Read Sangir ZEPANYA 2 Bible Online

ZEPANYA 2 - Sangir bible

ZEPANYA 2

¹Ei wansa kụ běgaweng mamea, katilangko

²těntal᷊ang i kamene ren tawe nạlolang dingangu nạhěgu kere bungang![4] Katualagẹ̌ko těntal᷊ang den tawe nạděnta ěllon dal᷊angehu MAWU e, kụ i kamene kahinoěngu ral᷊angehu MAWU e kụ apạ e rụděllị ene.

³Pẹ̌sul᷊ẹ e su anuʼm MAWU, ei kěbị taumata apan naunge masanạ su wanua ini, dingangu kěbị taumata kụ tụtuhụ manga tita-Ne. Pẹ̌kakanoạ e tuhụ kapuluʼm MAWU ringangu pẹ̌těngkasanạkong batangengu e su těngo-Ne. I saiwe masingkạ u i kamene sarungbe mal᷊iu wọu hukumang su ělloʼm MAWU e měnodẹ u ral᷊angehʼE.

⁴ Su soang Gasa e tawẹ u sarang sěngkatau sarung ipakasal᷊amatẹ̌. Askelon sarung marěmasẹ̌ tawẹ taune. Dal᷊ohong Asdod sarung tokol᷊ang su ral᷊ungu pěngangalo sěnsul᷊e kụ sěngkělěndịe su ěllo mal᷊ětu ringangu tumanạ u Ekron sarung ioro apěngal᷊ing bọu soan sire.

⁵Kai pisị i kamene, ei tau Pilistin, bansa kụ mẹ̌tẹ̌tanạ su kanandung apeng. MAWU e seng něnilakehu hukumang baugʼi kamene. I Sie sarung mapakawinasang kamene e, kụ tawẹ u sarang sěngkatau wọʼi kamene e sarung mal᷊iwirẹ̌.

⁶Banuanu e su rěduhu laudẹ̌ nakoạ bimbaengu rěmpugẹ̌; manga selong lukadẹ̌ dingangu manga těndạu domba e sarung koateng sene.

⁷Tumanạ u Yehuda e sarung makapěllọ, sarung makakaiang su wanuanu ene. I sire sarung měmpěngahạ binatang su ěntana ene, ringangu su tempong hěbi e i sire sarung měmpẹ̌tikị su manga wal᷊en tau Askelon. Batụu MAWU, Ruatan sire e sarung měněntanudẹ̌ si sire lai ringangu mapakariadin sire e mal᷊unsemahẹ̌ kapia.

⁸ MAWU Kụ Limembong Kawasa e něhengetang, ”Seng Takụ kinaringihẹ̌ manga wansang Moab dingangu Amon něhinakang dingangu němpẹ̌baheau umatẹ̌-Ku. I sire e němpěngobotu sarung měmul᷊aho ěntanang umatẹ̌-Ku.

⁹ Baugu Iạ e kụ biahẹ̌, Duatan tau Israel, Iạ e sarung měngaehẹ̌ Moab dingangu Amon pakawurěsi kere Sodom dingangu Gomora. Manga soa ene e sarung měngkapenẹ u manga sumung asing dingangu manga ěnạu kal᷊aopehẹ̌ sarang marěngụ kụ seng nituwoěngu manga ěhe. Lěmbeng umatẹ̌-Ku apan seng nal᷊iwirẹ̌ e sarung měhampasẹ̌ apan tumanạ e, ringangu měmul᷊aho ěntanan sire.”

¹⁰Kerene kakakoạ u ral᷊ohong Moab dingangu Amon sarung ihukung ual᷊ingu kal᷊aobotẹ̌ dingangu kararangẹ u naung i sire, kerene lai i sire seng něhinakang umatu MAWU Kụ Limembong Kawasa e.

¹¹MAWU e sarung mapakariadin sire e měngkatakụ. I Sie e sarung mapakagholọ u manga mahan duata su dunia. Bọu e kal᷊awọu wansa e sarung mẹ̌kal᷊iomaneng su MAWU, sěngkatau-sěngkatau e su wanuane hala.

¹² Kerene lai tumanạu Sudan sarung kaěnsakengu hukumangu papate kahiang MAWU.

¹³ Bọu ene MAWU e sarung mẹ̌pakẹ u kawasa-Ne waugu mapakagholọ u Asyur. Soang Niniwe sarung ipakariadi wanua tạ taune ringangu makoạ banua mahusụ-husụ.

¹⁴Sene manga ghapaěngu binatang dingangu kal᷊awọu haghing binatange sarung mahundal᷊oka ringangu měmpěngirul᷊e. Manga manụ sampahạ e sarung měmpẹ̌sal᷊ehẹ̌ su ěnạ u kal᷊aopehẹ̌ ene kạpahuheọ e wọu apan janela. Manụ gaga e sarung mạhungkaọ su manga ral᷊indaěngu tukadẹ̌. Kalun cěmara su manga wal᷊e su soa ene sarung masueng lěkabe.

¹⁵Seng ene e sarung mariadi su soa kụ maral᷊uasẹ̌ ene e ringangu měngěnna u watangenge e tawẹ apa-apa wue. Tumanạ e mạngěnna u soan sire e kai soa kạguwakenge su dunia. Ene e karěmmase wanua ene, tawẹ apa taumatane tabeạu katewe binatangu kěhu kụ němpẹ̌sal᷊ehẹ̌ sene! Apan taumata kụ masahe su soa ene e sarung huměkosẹ̌ dingangu makạpěndang u tụtaghiawahẹ̌.