Read Sangir ZEPANYA 3 Bible Online

ZEPANYA 3 - Sangir bible

ZEPANYA 3

¹Kai pisị Yerusalem, soa kụ nagholang o kawe puluang dumokạ MAWU ringangu mẹ̌tahuěllangu tumanạ e sẹ̌sane!

²Kạěngkěhang soa kụ mạdiri měnarimạ těntiroʼm MAWU, ringangu tawe lai měngangarěgang manga sasal᷊ěntihọʼE, kụ tawe měnarakangu pẹ̌bawiahe su MAWU, dingangu tawe mẹ̌gausẹ̌ tul᷊umange si Sie!

³Manga těmbonangu soa ene e mẹ̌sul᷊ungu singa lụhuang. Manga mělahukunge mẹ̌sul᷊ungu manga ral᷊ugẹ̌ něngkal᷊unusẹ̌; i sire e tumanịu mauagẹ̌ hakịu sarang manga ruhine sěmbua e tawẹ apa kụ deng desokang baugu sěngkarịěllone.

⁴Manga nabine tawẹ apa pěndangu kawe měmamikul᷊e dingangu tawe kapangimangeng; manga imange napakal᷊amuhụ u apang kụ nitani waugu MAWU ringangu němamihu manga toratu Ruata e waugu kal᷊auntung i sire hala e.

⁵Kaiso MAWU e wědang ene su soa ene; i Sie hanesẹ̌ mẹ̌kẹ̌koạ apang kụ těngadẹ̌ dingangu tawe mẹ̌sal᷊a. Apang kamal᷊ukadẹ̌ nal᷊ahẹ u i Sie e mạngonggọu kạadilẹ̌ su manga umatʼE. Kaiso, taumata kụ běgang kạadilẹ̌ su soa ene těbewe mẹ̌kẹ̌koạ dal᷊akisẹ̌ kụ běgaweng mamea.

⁶MAWU e něhengetang, ”U Iạ seng napakailangu wansa mal᷊awọ; manga soan sire e Takụ nipakaghohahẹ̌, dingangu manga meselẹ̌ ore lai měnaran sire e Takụ pinakal᷊ěmbe ěnạu manga opehe. Kal᷊awọu soan sire e marěmasẹ̌ tawẹ taune dingangu apan dal᷊enge tụtal᷊anggo.

⁷Su ěnna-Ku, ’Orasẹ̌ ini nal᷊ahẹ u taumata-Ku e měngẹ̌ngadatẹ̌ si Siạ dingangu rụdaringihẹ̌ kal᷊awọu těgu-Ku. Nal᷊ahẹ u i sire e mẹ̌tẹ̌tahěndung[5] těntiro kụ Takụ nionggọ si sire.’ Kaiso karal᷊ahẹ e, i sire měngkate lai sahuneng mẹ̌kẹ̌koạ dal᷊akisẹ̌ e wọu nạung kal᷊imona.

⁸Kaiso, pangantibẹ̌ bue! Pěngampal᷊ẹ̌ ěllone Iạ e reng mẹ̌bawa kạbaratang. U kai sen Takụ niputusẹ̌ baugu měngomol᷊ẹ̌ manga wansa ringangu kararatuang baugu mapakaěnsạu ral᷊angehẹ̌-Ku e si sire. Kạguwạu dunia e sarung masue kanengangu putungu ral᷊angehẹ̌-Ku.

⁹Arawe wọu ene Iạ e sarung měmal᷊ui naungu manga wansa ene, hakịu i sire e mẹ̌kal᷊iomaneng si Siạ samatang, dingangu wal᷊inewe su manga ruata wal᷊ine. Manga wansa ene kěbị e sarung dumaringihẹ̌ si Siạ.

¹⁰Saral᷊aing bọu Sudan kụ marau e, umatẹ̌-Ku seng nẹ̌sal᷊iawuhẹ̌ ene e sarung duměnta ringangu maněmbang gaghěllị si Siạ.

¹¹Su tempo ene, ei umatẹ̌-Ku, i kamene e tawahal᷊uasu lai makapěndang mamea ual᷊ingu seng nẹ̌pahuwungkadẹ̌ su těngo-Ku. Iạ e sarung měnokol᷊u apan taumata kụ maobotẹ̌ dingangu marangẹ naunge, kụ i kamene semben tawe lai mẹ̌pahuwungkadẹ̌ su těngo-Ku su wukidẹ̌-Ku susi e.[6]

¹²Paị sene e sarung Takụ iwala katatanạ kere wansa sěmbaụ kụ naunge masanạ kụ mạngumbala su tul᷊umang-Ku. I sire e wotonge mẹ̌tanạ paị sene.

¹³ Tau Israelẹ̌ e apan nal᷊ěmbe e, sen tawe lai saụ mẹ̌koạ dal᷊akisẹ̌ si sai-sai; i sire sen tawe lai sarung mẹ̌konti, ringangu sen tawe lai sarung měngakal᷊ẹ̌. I sire e sarung tawẹ konsange apa ringangu mal᷊unsemahẹ̌, dingangu tawe makakapěndang matakụ si sai-sai.”

¹⁴Ei Israel, pahul᷊uasẹ̌ dingangu pěmpẹ̌kantarị e! Ei Yerusalem, pěmpahul᷊iage ringangu kạguwạu naung.

¹⁵Batụu MAWU e něngirul᷊e něhukung si kamene; i Sie seng něnokol᷊u kal᷊awọu sědụu e. I kamene e tẹ̌těntanudangu ratung Israel, MAWUnu e hala. Orasẹ̌ ini e i kamene seng tawahal᷊uasu relaing makapěndang matakụ.

¹⁶Sarung marěnta tempone taumata mẹ̌bera u, ”Ei Yerusalem, abe kěngkatakụ dingangu kumbahangbe měngkal᷊ompọ naung i kamene.

¹⁷I kamene e tẹ̌těntanudangu MAWU Ruatanu e kụ mahasa. I kamene e nakauntu ual᷊ingu kawasa-Ne. MAWU e rụl᷊uasẹ̌ dingangu rụl᷊iagẹ̌ ual᷊ingu i kamene, su ral᷊ungu kakěndagʼE, i kamene e nionggotangʼE pẹ̌bawiahẹ̌ buhu.

¹⁸Ual᷊ingu i kamene, i Sie e mẹ̌kẹ̌kantarị mal᷊uasẹ̌ al᷊ingkai taumata kapẹ̌sẹ̌sal᷊iwange.” Angkuěng u MAWU, ”U hombang masaria e kụ seng němatakụ si kamene Takụ nipakapuạ. Kal᷊ahinanu e sen Takụ nirědasẹ̌.[7]

¹⁹Tempone e sarung duměnta, mẹ̌tatahuěllang i kau e Takụ ipakawihua, ringangu taumata kempal᷊ẹ̌ e Takụ ipakasal᷊amatẹ̌; patikụ apang nawembange Takụ ahakeng pakapul᷊ẹ. Kal᷊ahinan sire e Takụ bal᷊uiang makoạ kal᷊aadatẹ̌; baewe suapa, saral᷊aing patikụ dunia; i sire sarung bantugang dingangu raloěng.

²⁰Tempone sarung marěnta, tumanạu e kụ nasawuhẹ̌ e Takụ ahakeng pakapul᷊ẹ. I kamene Takụ ipakateleng su kasěllahu wowon dunia ini e, ringangu kasasukụ u pẹ̌bawiahu e sarung Takụ ipakapul᷊e kapia.” MAWU e seng nẹ̌bisara.