Read Sangir ZAKHARIA 1 Bible Online

ZAKHARIA 1 - Sangir bible

ZAKHARIA 1

¹ Su wul᷊ang kaual᷊une su ral᷊ungu taung karuane su parentan Datu i Darius su Persia, MAWU e něhabaru tatanata ini si siạ, Nabi Zakharia anạ i Berekhya ringangu pulung i Ido.

²MAWU e něngoro si siạ pẹ̌bẹ̌bera kirini su umatʼE, ”Su tempo nal᷊iu, Iạ e MAWU Kụ Limembong Kawasa, apạ e nẹ̌bawal᷊uang matědụ su manga i upung i kamene.

³Arawe orasẹ̌ ini e Iạ mẹ̌bera si kamene: Pẹ̌sul᷊ẹ e su anu-Ku, tangu Iạ e lai sarung mẹ̌bal᷊ị sarang anunu.

⁴Kumbahangbe kere manga i upung i kamene. Nạung kal᷊imona e manga nabi e mělẹ̌habaru tatanata-Ku e si sire tadeạu i sire e kumbahang delaing mẹ̌koạ dal᷊akisẹ̌ dingangu mẹ̌koạ dosa. Kaiso i sire e tawe mẹ̌parekẹ̌ dingangu tawe tumuhụ si Siạ.

⁵Kai suapa i upungu ringangu manga nabi ene ini e? I sire semben tawẹ dise lai.

⁶Lumiung nabi manga ěllang-Ku ene, Takụbe ihabarẹ̌ manga tita ringangu manga laingatẹ̌-Ku su manga i upung i kamene. Kaiso i sire e tawẹ pandungange hakịu i sire e harusẹ̌ měnal᷊udẹ̌ aị e. Bọu e i sire mẹ̌sasěsilẹ̌ dingangu měngaku u Iạ e, MAWU Kụ Limembong Kawasa e, seng něhukung i sire pinẹ̌bewẹeweng pẹ̌sasal᷊an sire e, ringangu natuhụbe kere suapang Takụ tinantu.”

⁷Su tanggalẹ̌ duam pul᷊o ěpạ bul᷊ang Syebat, kụ kai wul᷊ang kapul᷊oěsane, su taung karuane pẹ̌paparentan Datu i Darius, MAWU něhabaru tatanata-Ne si siạ. Su ral᷊ungu papasilo sěmbaụ su tempong hěbi,

⁸ iạ nakasilo malạekatu MAWU sụsake kawal᷊o mahamụ. I sie naědung su wědạ e sěmbaụ su wěllạu manga kakaluangu murad. Su l᷊ikude mạhundarisị kawal᷊o wal᷊ine manga piram baụ, piạbeng mahamụ, piạbeng mahamụ kere komposẹ̌ dingangu piạbem mawira.

⁹Iạ e nakiwal᷊o si sie, ”Tuang, kai a mangal᷊ene kěbị kawal᷊o ini?” I sie simimbang, ”Takụbe lahekang mangal᷊ene si kamene.

¹⁰I sire e niringọ u MAWU waugu pạmarikěsa dunia.”

¹¹Kěbị kawal᷊o ene něhabarẹ̌ su malạekatẹ̌ u, ”I kami e seng nangumpěpidẹ̌ kasěllahu wowon dunia ini, kutẹu nạung dunia ini e kawe mal᷊enehẹ̌ dingangu tawẹ konsange apa.”

¹²Bọu e malạekatẹ̌ ene e nẹ̌bera, ”MAWU Kụ Limembong Kawasa e, pitum pul᷊o su taunge karěngụ e i Kau e limangehẹ̌ su Yerusalem dingangu manga soa su Yehuda. Sarang angerẹete i Kau e sarung těbe mẹ̌pẹ̌pědu ringangu tawe mẹ̌gěllịu ampung si sire?”

¹³MAWU e simimbang su malạekatẹ̌ ene ringangu manga wawera kụ ipělẹ̌hiborẹ̌,

¹⁴dingangu malạekatẹ̌ e něngoro si siạ pělẹ̌habaru apang kụ iwerang MAWU Kụ Limembong Kawasa, ”Iạ kai apạ e kụkěndagẹ̌ dingangu apạ e makạsusa naung soang Yerusalem, soa-Ku susi e.

¹⁵Arawe Iạ e nẹ̌pědu matědụ su manga wansa kụ makạpěndang mal᷊enehẹ̌ e ringangu tawẹ konsang apa. Batụu su tempong Iạ e mětẹ̌tingkědangu ral᷊angehẹ̌-Ku e su manga umatẹ̌-Ku e, manga wansa ene e něnamba kasasigěsạ u umatẹ̌-Ku.

¹⁶Orasẹ̌ ini e Iạ mẹ̌sul᷊e sarang Yerusalem baugu měngonggọu pěngangampung su soa ene. Bal᷊e-Ku e sarung iwangung kapia ringangu soang Yerusalem sarung koateng kapia.”

¹⁷Malạekatẹ̌ ene e něngoro si siạ pělẹ̌habaru tatanata ini e lai, ”MAWU Kụ Limembong Kawasa e nẹ̌diandi u manga soa-Ne sarung matul᷊ende kapia ringangu sěnsul᷊eko l᷊ai i Sie sarung mẹ̌tul᷊ungu Yerusalem dingangu měngaku u kawe tataghuanengʼE sẹ̌sane.”

¹⁸Su ral᷊ungu papasilo lai wal᷊ine, iạ nakasilo sungen sapi ěpạ.

¹⁹Iạ e nakiwal᷊o su malạekatẹ̌ kụ seng nẹ̌bisara si siạ, ”Kai apa mangal᷊eng manga sunge ene?” I sie simimbang, ”Manga sunge ene ute kai tatialang manga kararatuang matoghasẹ̌ kụ napẹ̌kal᷊iaesu tumanạ u Yehuda, Israel dingangu Yerusalem.”

²⁰Bọu e MAWU napatodẹ si siạ ěpạ u katau tahasěsal᷊ẹ̌ uase e kụ němpẹ̌bawa rarupa.

²¹Iạ e nakiwal᷊o, ”Kai apa timonang darěntan sire tangu?” I sie simimbang, ”Baugu mapakende ringangu mapakawantugu manga wansa kụ seng něnggagholang Yehuda ringangu napẹ̌tal᷊eing apan tumanạ e.”