Read Sangir MIKHA 6 Bible Online

MIKHA 6 - Sangir bible

MIKHA 6

¹Pẹ̌daringihẹ̌ko apan niěnsilu MAWU e su tau Israel. Pẹ̌bangungke, o MAWU, kụ pěhabarẹ̌kong kabaratangʼU e! Kụ manga wul᷊ude ringangu manga wongkone e pẹ̌daringihe apan ipěhengetangʼU.

²Ei manga wul᷊ude, ei manga wal᷊ane, daringihẹ̌ko kạbaratang u MAWU! I Sie piạ pěrkarane ringangu Israelẹ̌ umatʼE ringangu sarung měnuntụ si sire.

³MAWU e něhengetang, ”Ei umatẹ̌-Ku, apang kụ sen Takụ kinoạ baugʼi kamene? Su hal᷊ẹ̌ sude Iạ nakasigěsạ si kamene? Simbahẹ̌ko si Siạ!

⁴ I kamene sen Takụ niapasěbang bọu Misirẹ̌, dingangu Takụ nipěllọ bọu pẹ̌tatahamawuang; Iạ e seng něndolohʼi Musa, i Harun, dingangu i Miryam baugu pěngahạ si kamene.

⁵ Umatẹ̌-Ku, pẹ̌tahěndungko apan seng nipẹ̌karaking Balak datung Moab baugʼi kamene, dingangu apạeweng nisimbahʼi Bileam anạ i Beor si sie. Pẹ̌tahěndungko apan seng nariadi su raral᷊engang su wěllạu pẹ̌darasengang su Sitim dingangu Gilgal. Kereu i kamene makatahěndung kěbị ene, i kamene sarung makaěnna u apan sen Takụ kinoạ baugu mapakasal᷊amatʼi kamene.”

⁶Kai apạe hinong isěmbang kitẹ su MAWU, Ruata su sorga, kereu i kitẹ duměnta mědeạu mẹ̌kal᷊iomaneng si Sie? Unụe i kitẹ e harusẹ̌ mẹ̌bawa sapi kawuhuang sahị baugu isěmba kere sasěmba tẹ̌tongkatenge ho si Sie?

⁷Mal᷊uasẹ̌ ngae MAWU kereu i kitẹ e mẹ̌bawa domba ringangu hiwune arau mahěmpal᷊iung kal᷊awọe lanang zaitun? I kitẹ e hinong apěněmba si Sie, anạ kaiakaneng i kitẹ e kere tatubusẹ̌ kal᷊awọu manga rosang kitẹ?

⁸Tala, MAWU e seng nělahẹ si kitẹ apang kụ mapia. Tẹ̌tuntukangʼE wọʼi kitẹ e ute kai tadeạu i kitẹ e mẹ̌koạbe su kaadile sěntiniạ mapạdal᷊engu pẹ̌kakěndagẹ̌, kụ dingangu kasasanạu naung mẹ̌biahẹ̌ masěmbaụ dingangu Ruatang kitẹ e.

⁹Apạ e limembong kapelesane waugu matakụ u MAWU. I Sie kụkahiorọ su manga tumanạ u soa, ”Daringihẹ̌ko e i kamene kụ mẹ̌tẹ̌tampung su soa!

¹⁰Su wal᷊eng taumata raral᷊akisẹ̌ e kẹ̌kaěbakeng arětạ kụ něnggạu pěngangakal᷊ẹ̌ e. I sire mẹ̌kẹ̌koạ sasupane konti, sěmbaụ kakanoạ kụ Takụ ikẹ̌kawěnsing. Taumata kụ mẹ̌kẹ̌koạ e sarung Takụ ihukung.

¹¹Tawe masowa su akal᷊ẹ̌ kụ Iạ e mangampung taumata kụ mẹ̌kẹ̌koạ timbangeng tawe su katul᷊ide.

¹²Taumata kalạ su soanu e měmpěnẹ̌nẹ̌dạ tau kasiange, dingangu i kamene kěbị e tahakontiang.

¹³Kụ ini e Iạ manětạ e měměbahẹ̌ dingangu měnggagholọ i kamene ual᷊ingu kal᷊awọu rosang kamene.

¹⁴I kamene sarung mahungkaěng, kaiso tawe měngkal᷊aedẹ̌ — kụ sal᷊ạanune měngkai těbe lunusẹ̌. I kamene sarung měhengkẹ manga apal᷊iwụ, kaiso tawe makaambang. Walạewe apa sarung ěmpingang i kamene sarung Takụ gagholokang su ral᷊ungu pẹ̌seketang.

¹⁵I kamene měnawuhu gandung, kaiso sarung tawe měměnsạ buane. I kamene sarung mẹ̌koạ l᷊ana wọu wuan zaitun, kaiso tawe makapakẹ lanane. I kamene sarung měměhạ akẹ u anggorẹ̌, kaiso tawe měnginung bọu ene.

¹⁶ Patikụ ene nariadi e ual᷊ingu i kamene tụtol᷊e kal᷊awọu kakanoạ u Ratu i Omri ral᷊akisẹ̌ e, ringangu anạe Ratu i Ahab. I kamene mẹ̌tẹ̌těno kakakoạ i sire. Ual᷊ingu ene Iạ e sarung měnggolọ i kamene, kụ i kamene sarung tongkeaneng dingangu hinakaneng u kal᷊awọu wansa.”