Read Sangir HAGAI 1 Bible Online

HAGAI 1 - Sangir bible

HAGAI 1

¹ Su taung karuane su parentan Datu i Darius su Persia, su tanggalẹ̌ humotong bul᷊ang kaěnnunge, MAWU e mẹ̌bẹ̌bisara limiung Nabi Hagai. Pělahabaru MAWU ene ipẹ̌tẹ̌timona si Zerubabel anạ i Sealtiel, guběrnurẹ̌ u Yehuda, ringangu su Imang Mawantugẹ̌ i Yosua anạ i Yozadak.

²MAWU Limembong Kawasa e něhengetang si Hagai, ”Bansa ini nẹ̌bera u wědang bal᷊ine tempone waugu mamangung kapia Wal᷊e-Ku.”

³Bọu ene limiung Nabi Hagai, MAWU e něhengetang su umatʼE,

⁴”Ei Umatẹ̌-Ku, apa sen tempone waugʼi kamene matanạ su ral᷊ungu wal᷊e matoghasẹ̌ dingangu matei, sarangkate Wal᷊e-Ku e wědang kere manga korọ e?

⁵Kěnang, kẹ̌kakělai kakakoạu!

⁶I kamene seng něnawuhu wine lawọ, kaiso pěnsạu e mahal᷊i. I kamene piạbe kaěng i kamene, kaiso tawe makasukụ baugu mapakal᷊aedu tiangu. I kamene mạnaghuang anggorẹ̌ kaiso tawe makatimu waugu mapakawatụ kapulung naungu. Si kamene piạbe pakeang, kaiso tawe makatětị batangengu. Ringangu tatendenge kụ tarimakeng u apang mantorosẹ̌ e tawe makasukụ ipaněmpụ biahʼi sire e.

⁷Kai tawe nạtilang i kamene tangu? kụ unụewe hal᷊ẹ̌ ene nariadi?

⁸Kụ ini e sakạ e sol᷊ong manga wongkone pěngal᷊ạ kalu, mase pětịko Wal᷊e-Ku; tangu Iạ e sarung makapěndang mal᷊uasẹ̌ dingangu Iạ sarung sěmbaěng lai kere hinone. Kěnangko tatingang kakakoạ u!

⁹I kamene mělẹ̌harapẹ̌ gěsing pamaměnsạ kụ mahěmpal᷊iu, kasueěnge nạung kinaěbạ i kamene e kětạembeng kadodọ-dodọ; kụ niwawang kamene napul᷊ẹ, kaiso ghěsing pěnsạ i kamene e Takụ tiukang, hakịu pakasue pakiwawa su anging.[1] Unụe Takụ koateng ene tangu? Sasimbahe ute: Ual᷊ingu Wal᷊e-Ku e wědang kere manga tuide, arawe i kamene kěbị e měngkai mal᷊aigasẹ̌ měmpěmangung bal᷊eng kamene sěngkatau-sěngkatau.

¹⁰Kai ene hakịu tawẹ poěngu tahiti e rumasehẹ̌ hakịu tawẹ apa sasuang kụ makakatuwo.

¹¹Iạ e seng napakarěntang kal᷊ahangu waugu ěntana ringangu manga wěntihe, su manga rahaming gandung dingangu manga waelu anggorẹ̌ ore lai waelu manga zaitun dingangu su wowong kal᷊awọu manga sasuang su ěntana ini, ore lai waugu taumata ringangu binatang ore lai kal᷊awọu sạbarang kụ tẹ̌tawakal᷊iang i kamene.”

¹²Bọu e i Zerubabel dingangu i Yosua ore lai kal᷊awọu umatʼu Israelẹ̌ kụ seng nẹ̌sul᷊e kạpia wọu pinamembangeng[2] su Babelẹ̌ e, rụdaringihẹ̌ kal᷊awọu wawerang Hagai, darolohangu MAWU ene. I sire mẹ̌kẹ̌koạ apang kụ nịlaorong MAWU e si sire ual᷊ingu mạtakụ su MAWU.

¹³Bọu e i Hagai naul᷊ị su kawanua mạanum papaul᷊ị u MAWU e seng nẹ̌kědo sarung maněntanudẹ̌ si sire.

¹⁴Kerene MAWU e něnganoạ naungu Guběrnurẹ̌ u Zerubabel, Imang Mawantugẹ̌ i Yosua e ore lai kal᷊awọu taumata kụ seng nẹ̌sul᷊e wọu piněmembangeng, tadeạu i sire kěbị měmunara waugu měmangung Bal᷊em MAWU Kụ Limembong Kawasa e Ruatan sire.

¹⁵I sire nanětạ e nẹ̌karạdiahang su tanggalẹ̌ duam pul᷊o ěpạ, bul᷊ang kaěnnunge su taung karuane su parentan Datu i Darius.