Read Sangir MIKHA 4 Bible Online

MIKHA 4 - Sangir bible

MIKHA 4

¹Su apạeweng ěllo ramahi kạděntane wongkone, tampạ u Wal᷊em MAWU, sarung dumarisị matei, měmal᷊iung karangẹ e wọu manga wul᷊ude ringangu manga wongkone. Kal᷊awọu manga wansa e měmpẹ̌gẹ̌gihingang tamai kerene

²i sire kěbị e sarung mẹ̌bera, ”Bọete i kitẹ sumaka sol᷊ong bongkong MAWU[2] sol᷊ong Bal᷊eng Duatang Israel! I Sie sarung měněntiro si kitẹ apa hinong koateng i kitẹ. I kitẹ sarung tumol᷊e ral᷊engʼE u ral᷊eng u MAWU e rarěntane kai wọu Yerusalem; bọu Sion i Sie mẹ̌bẹ̌bera su manga umatʼE.”

³ MAWU e sarung měmutusu pěrkara sutal᷊oarang manga wansa, sutal᷊oarang něgara matatoghasẹ̌, marau arau lai marani. I sire sarung měmpaněsal᷊ẹ̌ manga pedan sire koateng bajakẹ̌ dingangu manga wěngkon sire makoạ pisọ laambesẹ̌. Manga wansa e sen tawe měngkai mẹ̌sẹ̌sekẹ tawe lai měngkai mẹ̌dẹ̌dariahi mẹ̌sekẹ.

⁴ Apan taumata e sarung mẹ̌biahẹ̌ mal᷊enehẹ̌ dingangu masorogạ sutal᷊oarang baelu anggorẹ̌ e ringangu waelu arane; tawẹ u sarung měmpamatakụ si sie; kụ seng ene e rianding MAWU Limembong Kawasa.

⁵Apạewem bansa su wowon dunia e mạněmba ringangu matuhụ su mahang duatane hala. Arawe i kitẹ e sarung matuhụ su MAWU Ruatang kitẹ e ringangu maněmba si Sie waugu sarang marěngụ-děngụ.

⁶MAWU e něhengetang, ”Sarung marěnta tempone Iạ měnampungu apan taumata kụ Takụ ihukung, kụ kai i sire kụ apang němpẹ̌tatahangu sigěsạ su pinamembangeng.

⁷I sire seng nipělomene wọu maraune wọu kamponge pinamitingang puidẹ̌. Arawe wọu apan taumata kụ nal᷊ěmbe ene e Iạ sarung manětạ u pal᷊ahěnto wuhu e sěmbaụ. I sire sarung makoạ bansa kụ masaria ringangu matoghasẹ̌. Iạ e sarung mẹ̌parenta si sire su Wongkon Sion sarang marěngụ-děngụ.”

⁸Ringangu i kau e Yerusalem, tampạ u Ruata mělẹ̌lukadẹ̌ umatʼE kere lukadẹ̌ měmpẹ̌děndiagạ gapaěngu dombane, i kau e sarung mẹ̌sul᷊e makoạ niupunangu soang kararatuangu kere kal᷊imona.

⁹Unụ e i kau e sụsangị maihạ-ihạ? Unụ e i kau e mětẹ̌tatahang u sunsara kere wawine kụ měnaung měhěnding? Arau kawe ual᷊ingu i kau e tawẹ datunu, ringangu kal᷊awọu měgaghěllịu manga sasasa si kau e seng nasue nate?

¹⁰Ei tumanạ u Yerusalem, pẹ̌kuhěnạ e ringangu pěngědihe kere tau wawine kapẹ̌hěndinge! Batụu orasẹ̌ ini e i kamene harusẹ̌ maněntangu soa ringangu katanạ su wurase. I kamene hinong kakoạ sol᷊ong Babel, katewe paị sene MAWU e sarung měliwirʼi kamene wọu l᷊imang manga sědụu.

¹¹Mal᷊awọ bansa kụ seng němpẹ̌tampung baugu měngalo si kau, ei Yerusalem. I sire nẹ̌bera, ”Yerusalem hinong goghaheng! I kami e sarung makasilo soa ene makoạ ěnnạe!”

¹²Arawe manga wansa e wěga wue měnsang apa ipělẹ̌hingidu MAWU. I sire tawe nakapěndang u i sire seng nitampungʼE mědeạu ihukung, kere gandung nitampung mědeạu papipiang.

¹³MAWU e něhengetang, ”Ei tumanạu Yerusalem, dakọ e ringangu tatahidaiko manga sědụu e! Iạ e sarung mapakariading kamene matoghasẹ̌ kere sapi piạ sungene uase ringangu kanukune tambaga. I kamene sarung měnggagholang bansa l᷊awọ, dingangu kakakalạ kụ ikaěbạ i sire wọu pělahampasẹ̌ e sarung isěmbang kamene si Siạ, MAWUN sarul᷊uang u alang.”

¹⁴Ei tumanạ u Yerusalem, pẹ̌dorongke sěngapam botonge tadeạu MAWU e mẹ̌tul᷊ung i kau! I kitẹ e kai nital᷊iwungang! Sekẹ e kạpěngalone apan těmbonangu Israel!