Read Sangir HABAKUK 3 Bible Online

HABAKUK 3 - Sangir bible

HABAKUK 3

¹Seng ini e kakal᷊iomaneng u Nabi i Habakuk.[7]

²O MAWU, takụ kinaringihẹ̌ saheng kakanoạʼU, tangú pěndangu piạ kawawantuge nẹ̌papinunụ su naungku e. Karimạko kakanoạʼU masěllahẹ̌ ene e reng saukangʼU ringangu ilahẹʼU su tempong kami ini e. Mal᷊owọko i kami e kěndagengʼU manịeng naungʼU e matětị.

³I Kau e Ruata Limembong Susi diměnta wọu Téman,[8] I Kau e riměnta wọu wawul᷊urangu Paran. Langị e nitukusu kawawantugʼU; banua e napenẹ u raralo waugʼi Kau.

⁴I Kau e riměnta ringangu tualagẹ̌ matuahẹ̌, bọu l᷊imanʼU sụsěbang sěnnange mahamagẹ̌, kụ kai sene kawasanʼU e wẹ̌buniangʼU.

⁵Niaparal᷊engʼU sahindạ su těngonʼU kụ papate e timol᷊e wọu l᷊ikudʼU.

⁶Kereu i Kau e maědung, banua e sumal᷊ungkende; kereu i Kau e tumingang, manga wansa e mẹ̌gěgahẹ̌. Manga wul᷊ude kụ kakalẹ̌ e mawawěka; manga wongkone kụ kakalẹ̌ e mal᷊aing maombọ, su manga wongkone ene e i Kau rumal᷊eng den dokeng bọu tempo-tempo tamai.

⁷Kẹ̌kasilo-Ku e kawanuang Kusyan kinaěnsakengu katatakụ, ringangu tau Midian apạ e sụsal᷊ungkende.

⁸O MAWU, ual᷊ingu laudẹ̌ e tangú i Kau e niawikangu raha? Kai manga sal᷊ụ tangú nakakariadi si Kau e limangehẹ̌? Winawa e kai sẹ̌sakeěngʼU kere kawal᷊o ringangu karetan sekẹ, su tempong umatʼU nighěllirangʼU kal᷊auntu.

⁹NaěnakengʼU e seng nisadianʼU, horom papitịʼU e seng kate měngěnạ.[9] Mase wanua e niwěkanʼU nakoạ manga sal᷊ụ.

¹⁰Nakasilo si Kau e, manga wul᷊ude ghimanuẹ̌ tangú rimasehe tahiti e kere nẹ̌boso. Akẹ su al᷊ungu ěntana e ghụgal᷊ědụ tingihe, luạ e mẹ̌dẹ̌darul᷊ung dingangu sụsahoka.

¹¹Kakerongu manga horom papitịʼU e tụtiol᷊ẹ̌ masahawụ, běngkonʼU e sal᷊a mẹ̌kẹ̌kilạ, tangu nẹ̌dungke matangěllo ringangu wul᷊ange su tampạ e.

¹²Apạ e ringangu mahasa i Kau e mẹ̌dẹ̌dal᷊inding su dunia; manga wansa e tẹ̌tatahidaěngʼU ringangu naungu matětị.

¹³I Kau e tamai limempang mẹ̌deạu mapakal᷊iwirʼu umatʼU ringangu waugu mapakasal᷊amatʼu ratu pinilenʼU. Nikokanu pinakanawo těmbonangu taumata ral᷊akisẹ̌, niěmụ u kěbị apan tumatol᷊ene.[10]

¹⁴Manga papitịʼU e nẹ̌tahatěpasẹ̌ su těmbonangu wuntuangu sekẹ kụ nạung sordadone riměnta kere katoghasu suwu-suwu, mẹ̌deạu i kami ipẹ̌kal᷊iaesẹ̌. I sire rụl᷊ěge ringangu mal᷊uasẹ̌ kere taumata kụ dingangu marěmasẹ̌ měnẹ̌nẹ̌dạ taumata lawọ kawuse.[11]

¹⁵Dingangu kawal᷊onʼU e i Kau e měnanahida taghal᷊oang dingangu l᷊audẹ̌ kụ piạ sěbune mawawira e.

¹⁶Nakaringihẹ̌ ene naungku e gụgiantang dingangu wiwihẹ̌ku e sụsal᷊ungkende. Iạ nělome tawẹ toghasẹ̌ku, laedẹ̌ku e mạsangkong,[12] kụ baẹbe sol᷊ong apa takụ dal᷊engang. Iạ e sarung měngampal᷊ẹ̌ dingangu karal᷊enehẹ̌ hukumangu Ruata suapạeweng měngangalo.

¹⁷Manilaing kalung ara e tawẹ apa wuane, dingangu kalung anggorẹ̌ tawẹ anggore, manilaing pěmaměsạu zaitun e tawe nariadi mase hasilu gandung su rahami e makạl᷊usiang, manilaing manga domba e nasue nate ringangu těndạ u manga binatange tawẹ lohone,

¹⁸iạ e sarung hanesẹ̌ mal᷊uasẹ̌, batụu i Kau e MAWU Ruata mananal᷊amatẹ̌ku.

¹⁹I Kau e něngonggọu katoghasẹ̌ si siạ kere laedu rusa, laedẹ̌ku e pinakatoghasʼU e. I Kau e němihing si siạ tadeạu mapia, su tempon dụdal᷊eng su wawul᷊urange.