Read Sangir PẸ̌TATIẠ 7 Bible Online

PẸ̌TATIẠ 7 - Sangir bible

PẸ̌TATIẠ 7

¹Su tempong i Musa e nasueng koạ e Tentaʼm MAWU, tangú Tenta ene ringangu kal᷊awọeweng apal᷊iwụ e nilanise ringangu němuhang kěbị dingangu lanang dal᷊anisẹ̌. Kerene lai kinoạ e su pananěmbaěng dingangu kal᷊awọu apal᷊iwụ e.

²Bọu ene kal᷊awọu apang pangahạ u Israel, kụ kawe apang tuměllangu komol᷊angu masasingkạ u pěndarol᷊ẹ̌ e,

³němpěngonggọu sasěmba su MAWU e, roda ěnnungu waụ dingangu sapi mapul᷊o dua su waụ e, apang pangahạ e tahạ duang katau e měngonggọu tatongka roda sěmbaụ dingangu sěngkatau-sěngkatau e sapi sěmbaụ. Bọuteng i sire naněmba e,

⁴MAWU e něhengetang si Musa,

⁵”Tarimạ e kal᷊awọu gaghěllị ene baugu ipěhengkẹ Tenta-Ku; sarakangke kěbị tamai ene su tau Lewi tuhụewe kere su hal᷊ẹ̌ i sire.”

⁶Bọu ene kal᷊awọu roda ringangu kal᷊awọu sapi e nisarakang i Musa su tau Lewi.

⁷Roda rarua ringangu sapi ěpạ u waụ nionggọ e su taumatang Gerson,

⁸roda ěpạ u waụ dingangu sapi ual᷊uʼm baụ nionggọ su tau Merari sěndal᷊engkeweng hal᷊ẹ̌ kẹ̌koateng i sire iwẹ̌bihing i Itamar, anạu Imang i Harun.

⁹Arawe tau Kehat ute tawe rumaẹ doda arau sapi wọi Musa, u apal᷊iwụ susi kụ sukasingkạ i sire, harusẹ̌be pasanengang i sire su wowom pusigẹ̌.

¹⁰Apang měmamihinge němpẹ̌bawa sasěmba waugu měmantugẹ̌ kakakoạ u pěngangal᷊amatẹ̌ pananěmbaěng. Piạ i sire nạung seng sadia mẹ̌bawa gaghěllị i sire su těngong pananěmbaěng,

¹¹MAWU e něhengetang si Musa, ”Paul᷊ịko si sire u apang kal᷊aěllo karěngụeweng mapul᷊o dua su ěllone sěngkatau wọu tal᷊oarang manga těmbonange ene harusẹ̌ manarakangu sasěmbane waugu tundung pěndal᷊anisẹ̌ pananěmbaěng.”

¹²Sěngkatau-sěngkatau e nasịbawa sasěmbane tuhụewe wihinge ini: [Ěllo] — [Hěntoʼn] — [Pangahạ e] Humotong — Yehuda — Nahason anạ i Aminadab Karuane — Isakar — Netaneel anạ i Zuar Katěllune — Zebulon — Eliab anạ i Helon Kaěpạ e — Ruben — Elizur anạ i Syedeur Kal᷊imane — Simeon — Selumiel anạ i Zurisyadai Kaěnnunge — Gad — Elyasap anạ i Rehuel Kapitune — Efraim — Elisama anạ i Amihud Kaual᷊une — Manasye — Gamaliel anạ i Pedazur Kasione — Benyamin — Abidan anạ i Gideoni Kapul᷊one — Dan — Ahiezer anạ i Amisyadai Kapul᷊oěsane — Asyer — Pagiel anạ i Okhran Kapul᷊o duane — Naftali — Ahira anạ i Enan. Sasěmban sire sěngkatau-sěngkatau e mẹ̌sul᷊ung: mangko sal᷊aka sěmbaụ běhạ e sěngkilo sětenga ringangu loyang sal᷊aka sěmbaụ běhạ e ual᷊u hasụ su harange, tuhụ timbangeng pẹ̌paketang su Tentang MAWU. Tampạ darua ene lẹ̌lohoěngu tapoěng pakapenẹ u lẹ̌laukang u lana waugu sasěmba sẹ̌sadiaěng. Sul᷊iung ene ute mangko wul᷊ae(...)

⁸⁴Sasěmba kụ niwawang těmbonang i sire mapul᷊o dua baugu pěngangal᷊amatẹ̌ pananěmbaěng ene e kěbị e tangú kal᷊awọe: — mangko sal᷊aka mapul᷊o dua su waụ e ringangu loyang sal᷊aka mapul᷊o dua su waụ e kụ behạ e kěbị 27,6 su kilone — mangko wul᷊aeng mapul᷊o dua su waụ e běhạ e kěbị 1,32 su kilone napenẹ u lohone wuwụ — sapi esẹ mapul᷊o dua su waụ e, domba esẹ mapul᷊o dua su waụ e, dingangu anạ u domba umure pẹ̌sěntaung mapul᷊o dua su waụ e, sěngkasěmba ringangu sasěmba sẹ̌sadiang kere ipěnẹ̌nimu sasěmba tẹ̌tutungang — kambing mapul᷊o dua su waụ e waugu sasěmba kal᷊aampungu rosa, — sapi esẹ duaʼm pul᷊o ěpạ su waụ e, domba esẹ ěnnungu pul᷊o su waụ e, kambing ěnnungu pul᷊o su waụ e, dingangu anạ u domba umure pẹ̌sěntaung kal᷊awọe ěnnungu pul᷊o su waụ e waugu sasěmba pẹ̌darame.

⁸⁹Balạewe apan sasuẹ̌ i Musa sarang dal᷊ungu Tentaʼm MAWU mědeạu mẹ̌bisara ringangu MAWU, i sie rudaringihẹ̌ tingihu MAWU kụ mělẹ̌hengetang si sie bọu wowon tatakạ Petiʼm Pẹ̌dariandi su wěllạu tul᷊adang kerub[1] darua e.