Read Sangir PẸ̌TATIẠ 9 Bible Online

PẸ̌TATIẠ 9 - Sangir bible

PẸ̌TATIẠ 9

¹ Su wul᷊ang humotong su taung karuane samurin tau Israel naněntangu Misirẹ̌, MAWU e něhengetang si Musa su wanua l᷊inggin Sinai. Angkuěng u MAWU,

²”Su tanggalẹ̌ mapul᷊o ěpạ bul᷊ang ini, nanětạ e matangěllo sumědạ, tau Israel harusẹ̌ měmantugẹ̌ Paskah tụtuhụewe atorange kụ seng nipato.”

⁴Tangú i Musa něngoro tau Israel piněmantugẹ̌ Paskah.

⁵I sire němpěmantugẹ̌ Paskah ene su wanua l᷊inggiʼn Sinai wawěllo su tanggalẹ̌ mapul᷊o ěpạ bul᷊ang humotong. Kěbị kinoạ i sire nẹ̌kětạewe kere seng niparentan MAWU e si Musa.

⁶Kaiso sutal᷊oaran sire piạ pirang katau kụ nal᷊amuhụ ual᷊ingu sen něnenggehẹ̌ maietẹ̌, hakịu nisěding kumbahang Paskah su ěllo ene. I sire ene tamai nẹ̌těngon Musa rẹ̌duang Harun,

⁷dingangu nẹ̌bera, ”I kami ini e mal᷊amuhụ ual᷊ingu něnenggehẹ̌ maietẹ̌. Kai kawe unụe i kami harusẹ̌ iliu sul᷊ikude hakịu tawe makapaněmbang sasěmba su MAWU ringangu anạ u sěmbaụ i kami?”

⁸I Musa simimbang, ”Pěngampal᷊ẹ̌ko kal᷊imona sarang iạ makatarimạ u laahạ bọu MAWU.”

⁹MAWU něngoro si Musa

¹⁰pẹ̌bera su tau Israel, ”Kereu sutal᷊oarang kamene arau hitenu piạ taumata mal᷊amuhụ ual᷊ingu seng něnenggehẹ̌ maietẹ̌ arau těntal᷊ang suraral᷊engang kụ marau, i sie mal᷊aing harusẹ̌ měmantugẹ̌ Paskah waugu MAWU.

¹¹Arawe pěmamantugẹ̌ ene e harusẹ̌ koạ sěmbul᷊ang tuhụ e, kụ matarang su hěbiʼn tanggalẹ̌ mapul᷊o ěpạ su wul᷊ang karuane. Bantugeko ěllo ene piạ kinạ e domba waugu Paskah darěling borotẹ̌ tawẹ kabọ e ringangu rukụ e mapaị.

¹² Kumbahang maněntangu apa-apa wọu kaěng ene sarang sěngkarịěllone mal᷊ukadẹ̌, dingangu kumbahang měmědi sarang sěmbaụ bọu ruhim binatang kụ nisěmba si Siạ. Sal᷊imbangeko Paskah ene tuhụewe kal᷊awọu atorange.

¹³Su sěmběkane taumata kụ tawe nal᷊amuhụ dingangu tawe lai suraral᷊engang, kaiso kawe tawe měmamantugẹ̌ Paskah e sen tawe irekeng lai sěngkatau wọu umatẹ̌-Ku, batụu i sie tawe naněmban sasěmba si Siạ, su tempo kụ tinantu. Tau ene tangú harusẹ̌ měnanggung aị u rosane.

¹⁴Kereu sutal᷊oarang kamene piạ sěngkatau raghị kụ mapulu měmantugẹ̌ Paskah, i sie harusẹ̌ měmantugu ene, ituhụewe su kěbị atorange ringangu katatainge. Tita ene mariadi su apan taumata, baẹ tau Israelẹ̌ arau lai taumatan daghị.”

¹⁵Su ěllon Tentaʼm MAWU nipararisị, narěntạ e winawa kụ něhěmbungke Tenta ene. Su tempong hěbi sarang mal᷊ukadẹ̌ binawa ene kinasilo kere putung.

¹⁷Balạewe winawa ene maawị, tau Israelẹ̌ měnggolang pẹ̌darasengang i sire kụ měmpěbuạ marau. Kụ su tempong binawa ene rumělusẹ̌, su tampạ ene i sire mẹ̌daseng kapia su Tenta.

¹⁸Ual᷊ingu laoron MAWU tau Israelẹ̌ e něnggolang pẹ̌darasengang i sire, kụ bọu ene kahiang parentang MAWU e lai i sire měmětị kapia. Karěngụeweng binawa e ene su wowoʼn Tentaʼm MAWU, i sire tatapẹ̌ mạtanạ su tampạ ene.

¹⁹Kereu winawa ene marěngụ su wowoʼn Tenta ene, i sire matuhụ su titaʼm MAWU ringangu tawe měngal᷊ing bọu tampạ ene.

²⁰Kaiso pẹ̌sěngkakuhuang kětạeng pẹ̌tahạ pira ěllo binawa ene, ene su wowon Tenta. Baewe kereapa, kai seng laorom MAWU e makasahẹ i sire natanạ su tampạ sěmbaụ arau měngal᷊ing.

²¹Pẹ̌sěngkakuhuang binawa ene kětạeng mạděpang bọu wawěllo sarang mal᷊ukadẹ̌, dingangu su tempong binawa ene nawị deng mal᷊ukadẹ̌, i sire apidu mahundal᷊eng. Baẹbe su tempo sude binawa ene mawị, baẹ ěllo arau hěbi, i sire mahundal᷊eng.

²²Karěngụu winawa ene, ene su wowon Tentaʼm MAWU, měnsang karěngụu rua ěllo, sěmbul᷊ang, sěntaung arau něngalembo, karěngụu ene lai i sire mạtanạ su tampạ ene. Kereu winawa ene mawị, buhụewe i sire měmpẹ̌buạ dumal᷊eng.

²³I sire matanạ su tampạ sěmbaụ dingangu mẹ̌buạ sol᷊ong tampạ bal᷊ine matuhụewe kere su parentam MAWU kụ nionggọ u MAWU limiun Musa.