Read Sangir PẸ̌TATIẠ 6 Bible Online

PẸ̌TATIẠ 6 - Sangir bible

PẸ̌TATIẠ 6

¹MAWU e něngoro si Musa

²pěgěllịu manga atorange ini su tau Israel. Apang esẹ arau wawine kụ piạ diandine mẹ̌biahẹ̌ samatang baugu MAWU kụ kere sěngkatau pangahạ e,

³ tawe wotonge měnginung akẹ u anggorẹ̌ dingangu inumang makakětị. I sie tawe wotonge měnginung inumang makakětị balạewe měnsang sude kụ nikoạ bọu wuang anggorẹ̌ arau wuang kalu wal᷊ine. I sie tawe wotonge kumaěng buang anggorẹ̌ buhu arau mahěgu, arau walạewe měnsang apa kụ bọu kalung anggorẹ̌; batune arau towọ e mal᷊aing tawe wotonge kanengange.

⁵Karěngụewen tempong diandine i sie tawe wotonge měmotọ utạ e arau makikul᷊ụ. Karěngụewen tempo ene utạ e arau wianggụ e harusẹ̌ bala patuwo pakanandụ. I sie kai mal᷊aikị u riandine sarang tempong pělahaěng batangenge waugu MAWU e seng masue.

⁶Utạ e ene makoạ tatialaʼn sie nitani waugu Ruata. Karěngụ u riandine tẹ̌tuhukange i sie tawe wotonge měl᷊amuhụ; i sie tawe wotonge humaung kasuang, maningbe lai maietʼi amange, i ninange arau tuarine arau tuhange.

⁸Karěngụu i sie kai sěngkatau pangahạ e, i sie ute kai taumata nitani waugu MAWU.

⁹Kereu utạ u sěngkatau pangahạ e kụ seng nitani kụ kawe nal᷊amuhụ ual᷊ingu i sie kawe su rěduhu taumata nate sěngkělěndịe tangú i sie harusẹ̌ měngampal᷊ẹ̌ pitu ěllo karěngụe; bọu ene i sie harusẹ̌ měngul᷊ụ utạ e ringangu wianggụ e buhụewe i sie mawurẹ̌si.

¹⁰Su ěllo kaual᷊une i sie harusẹ̌ mẹ̌bawa manụ paluma ruaʼm baụ arau manụ kuhono su imang su tukadu Tentaʼm MAWU.

¹¹Manụ ene sěmbaụ e harusẹ̌ isěmbang imang baugu sasěmbang ampungu rosa, dingangu sěmbaụ lai wal᷊ine e waugu sasěmba tẹ̌tutungang ipěngilang kal᷊awọu lamuhụ e. Su ěllo ene lai i sie harusẹ̌ měhae kapia utạ e su MAWU,

¹²dingangu měnal᷊imbuhung pěnanarakangu watangenge nakoạ sěngkatau měnanahimata. Tempo nal᷊iu e sen tawe lai irekeng batụu i sie kawe seng nal᷊amuhụ. Nakoạ kere sasěmba piněngaweng dugi tangú i sie harusẹ̌ maněmbang anạ u domba sěmbaụ umbure sěntaung.

¹³ Kereu tempon diandine sěngkatau měnanahimata e seng nasue, harusẹ̌be ikoạ tundu ini. Tau ene harusẹ̌be iěntudẹ̌ sarang tukadu Tentaʼm MAWU

¹⁴kụ iwawa sarang anung MAWU, binatang tawẹ turạ e kal᷊awọe těllum baụ: sěmbaụ anạ u domba esẹ umbure sěntaung baugu sasěmba tẹ̌tutungang, anạ u domba wawine sěmbaụ umbure sěntaung baugu sasěmbang kal᷊aampungu rosa, ringangu anạ u domba esẹ sěmbaụ baugu sasěmbang pẹ̌darame.

¹⁵I sie harusẹ̌ lai maněmbang borotẹ̌ tawe nilẹ̌haesang sěmpatanga, borotẹ̌ maral᷊imbolong nikoạ bọu tapoěng nilaukang u lanan zaitun, dingangu kukisẹ̌ manipị kụ niwuhaěngu lanan zaitun. Sul᷊iung ene i sie harusẹ̌ lai maněmbang sasěmba sẹ̌sadiaěng dingangu sasěmba lẹ̌inungang.

¹⁶Imange harusẹ̌ mẹ̌bawa kěbị ene su těngom MAWU, bọu e maněmbang sasěmbang kal᷊aampungu rosa ringangu sasěmba tẹ̌tutungang.

¹⁷Sěngkaral᷊eng dingangu borotẹ̌ sěmpatanga ene, ute i sie harusẹ̌ maněmbang domba esẹ ene su MAWU kere sasěmbang pẹ̌darame. Kerene lai sasěmba sẹ̌sadiang dingangu sasěmba lẹ̌inungang ene e harusẹ̌ isěmba su MAWU.

¹⁸Tau měnanahimata ene harusẹ̌ měngul᷊ụ utạ e su tukadu Tentaʼm MAWU ringangu mẹ̌tahong kěbị ene su ral᷊ungu putung tampạ u sasěmbang pẹ̌darame ene tẹ̌tutungang.

¹⁹Bọu ene, kereu palang u domba esẹ su těngone ene seng nisasạ, ute imange harusẹ̌ měngal᷊ạ kụ měměllọ sěngkapellọ dingangu borotẹ̌ marimbolong sěmbaụ dingangu kukisẹ̌ manipị sěmbaụ bọu patanga ene, su al᷊ungu l᷊imang pangahạ e ene.

²⁰Bọu ene imang kai harusẹ̌ manodẹ u kaěng ene kai ghaghěllị tani su MAWU; ene ute kai wahageang susi kụ nakoạ bageangu imang, sul᷊iung sěbạ dingangu palang u domba esẹ kụ tumuhụ atorange makoạ bageangu imang. Buhụ e wọu ene tau měnanahimata ene wotonge měnginung akẹ u anggorẹ̌.

²¹Seng ini tiahane waugu taumata měnanahimata; kai kereu sěngkatau měnanahimata nẹ̌diandin sasěmba kụ limembo wọu kal᷊awọu tiahaʼn diandine, i sie harusẹ̌ mapakasukụ pakapia apang kinědone ene.

²²MAWU něngoro si Musa

²³pělẹ̌habarẹ̌ si Harun dingangu manga anạ e u i sire harusẹ̌ mẹ̌berang manga wawera ini su tempong i sire měngal᷊amatẹ̌ tau Israelẹ̌:

²⁴Karimạko MAWU e měngal᷊amatẹ̌ dingangu měhiking si kamene.

²⁵Karimạko MAWU e mapiawue naunge ringangu mal᷊ondo si kamene.

²⁶Karimạko MAWU e kuměndagʼi kamene ringangu měngonggọu pẹ̌darame.

²⁷Dingangu MAWU e něhengetang, ”Kereu i sire mẹ̌sěbạ u areng-Ku kere al᷊amatẹ̌ baugu tau Israel, Iạ e sarung měngal᷊amatẹ̌ si sire.”