Read Sangir NAHUM 3 Bible Online

NAHUM 3 - Sangir bible

NAHUM 3

¹Kạěngkěhang soa ini kụ napenẹ u konti ringangu pẹ̌papate; napenẹu apal᷊iwụ pul᷊aho arau hampasẹ̌.

²Daringihẹ̌ko papahesu cambokẹ̌ dingangu tatarangkal᷊u roda, tatarangkal᷊u tal᷊angu kawal᷊o ringangu kakiọ u kareta.

³Buntuangu sumasake kawal᷊o e němpěngalo marehe, pedane sụsěnnang, běngkone kụkerong. Taumata nate tawe ikarekeng, kasuang i sire e němpẹ̌tẹ̌tatimbo, makạkatangga taumata e.

⁴Niniwe tahakiwuang ene e kạpanarimạ e hukumang. Kal᷊aholẹ e mambeng makạbinsana. Mal᷊awọ bansa e nihopaěnge, ringangu niologangu[8] al᷊usẹ̌.

⁵MAWU Kụ Limembong Kawasa e měhengetang, ”Ei Niniwe, i kau e sarung Takụ sigěsakeng! Kahiwunu e Takụ bingkaheng su těngong manga wansa, hakịu aị u e ikasilon sire.

⁶I kau e Takụ koateng kere barang makạdarěnting, I kau e Takụ berengangu kotorẹ̌; i kau e Takụ koateng kere wawialaěng.

⁷Měmamanda si kau e sarung mẹ̌těngkaraung batangenge kụ mẹ̌bera, ’Niniwe e kate kạtatanạ opehe samatang! I sai wue masusa naunge ringange? Tawẹ apa kụ deng měhiborẹ̌ si sie.’ ”

⁸Ei Niniwe, tumanị e wue i kau e limembong kapiane wọu i Tebe, niupunangu soang Misirẹ̌? Tebe mal᷊aing kaěbakeng su wiwihu sal᷊ụ kụ měnẹ̌něndạ si sie tabidạu meselẹ̌. Ore, Sal᷊ụ u Nil ene e těndạ nakoạ bal᷊oarị e.

⁹Tebe nẹ̌parenta waugu Sudan dingangu Misirẹ̌ e, kụ kawasane tawẹ kẹ̌takenge; Libia ringangu Put e kai sěndinganenge.

¹⁰Maning kerene, tumanạ u Tebe nitaweng dingangu nihengkẹ sarang pinamembangeng. Su kěbị pělelangenge, manga anạ e sarung bẹ̌baheng pakapate. Manga těmbonange ikitangu hante ringangu ipẹ̌papahiạ sutal᷊oarang manga měnanawenge.

¹¹Ei Niniwe, i kau e mal᷊aing sarung mapinsang ual᷊ingu niwukang. I kau mal᷊aing sarung mẹ̌tawakal᷊i mědeạu mal᷊iwirẹ̌ bọu manga sědụu.

¹²Kal᷊awọu těndạu e sarung kere kalung ara kụ napenẹ u wua-bua masasasạ. Kereu kalu ene kiotang, manga wuane mahondosẹ̌ su ral᷊ungu mohongu taumata kụ mapulu kumaěng.

¹³Manga tahapẹ̌sekẹ u e lome kere wawine ringangu wanuanu e mamben tawe makakoạ manga apa mẹ̌těngon dokạ. Putunge sarung makahěngisẹ̌ kal᷊awọu papal᷊e tukadu pasěllangengu.

¹⁴Měngkate pěnimbạ akẹ baugu rariahi karěngụu i kau e tal᷊iwungang, dingangu pěnoghasẹ̌ko, manga těndạu! Tatahidaiko lěbo waugu pẹ̌koạ tela e ringangu pěndiahingkong pastakane!

¹⁵Waẹbe apa koatengu e, měngkate tạ kěhase samatang, batụu i kau e nal᷊ahẹ u sarung masue matutung arau mawihua su ral᷊ungu pẹ̌seketang. I kau e sarung mapuạ kere ghěsin sasuang kinaseng u kal᷊imbotong. I kau e seng něhite kere kal᷊imbotong!

¹⁶Manga mal᷊ahumbal᷊ụ e něngalembo wọu rekenangu manga wituing su l᷊angị! Arawe orasẹ̌ ini e i sire e mapuạ kere kal᷊imbotong kụ měmingkahẹ̌ papanide wọu e tuměllạ mẹ̌těngkailang.

¹⁷Apan těmbonange ringangu mapapangkatu e mẹ̌sul᷊ungu ghapaěngu kal᷊imbotong kụ mẹ̌tẹ̌ngkal᷊indung su manga meselẹ̌ su tempong matěho. Arawe sarětạeng matangěllo e suměbang, i sire e tawẹ kararěnnane něngkailang; kụ tawẹu sarang sěngkatau e masingkạ u makoạ sarang apa i sire.

¹⁸Ei ratung Asyurẹ̌! Apang guběrnurẹ̌ u e seng něngkapohong, dingangu manga bupatinu e kinahuntikilang sarang marěngụ-děngụ. Kawanuanu e nẹ̌sal᷊iawuhẹ̌ su wawul᷊urange, ringangu tawẹ u lai sarang sěngkatau e makaparingang si sire kapia mapul᷊ẹ.

¹⁹Bahosu e tawe kaundangeng dingangu manga lesẹ u e tawe mapia. Kěbị taumata apan nakaringihẹ̌ habaru kaghagholangu e měmpẹ̌tal᷊okạu ral᷊uasẹ̌ e. Batụu kěbị taumata kụ seng nasigěsạ ual᷊ingu karal᷊akisu kụ tawe masue ene.