Read Sangir ZAKHARIA 10 Bible Online

ZAKHARIA 10 - Sangir bible

ZAKHARIA 10

¹Kereu musungu mal᷊ěhubẹ̌ e masongo, pẹ̌gause tahiti su MAWU e. Tangú MAWU e sarung měnampung u winawa malělubẹ̌ e, mase maparasehu tahiti mal᷊awọ-l᷊awọ hakịu manga rahami e měngkaido ringangu mẹ̌biahẹ̌ baugu kěbị taumata.

² Taumata e mẹ̌dorong tatumbal᷊ung su manga mahan duata ringangu apan tahapatehẹ̌, kaiso kal᷊awọu sasimbang i sire kẹ̌kaěbakeng e kai konti ringangu wisara tạ lohone samatang. Piạ makatualagẹ̌ ipi, kaiso tatualagʼi sire e kětạeng makapal᷊idẹ̌ si kamene, ringangu lahiborẹ̌ kụ ilẹ̌onggọ tawẹ mangal᷊ene. Ual᷊ingu ene kawanua e nẹ̌sal᷊iawuhẹ̌ kere domba. I sire e mạsusan tawẹ apa těmbonang i sire e.

³MAWU něhengetang, ”Iạ e lumangehẹ̌ marasai su měngangawasa kụ mẹ̌pẹ̌parenta umatẹ̌-Ku, ringangu i sire e sarung Takụ ihukung. Arawe tumanạ u Yehuda e ute kai tataghuaneng-Ku, ringangu Iạ e MAWU Kụ Limembong Kawasa e sarung měhiking si sire e. I sire e sarung Takụ koateng kawal᷊on sekẹ mahasa waugu Iạ e.

⁴Bọu tal᷊oarang sire sarung Takụ pileěng měngangawasa, měngangahạ dingangu mol᷊ensekẹ kụ sarung mẹ̌parenta umatẹ̌-Ku.”[12]

⁵Tumanạu Yehuda e sarung makauntu kere manga tahapẹ̌sekẹ kụ měmpanahida manga rokạ kere lěbo sural᷊eng. I sire sarung mẹ̌bangkuadẹ̌ ual᷊ingu Iạ, MAWU měnẹ̌nongka si sire, ringangu wuntuangu sekẹ kụ sụsake kawal᷊o kụ sarung ikawatạ i sire kěbị.

⁶”Tumanạu Yehuda e sarung Takụ ipakatoghasẹ̌, umatu Israelẹ̌ e sarung Takụ ipakasal᷊amatẹ̌. Takụ bawaěng i sire e kapia sarang banuane ual᷊ingu Iạ e kụkěndagʼi sire. Takụ koateng i sire e kere wansa kụ tawe Takụ nipẹ̌sẹ̌sunial᷊ẹ̌. Seng Iạ e MAWU Ruatan sire, kal᷊awọu kakal᷊iomaneng i sire e sarung Takụ naungang kapia.

⁷Umatu Israelẹ̌ e sarung kere wawahani kụ matoghasẹ̌, mẹ̌sul᷊ungu taumata kụ něnginung anggorẹ̌, i sire e sarung mal᷊uasẹ̌. Pal᷊ahiten sire e wọu tempo sarang tempo tawe sarung mapakawul᷊eng kal᷊auntu kụ Takụ nionggọ ini e. I sire sarung měmpahul᷊uasẹ̌ ual᷊ingu kakanoạ-Ku e waugi sire e.

⁸Umatẹ̌-Ku e sarung Takụ kuiang dingangu Takụ komol᷊ang makoạ sěmbaụ. I sire Takụ ipakal᷊iwirẹ̌ dingangu Takụ ipakal᷊awọ kere kal᷊imona.

⁹Manilaing Takụ ipẹ̌kakeke i sire sutal᷊oarang manga wansa, i sire e sarung těbewe mẹ̌tẹ̌tahěndung si Siạ paịse. I sire e sarung masal᷊amatẹ̌, kerene lai manga anạ e ringangu sarung mapul᷊e sěngkakapul᷊ẹ sarang banuane.

¹⁰Bọu Misirẹ̌ dingangu Asyurẹ̌, i sire e sarung Takụ ipakapul᷊ẹ. Su wanuane hala e i sire sarung Takụ ipěllọ. I sire e Takụ paringaneng sarang Gilead dingangu Libanon lai; hakịu kal᷊awọu wanuane napenẹ i sire e.

¹¹Kereu i sire e lumiu l᷊audu kasasigěsạ e, Iạ MAWU sarung měměbahẹ̌ manga luạ; tangu wal᷊an Sal᷊ụ u Nil mal᷊ěsa mamara. Tau Asyurẹ̌ mal᷊aobotẹ̌ e sarung ipakasanạ, dingangu Misirẹ̌ kụ mahasa e sarung kailangengu kawasa.

¹²Iạ e sarung manoghasẹ̌ umatẹ̌-Ku, i sire e sarung mararingihẹ̌ dingangu mẹ̌tahamawu si Siạ. Iạ e MAWU kụ seng nẹ̌bisara.”