Read Sangir NAHUM 1 Bible Online

NAHUM 1 - Sangir bible

NAHUM 1

¹ Seng ini e tatumbal᷊ung u Ruata e mạanung Niniwe. Tatumbal᷊ung ene nilahẹ su papasilo kụ nionggọ si Nahum, sěngkatau nabi kụ asal᷊e wọu Elkos.

²MAWU Ruata e mạdiri piạ u měngal᷊ung, taumata kụ dumokạ si Sie, nal᷊ahẹ u makahombang hukumang. Dingangu ral᷊angehẹ̌ marasai, i Sie měmal᷊isẹ̌ une si sire.

³Mamben těngadẹ̌ MAWU e, tawe lighạ mẹ̌pědu; kaiso i Sie lai limembong kawasa hakịu i saing mẹ̌koạ pẹ̌sasal᷊a tawe sarung ipakal᷊iwirʼE wọu hukumang. Su apang MAWU e rimal᷊eng, sene suměpụ suwu-suwu; su tampạ kaěnsakengu laedʼE, sene awul᷊ẹ̌ e mariadi winawa

⁴I Sie měmatakụ laudẹ̌ dingangu mapakamara, kal᷊awọu sal᷊ụ e ipakariadi-Ne akene mal᷊ẹ̌sa. Wul᷊udu Karmel dingangu manga wimbaenge su Basan mariadi mẹ̌kělisẹ̌, dingangu su Libanon malolangke kal᷊awọu manga bungang.

⁵Manga wul᷊ude měmpahunggěgilẹ̌ su těngo-Ne; ringangu wongkone matuno kěbị. Kereu MAWU e suměpụ, dunia e ghuměgilẹ̌, dunia ringangu kěbị tumanạ e mahunggěgilẹ̌.

⁶I sai makararagẹ̌ kamagengu MAWU e lumangehẹ̌? Tawẹ apa kụ mal᷊iwirẹ̌ bọu ral᷊angehʼE? I Sie mapakawěseng dal᷊angehʼE kụ dụděllị, batu e mạl᷊ahěmpung kụ makoạ awul᷊ẹ̌ su těngo-Ne.

⁷MAWU e mapia, i Sie mạněntanudẹ̌ umatʼE piạ i sire e masusa, i Sie mẹ̌děndiagạ taumata kụ mẹ̌sẹ̌sirung si Sie.

⁸Mẹ̌sul᷊ungu lěba masaria kụ dimal᷊eng, nipakawihua-Ne kal᷊awọu sědụʼE.[1] I sire apaʼm bahani rimokạ si Sie e nipahesʼE ringangu papate sarang nawihua.

⁹Waewe lai karaki apa sarung koatengu rumokạ MAWU, nal᷊ahẹ u sarung mẹ̌sombangu karal᷊uka. I Sie tawe měmal᷊isẹ̌ uneʼE[2] hakịu sarang duaʼn sul᷊e makoạ sarang anuʼm manga sědụʼE.[3]

¹⁰I kau e sarung tutungang kere rahami kụ mamara, kere gahundunge masumpinị kụ mẹ̌pẹ̌papanganang.[4]

¹¹Bọu anunu e, ei Niniwe, seng siměpụ sěngkatau kụ napenẹu karakine ral᷊akisẹ̌. I sie něhingidu karakine rumokạ MAWU.

¹²Tangú angkuěngu MAWU e su Israel, umatʼE, ”Manilaing tau Asyurẹ̌ ene matoghasẹ̌ dingangu mal᷊awọ dekenange, kaiso i sire e sarung ipakagholọ bọu e mapuạ. Ei wansa-Ku, Iạ e seng napakariading kamene e nasunsara, arawe Iạ e tawe lai mẹ̌koạ ene.

¹³Ini e sarung Takụ ěnsueěng kawasang Asyur waugʼi kamene, ringangu Takụ běsukang hante kụ měngikị si kamene.”

¹⁴Seng ini e putusangu MAWU e mạanun tau Asyur, ”I sire e tawe sarung piạ hěntone waugu mapakatěpasu wansane. Manga tul᷊adang awẹ kụ ene su ral᷊ungu manga pangkunangu mahan duatan sire e, sarung Takụ gagholokang. Lěbing baugu tau Asyur, karạ-Ku e seng kạdiahine, batụu i sire e tawe hinone mẹ̌biahẹ̌!”

¹⁵ Kakěllạ e, sěngkatau rarolohang diměnta limiung manga wul᷊ude, mẹ̌bẹ̌bawa wal᷊o mapia, wal᷊ong kal᷊auntu. Ei tau Yehuda, bantugeko ěllonu gẹ̌guwạ e ringangu waehẹ̌ko riandinu e su Mawu Ruata. Banuanu e tawe lai sarung ipẹ̌tahuěllang i ral᷊akisẹ̌. I sire e seng nịgagholọ marasai.