Read Sangir ZAKHARIA 11 Bible Online

ZAKHARIA 11 - Sangir bible

ZAKHARIA 11

¹Ei Libanon, topeko manga tukadu e, tadeạu putunge měnutung manga kakaluangu arasu![13]

²Ei kalung sanobar, ral᷊ěmpasiangke, batụu kai seng nasue nal᷊ahaka kakaluangu cěmara, kakaluang makakětị e seng nasue naral᷊ei. Ei manga kakaluang gaghuwạ su Basan, pěmpẹ̌kiạ e. U manga kěhu gaghaghuwạ e seng nasue naral᷊ěndasẹ̌ natene.

³Daringihẹ̌ko ral᷊ěmpasiangu manga měngangawasa něngkaparungke katataghupian sire e! Daringihẹ̌ko lahuangu manga singa su kěhu; u nagholangke katatanakeng i sire e su kanandun Sal᷊ụ u Yordan.

⁴MAWU Ruata e něhengetang si siạ, ”Pẹ̌koạ e tabidạu i kau e lukadẹ̌[14] kụ měngěngahạ domba kụ sarung potokang.

⁵Apang měmamělline němpěmate manga domba ene tawẹ hukumange. I sire apang nẹ̌bal᷊ụ gěsing manga domba ene nẹ̌bera, ’Karaloko MAWU! Orasẹ̌ ini i kitẹ e sahuneng nakalạ!’ Manga měndal᷊ukadẹ̌ ene e tawẹ pěndangu kakěndage su manga domba lahikinang i sire e.

⁶Iạ e tawe lai mapulu tumal᷊ěntụ i sai-sai su wanua ini. Iạ sẹ̌saku e sarung měnarakangu kal᷊awọu tumanạ e su apang měngangawasa e. I sire ene sarung měnggagholọ banua ini, ringangu Iạ e tawe sarung měhampasẹ̌ bọu kawasan sire e.”

⁷Iạ e, i Zakharia, bọu ene waehangu manga mẹ̌bawal᷊ụ domba baugu ipělukadẹ̌ manga domba kụ sarung potokang. Iạ e piạ těking darua; sěmbaụ e takụ isěbạ si ”Ghaghellị” dingangu sěmbaụewe lai ute i ”Laikị”. Bọu ene iạ e nanětạ něndiagạ dingangu něhiking manga domba ene.

⁸Těllung katau lukadẹ̌ kụ mạběnsingu iạ e nangěnsuẹ e kasasabarẹ̌ku. I sire e takụ itokol᷊ẹ̌ su ral᷊ungu tempo sěmbul᷊ang.

⁹Bọu e iạ mẹ̌bera su ghapaěngu domba ene, ”Iạ e mạdiri mělukadẹ̌ si kamene kapia e. I saing harusẹ̌ mate e walạ e kapapatene, ringangu i saing harusẹ̌ mawinasa e, walạete kawawinasane. Bọu ene lěmbene botongewe mẹ̌papate.”

¹⁰Mase těking kụ takụ nisěbạ si ”Ghaghěllị” ene takụ nial᷊ạ dingangu takụ nịpapědi waugu ipěluka pẹ̌dariandi kụ nikoạ u MAWU ringangu patikụ bansa.

¹¹Su ěllo ene lai pẹ̌dariandi ene e ipakal᷊uka. Manga mẹ̌bawal᷊ụ domba ene měnẹ̌nitị si siạ, dingangu i sire e masingkạ u MAWU e kapẹ̌bẹ̌berane limiung kal᷊awọu kakanoạku.

¹² Iạ e mẹ̌bera si sire, ”Kereu i Tuang ene e mapulu, gěllịko gajiku; kereu tala ute, walạ e.” Bọu e i sire e něngonggọu gajiku roitẹ̌ sal᷊aka těllum pul᷊o su kal᷊ěpane. MAWU e něhengetang si siạ, ”Tahoko roitẹ̌ ene su ral᷊ungu kasẹ̌ u Wal᷊e-Ku.”[15] Tangú takụ nisuẹ̌ těllum pul᷊o su kal᷊ěpane roitẹ̌ sal᷊aka su ral᷊ungu kasẹ̌ u Wal᷊em MAWU. Kětạeng kerene pěngangarěgang sire e si siạ!

¹⁴Bọu ene e takụ nịpapědi těkingku karuane e kụ nạung nisěbạ si ”Laikị”, tangú naběkạ kasasěmbaụ i Yehuda rẹ̌duang Israelẹ̌.

¹⁵Bọu ene nẹ̌berạ e MAWU e si siạ, ”Pẹ̌koạko l᷊ai sěnsul᷊e i kau al᷊ingkai měndal᷊ukadẹ̌, kaiso sěnsul᷊e ini kere měndal᷊ukadẹ̌ dal᷊akisẹ̌.

¹⁶Ual᷊ingu Iạ e sarung měngoro sěngkatau měndal᷊ukadẹ̌ baugu ipěndiagạ gapaěngu domba-Ku, kaiso i sie e tawe nẹ̌pandung domba nailang; i sie tawe nẹ̌deạ domba kụ nawuhị, tawe lai něngundang domba kụ nal᷊esẹ, dingangu tawe nẹ̌gěllị u kaěnge su domba kụ bědang biahẹ̌. Katewe maal᷊ạ i sie sẹ̌sane kiminạ gẹ̌sin domba kụ katawaěnge ringangu něnawụ manga kanukung binatang ene.

¹⁷Kai pisị měndal᷊ukadẹ̌ kụ tawẹ gunane kerene! I sie seng něněntangu ghapaěngu dombane. Pẹ̌sasekẹ e sarung mangěnsue kawasane. Takiahe sarung mělome ringangu matane koanenge mawuta.”