Read Sangir ZAKHARIA 2 Bible Online

ZAKHARIA 2 - Sangir bible

ZAKHARIA 2

¹Su ral᷊ungu papasilo tuhụ e iạ e nakasilo sěngkatau esẹ kụ mělẹ̌hěgo tal᷊i kakěting.

²”Kai makoạ sarang a?” kakiwal᷊oku. ”Měngukurẹ̌ soang Yerusalem,” angkuěnge, ”iạ e lụěnningu masingkạ pira nandụ e ringangu wěnahu soa ene.”

³Bọu ene takụ ikasilo malạekatẹ̌ kụ seng nẹ̌bisara ringangku e, limempang sarang těngone, ringangu sěngkatau malạekatẹ̌ bal᷊ine e nakaěbạ.

⁴Malạekatẹ̌ humotonge nẹ̌bera su malạekatẹ̌ karuane, ”Dakọ e pakal᷊ighạ sarang anung kal᷊endesang ene, ringangu pẹ̌berako si sie u Yerusalem kai sarung tumanịu nasěsẹu taumata ringangu binatang hakịu tawe mariadi pěmětikang meselẹ̌ e mạngělikụ.

⁵MAWU e seng nẹ̌diandi u i Sie hala e sarung makoạ meselẹ̌ putung kụ mělikụ soa ene mědeạu měnirung dingangu i Sie sarung matanạ paị sene su ral᷊ungu patikụ kawasa ringangu kawawantugʼE.”

⁶MAWU e něhengetang su manga umatʼE, ”Iạ e seng napẹ̌sal᷊iawuhʼi kamene sarang patikụ pungu anging. Arawe orasẹ̌ ini ei taumata pinamembangeng, tal᷊angke wọu Babelẹ̌ dingangu pẹ̌sul᷊ẹ e sarang Yerusalem.

⁸I saing kụ něndokạ si kamene e něndokạ pẹ̌puso-Ku.” Tangú MAWU Kụ Limembong Kawasa[1] e něngoro si siạ pělẹ̌habaru tatanata ini su manga wansa kụ seng němul᷊aho su manga umatʼE,

⁹”MAWU e hala sarung dumokạ si kamene! Dingangu i kamene e sarung pul᷊ahoěngu nạung manga ěllangu e hala. Kereu hal᷊ẹ̌ ene e nariadi, i kamene sarung masingkạ u MAWU Kụ Limembong Kawasa e seng něngoro si siạ.”

¹⁰MAWU e něhengetang, ”Pẹ̌kantarị e ringangu ral᷊uasẹ̌ ei tumanạ u Yerusalem! Iạ e sarung matanạ sutal᷊oarang kamene!”

¹¹Su tempo ene mal᷊awọ bansa e sarung duměnta su anuʼm MAWU waugu makoạ umatʼE. I Sie sarung matanạ sutal᷊oarang kamene, dingangu i kamene e sarung masingkạ u MAWU e seng něndingọ u iạ e sarang anunu.

¹²Sěnsul᷊eko l᷊ai Yehuda e sarung makoạ tataghuanengu MAWU těntani e su ěntana-Ne kụ susi, ringangu Yerusalem sarung makoạ soa limembong ikěkěndagʼE.

¹³Karěmasẹ̌ i kamene kěbị su těngoʼm MAWU! Ual᷊ingu i Sie e seng nẹ̌buạ bọu tampạ u katatanakengʼE su sorga.