Read Sangir MIKHA 3 Bible Online

MIKHA 3 - Sangir bible

MIKHA 3

¹Pẹ̌daringihẹ̌ko, ei kamene apang měngangawasa Israel! I kamene hinong masingkạ u apang kụ adilẹ̌,

²kai i kamene mal᷊ạbe mạběnsing u apang mapia e, ringangu mal᷊uasu apan dal᷊akisẹ̌ e. Bansaku e wěběnikang i kamene e wiahẹ̌, mase lunsiringko ghěsine wọu manga ruhine.

³I kamene mạhungkinạ bansaku. Pisine pěgẹ̌gaghehẹ i kamene mase ruhine pěpẹ̌pohang i kamene. I kamene mẹ̌děnduru si sire kere něndaruru ghěsing binatang kụ isowa su ral᷊ungu kuring.

⁴Sarung midatingu tempone i kamene mẹ̌kẹ̌kiạ u makitul᷊ung su MAWU, kaiso i Sie tawe mapulu sumimbang. I Sie sarung tawe rumaringihẹ̌ manga kakal᷊iomanengu ual᷊ingu i kamene seng nẹ̌koạ dal᷊akisẹ̌.

⁵Bansaku niakal᷊engu manga nabi kụ měnẹ̌něbal᷊u apang mapia su taumata kụ mạngonggọu roitẹ̌, katewe kawe rụdokạ dingangu tawe měndarekengu apan tawe mẹ̌gaghěllị. Baugu manga nabi kerene ute, MAWU e něhengetang,

⁶”Ei manga nabi, temponu e seng maraning mapaghohẹ̌; matangěllonu e seng kakạsědạ e. I kamene sen tawe lai sarung makahombang papasilo kụ mělahẹ u manga karaki-Ku. I kamene selain tawe makatěbal᷊u manga apa.”

⁷Taumata kụ měnẹ̌něbal᷊u ěllo ramahi e sarung makahombang mea ual᷊ingu pěnaněbal᷊e tawe nakahino. I sire kěbị e seng kinailangengu ghatin sire ual᷊ingu Mawu Ruata e sen tawe simimbahẹ̌ si sire.

⁸Arawe mạanung batangengku ini e, MAWU e seng napal᷊ohon rohkẹ̌ʼE si siạ dingangu kawasa-Ne. Iạ e nighěllirangʼE katatahuěnna su hal᷊ẹ̌ u kạadilẹ̌, dingangu l᷊ai kawawahani waugu pělahekang su tau Israel, kal᷊awọu rosa nạung seng nịkakoạe.

⁹Pẹ̌daringihẹ̌ko kal᷊awọu waweraku ini, e i kamene měngangawasa Israel kụ měbẹ̌binsị u kạadilẹ̌ dingangu měngẹ̌ngal᷊intuing katul᷊idẹ̌ e.

¹⁰I kamene němangung Yerusalem, soan Duata, ual᷊ingu kawe pěmamate ringangu tawẹ kạadile.

¹¹Měngangawasa soa e mẹ̌pẹ̌parenta waugu makareạ doitẹ̌ sasorokẹ̌, manga imang měmpaněntiro toratʼu MAWU e mědeạu makaěbạ tatendenge, ringangu manga nabi e mẹ̌dẹ̌dorong těntiro wọu Ruata waugu makaěbạ doitẹ̌ — mase i sire kěbị e mạngěnna u MAWU e kawe su sěmběkan sire. I sire nẹ̌bera, ”MAWU e ene sutal᷊oarang kitẹ, i kitẹ e tawe sarung kahombangengu silakạ masaria.”

¹² Ual᷊ingu karal᷊akisu ene, Sion sarung bungkalangeng kere pẹ̌sasuangeng. Yerusalem sarung makoạ niěndukangu apang korọ e, dingangu wongkong Bal᷊em MAWU e sarung makoạ kěhu mal᷊oang.