Read Sangir ZAKHARIA 12 Bible Online

ZAKHARIA 12 - Sangir bible

ZAKHARIA 12

¹Seng ini e tatumbal᷊ungu MAWU e mạanung Israel. MAWU e napěngěmpahu l᷊angị, napakariadin dunia ore lai něngonggọu pẹ̌bawiahẹ̌ su taumata kụ mẹ̌bera u,

²”Iạ e sarung mapakariading Yerusalem mẹ̌sul᷊ungu panganginumang lohong anggorẹ̌; manga wanua ipělẹ̌lampunge sarung měmpanginung ene kụ sal᷊a mạpapongge kere taumata wukang. Dingangu kereu Yerusalem kawe seketang, ute manga soa su wanuang Yehuda e kụ bědang ene e, sarung lai aloěng.

³Kaiso kamagengu ěllo ene e marěnta, Iạ e sarung mapakariading Yerusalem kere watu kụ mawěhạ; wansa lai sude kụ sarung měnal᷊ukạ měnapuạ si sie, sarung makahombang silakạ. Patikụ bansa su dunia e sarung mẹ̌tatamba měnekẹ Yerusalem.

⁴Su ěllo ene e kěbị kawal᷊o e Takụ ipẹ̌tal᷊ạbingọ dingangu kal᷊awọu sumasakene e Takụ ipẹ̌pulu, tumanạ u Yehuda e sarung Takụ diagateng, kaiso kal᷊awọu kawal᷊ong sědụ e Takụ ipakawuta.

⁵Mase kal᷊awọu manga walagu Yehuda e sarung mẹ̌bera su ral᷊ungu naung, ’MAWU Kụ Limembong Kawasa e kụ měngonggọu katoghasẹ̌ su manga umatʼE kụ mạtanạ su Yerusalem.’

⁶Su ěllo ene manga walagu Yehuda e sarung Takụ ipakariadi kere putung su ral᷊ungu niambungangu kalum putung arau oborẹ̌ kạděllị e su al᷊ungu manga kaweng gandung; i sire sarung mapakawinasang manga wansa mạngělikụ e. Arawe tumanạ u Yerusalem e sarung kạtatanạ su ral᷊ungu soa tawẹ konsange.

⁷Iạ e MAWU humotong-motong sarung mẹ̌gěllị u kal᷊auntu su manga soldadong Yehuda e, tadeạu kal᷊aadatẹ̌ kụ nitarimạ u hěnton Daud dingangu tumanạ u Yerusalem tawe limembo wọu kal᷊aadatẹ̌ kụ nitarimạ u tumanạ u Yehuda wal᷊inẹ e.

⁸Su ěllo ene Iạ e sarung měngěllung tumanạ u Yerusalem; dingangu l᷊ai apang kal᷊omeěnge mal᷊aing sutal᷊oaran sire sarung matoghasẹ̌ kere katoghasʼi Daud. I sire e sarung ahakengu hěnton Daud kerẹewe kahiang malaekatẹ̌-Ku mundangu ual᷊ingu Iạ sẹ̌saku.

⁹Su ěllo ene Iạ sarung mapakawinasang apam bansa kụ měnal᷊ukạ měngalo Yerusalem.

¹⁰ Bọu ene hěnton Daud ore lai tumanạ u Yerusalem sarung Takụ onggotangu naung kụ puluang kuměndagẹ̌ dingangu puluang mẹ̌kal᷊iomaneng. I sire sarung měmanda si sie kụ seng nitěkạ i sire ringangu lụlungkang kere taumata lụlungkangu papateng anạ man sěmbaụ. I sire e sarung mahul᷊ungkang dingangu susa naung, mẹ̌sul᷊ungu taumata kụ seng kinailangengu anạ i akang.

¹¹Su ěllo ene e sarung piạ dal᷊ungkang maihạ su Yerusalem, mẹ̌sul᷊ungu ral᷊ungkang baugʼi Hadad-Rimon[16] su Wědạ u Megido.

¹²Mase apaʼm balagẹ̌ su wanua ene sarung mahul᷊ungkang lawọ i sire hala; balagẹ̌ hěnton Daud, balagẹ̌ hěnton Natan, balagẹ̌ hěnton Lewi, balagẹ̌ hěnton Simei, ringangu patikụ balagẹ̌ bal᷊ine e. Apaʼm balagẹ̌ e sarung mahul᷊ungkang pẹ̌sẹ̌sane, ringangu apang manga esẹ e wọu apaʼm balagẹ̌ e sarung mahul᷊ungkang hala nahae wọu apaʼm manga wawine e.”