta ene ringangu měnẹ̌něbang u patikụ taumata kakakoạ e kerene e wọu pẹ̌darasengang.

⁵MAWU něngonggọ si Musa

⁶kal᷊awọu pělatorang e ini waugu tau Israel: Kereu pẹ̌sěngkatau e tawẹ satiane su MAWU kụ nẹ̌sal᷊a su taumata wal᷊ine, tangú

⁷tau ene harusẹ̌ měngakun dosane kụ měmaehẹ̌ tatubuse pakasue, tambaěng u 20% su taumata kụ nipakarugine.

⁸Arawe kamagengu taumata nipakarugine ene seng nate kụ tawẹ manga anạ u sěngkataune marěduhẹ̌ e, tangú tatubuse ene harusẹ̌ ionggọ su MAWU, kụ makoạ bageangu manga imang. Tatubusẹ̌ ene tawe nasowa domba esẹ baugu pěnanubusẹ̌ dosa baugu taumata kụ seng něsal᷊a ene.

⁹Bọu apạeweng isẹ̌sěmban tau Israel su MAWU, sasěmba těntani nakoạ bageangu manga imang kụ měnẹ̌narimạ u sasěmba ene.

¹⁰Apang kụ isẹ̌sěmbang pẹ̌sěngkatau su MAWU, makoạ bageangu taumata ene sẹ̌sane. Kětạembeng apang kụ nisarakange su sěngkatau imang, nakoạ bageangu imang ene.

¹¹MAWU e něngoro si Musa

¹²pěngẹ̌nggọu kal᷊awọu tiahane ini su tau Israel. Botonge mariadi sěngkatau esẹ mẹ̌tanudẹ̌ kawinge. I sie měngẹ̌ngěnsilu kawinge ene tawẹ satiane si sie ringangu seng nělamuhụ u watangenge watụ u kai seng nẹ̌sěngkapẹ̌tikị dingangu esẹ bal᷊ine. Kaiso esẹ ene tawẹ apa kasahekange, batụu hal᷊ẹ̌ ene kinoạ u kawinge su kapapěnisẹ̌, tawẹ sahidine, ringangu i sie tawe kinatangkạ. Arau wotonge mariadi sěngkatau esẹ mẹ̌tanudẹ̌ kawinge sěmbal᷊iau kawinge ene tawe nẹ̌sal᷊a.

¹⁵Su ral᷊ungu hal᷊ẹ̌ darua ene esẹ e harusẹ̌ mẹ̌bawa kawinge sarang anung imang. I sie lai harusẹ̌ mẹ̌bawa sasěmba kụ gẹ̌gausang, kụ ene ute kai tapoěngu gandung sěngkilo. Tapoěng ene tawe wotonge sěbohangu lanan zaitun arau ěmboěngu wuwụ, batụu kai nakoạ kere sasěmba tẹ̌tanudang dingangu tẹ̌timonaěng baugu tatialaʼm piạ tanudu tau esẹ su kawinge.

¹⁶Imang harusẹ̌ měngoro wawine ěndaị sol᷊ong těngoʼm pananěmbaěng dingangu rumarisị tumatěngo MAWU.

¹⁷Bọu e imang harusẹ̌ měngal᷊ạ mangko ěntana sěmbaụ dingangu měněbohu akẹ susi kadodọ su ral᷊unge. Bọu ene i sie harusẹ̌ měngal᷊ạ awul᷊ẹ̌ kadodọ bọu lanten Tentaʼm MAWU kụ iwunsal᷊ẹ̌ su ral᷊ungu akẹ ene.

¹⁸Bọu ene i sie harusẹ̌ měmuahẹ̌ utạ u wawine ene, ringangu mětahon tapoěng sasěmba kinatanudang su l᷊imane, arawe imang sěsane mạngumbelẹ akẹ mapaị kụ makakaděntang ane.

¹⁹Bọu ene imang e harusẹ̌ mẹ̌berang salu ringangu mẹ̌dorong bawine ene tadeạu měberang katěngadẹ̌. Imang e tangú harusẹ̌ mẹ̌bera, ”Kereu i kau tawe mawuang, i kau tawe kahinoěngu ane kụ niaparěntang akẹ ini.

²⁰Kaiso kamagengu i kau e seng nawuang,

²¹mal᷊owọko MAWU e mapakariading arengu makoạ sasalu ane su tal᷊oaram bansanu. Karimạko i Sie mapakariading pěnadu kumoho ringangu tiangu sumolọ.

²²Akẹ kụ makạkaděntang ane ini e sarung masuẹ̌ su ral᷊ungu tiangu ringangu mapakasolọ i sie ringangu mapakakohong pěnadu.” Bawine ěndaị e harusẹ̌ sumimbang, ”Iạ e mal᷊uasẹ̌; mal᷊owọko MAWU e mẹ̌koạ kerene.”

²³Bọu e imang harusẹ̌ měmohẹ u ane ěndaị e su karětasẹ̌ dẹ̌dul᷊ungang dingangu měngěmụ ene ringangu akẹ mapaị ěndaị e.

²⁴Imange e měngoro wawine ene pěnginung akẹ mapaị kụ makakarěntang ane. Kereu inungang, akẹ ene makakasakị.

²⁵Imang harusẹ̌ měngal᷊ạ sasěmba tapoěng ene, ringangu mapatodẹ u ene su těngom MAWU, bọu ene mẹ̌bawa ene sol᷊ong pananěmbaěng.

²⁶Mase i sie harusẹ̌ měngal᷊ạ tapoěng sěhěngkung kere tatiala u kal᷊awọu tapoěng ene seng nisěmba, mase nẹ̌tongkạ ene su wowong pananěmbaěng. Pěngěnsueěnge akẹ ene pinakiinung su wawine ěndaị e.

²⁷Manga andene tau wawine ěndaị e seng nawuang, akẹ ene nakakoạ sarang i sie nakapěndang masakị-sakị, tiange simolọ dingangu wěngkile kimoho. Arenge sarung makoạ salung ane sutal᷊oarang bansane.

²⁸Kaiso manga andene i sie tawẹ sal᷊ane, i sie tawe kinahinoěngu ane ringangu wědang makapěhanạ.

²⁹Kerene atorange kereu sěngkatau kawing esẹ matanudẹ̌ maěnsilẹ̌ u kawinge seng nẹ̌koạ pẹ̌sasal᷊a ringangu seng nělamuhụ u watangenge. Esẹ ene harusẹ̌ pẹ̌těngong kawinge su MAWU ringangu imang harusẹ̌ měndal᷊engu atorange si sie.

³¹Esẹ ene mal᷊iwirẹ̌ bọu pẹ̌sasal᷊ane, arawe kawinge, nal᷊ahẹu kereu kawe nẹ̌sal᷊a tangú harusẹ̌ měnanggung aị e.