Read Sangir PẸ̌TATIẠ 8 Bible Online

PẸ̌TATIẠ 8 - Sangir bible

PẸ̌TATIẠ 8

¹ MAWU e něhengetang si Musa,

²”Paul᷊ịko si Harun su tempong i sie měnakẹ sol᷊o pitu su laedu sol᷊o ene, i sie harusẹ̌ měndikọ ene sěngapaʼm botonge sarang makatualagẹ̌ těngon laedu sol᷊o ene.”

³I Harun mẹ̌kẹ̌koạewe apan nioroʼm MAWU. I sie mẹ̌děndikọ u kal᷊awọu sol᷊o ene tụtatěngo laedu sol᷊o ene batuhu těngone.

⁴Tampạ u sol᷊o ene sarang dasị bowone kụ kal᷊awọu bungang dal᷊ěgahe nikoạ bọu wul᷊aeng nịsěsal᷊ẹ̌, timuhụewe umbaghane nipasiloʼm MAWU e si Musa.

⁵MAWU e něhengetang si Musa,

⁶”Haeko taumatan Lewi e wọu taumatan Israelẹ̌ e wal᷊ine, ringangu pẹ̌koạko pěndal᷊anisu pěnanusi si sire,

⁷kụ ual᷊ingu kakakoạ e kere ini: tědokengkong akẹ i sire baugu tundung pananusi kụ pěngoroko si sire pěngul᷊ụko kasěllahu wadang i sire ringangu pangunsạ pakeang i sire. Ual᷊ingu kerene tangú i sire mawurěsi.

⁸Bọu e ute pěngoroko si sire pěngal᷊ạ sapi esẹ mangudạ sěmbaụ dingangu sasěmba sẹ̌sadiang bọu tapoěng nilaukangu lana. Bọu ene i kau harusẹ̌ pěngal᷊ạ sapi esẹ lai wal᷊ine sěmbaụ gunang sasěmbang ampungu rosa.

⁹Mase tampungko kal᷊awọu umatu Israel kụ dolohẹ̌ko tau Lewi apararisị su těngong Tenta-Ku.

¹⁰Umatẹ̌ harusẹ̌ měměllọu l᷊iman sire su wowon těmbọu tau Lewi,

¹¹bọu ene i Harun harusẹ̌ maněmbaʼn tau Lewi ene kere sasěmba nihae wọu tau Israel si Siạ, tadeạu i sire makapẹ̌koạbe pẹ̌kakal᷊iomaneng baugu Iạ.

¹²Bọu e tau Lewi harusẹ̌ měměllọu l᷊iman sire su wowon těmbọu sapi esẹ darua ene; sěmbaụ harusẹ̌be pakisěmba waugu sasěmbang ampungu rosa, arawe sěmbaụewe lai ute waugu sasěmba tẹ̌tutungang. Ual᷊ingu tundu ene tangú tau Lewi e nipakasusi.

¹³Haeko tau Lewi e waugu Iạ dingangu rolohẹ̌ko i sire pẹ̌tangkiang si Harun dingangu manga anạ e.

¹⁴Dingangu tundu ene tangu i kamene napẹ̌dal᷊ahaen tau Lewi e wọu taumatang Israelẹ̌ bal᷊ine e, tadeạu makoạ tataghuaneng-Ku.

¹⁵Samuring i kau mẹ̌koạ komol᷊ang pěnanarakangu tau Lewi ene, i sire piạ bahageange měhal᷊ẹ̌ su ral᷊ungu Tenta-Ku.

¹⁶Iạ seng něhengkẹ i sire ipěngaweng kal᷊awọu manga rariọ esẹ u tau Israel kaiakanenge; kụ i sire ute kai nitani waugu Iạ.

¹⁷ Piạ e nạung Iạ němate patikụ manga anạ u tau Misirẹ̌ i akang, manga rariọ esẹ kaiakanenge wọu apang balagu tau Israel dingangu apạeweng binatang kụ piněhanạ humotong e seng Takụ nikoạ tataghuaneng-Ku tani.

¹⁸Kụ orasẹ̌ ini ute kere laaweng kal᷊awọu anạ u tau Israelẹ̌ i akang, Takụ nial᷊ạ tau Lewi,

¹⁹ringangu tau Lewi ene Takụ isarakang si Harun dingangu manga anạ e tadeạu makapěmunara waugu tau Israelẹ̌ su ral᷊ungu Tenta-Ku. Kerene lai tadeạu i sire mẹ̌gausẹ̌ kal᷊aampung bọu anu-Ku baugu tau Israel tadeạu wansa ene tawe kahombangengu silakạ kereu i sire ruměnta tumanịu maranin tampạ susi ene.”

²⁰Ual᷊ingu ene i Musa, i Harun dingangu kal᷊awọu umatʼu Israelẹ̌ e měnarakangu tau Lewi su MAWU, kerẹewe niparentan MAWU si Musa.

²¹Tau Lewi ene nẹ̌koạ komol᷊angu pěnanusi watangenge dingangu měngunsạ pakeang i sire, bọu e i Harun měnarakang i sire kere laonggọ těntani su MAWU. I sie nẹ̌koạ l᷊ai komol᷊angu pananusi si sire.

²²Tau Israel nẹ̌koạ kal᷊awọu apang niorong MAWU si Musa mạanun tau Lewi. Ual᷊ingu kerene tangu tau Lewi nakaěbạ bahageange waugu měmunara su ral᷊ungu Tentaʼm MAWU su al᷊ungu ahạ i Harun dingangu manga anạ e.

²³MAWU e něhengetang si Musa,

²⁴”Apan tau Lewi kụ umure su wowon duam pul᷊o l᷊ima su taunge harusẹ̌ mẹ̌koạ hal᷊ẹ̌ e su ral᷊ungu Tenta-Ku,

²⁵dingangu su tempong umure limamʼm pul᷊o su taunge i sie pakaperei wọu hal᷊ẹ̌ e.

²⁶Bọu ene i sie wotonge montol᷊ẹ̌ tau Lewi wal᷊inẹ apang měmẹ̌munara su ral᷊ungu Tenta-Ku, kaiso i sie tawẹ hal᷊ẹ̌ e tatapẹ̌. Kerene kakakoạ e měngatorẹ̌ hal᷊ẹ̌ u tau Lewi.”