Read Sangir ZAKHARIA 3 Bible Online

ZAKHARIA 3 - Sangir bible

ZAKHARIA 3

¹ Su ral᷊ungu papasilo lai wal᷊inẹ e, MAWU e napasilo si siạ Imang Mawantugẹ̌ e i Yosua kạdarisị e su těngong malạekatʼu MAWU e. Su sěmběkan Yosua e rụdarisị Setang[2] kụ seng sadia waugu měnoke.

² Malạekatu MAWU[3] e nẹ̌bera su Setang, ”Mal᷊owọko MAWU e měhukung i kau ei Setang! Mal᷊owọko MAWU e kuměndagu Yerusalem měhukung i kau. Tau ini e al᷊ingkai kanutung kụ niwol᷊eng bọu rěllị u putung.”

³I Yosua rimarisị sene kụ něluheng pakeange makoto-kotorẹ̌.

⁴Tangú nẹ̌berạ e malạekatẹ̌ ene su manga tumatimbange su sorga, ”Demẹko pakeang kotorẹ̌ nạung niluhen tau ini e.” Dingangu si Yosua e i sie nẹ̌bera, ”Dosanu e seng takụ nirěmmẹ, i kau e sarung takụ onggotangu pakeang buhu.”

⁵I sie mal᷊aing nẹ̌parenta manga tumatimbange mědeạu pěnakẹ u[4] paporong burěsi su těmbọ i Yosua. I sire tụtuhụ dingangu wọu ene i sire e napěluheng pakeange wuhu ene si sie ringangu tẹ̌titikangu malạekatu MAWU.

⁶Bọu ene malạekatẹ̌ ene něhabaru waweraʼm MAWU si Yosua,

⁷”Kamagengu i kau tụtuhụbe manga toratẹ̌-Ku e ringangu mẹ̌kẹ̌koạbe manga hal᷊ẹ̌ kụ Takụ nionggọ si kamene, tangú sarang karěngụ e i kau wotonge makoạ pangahạ e su ral᷊ungu Wal᷊e-Ku ringangu měngurusẹ̌ manga rělahe. Iạ e sarung dumaringihẹ̌ kal᷊awọu kakal᷊iomanengu, kerẹewe Iạ dụdaringihẹ̌ manga kakal᷊iomanengu malạekatẹ̌ kụ ene su rěduhẹ̌-Ku.

⁸ Daringihẹ̌ko ei Imang Mawantugẹ̌ i Yosua, kerene lai i kamene manga imang kụ nakoạ manga ringange, i kamene kěbị e tatialang tempo ramahi kụ mapia e. Su tempo ene Iạ e sarung dumolohu ěllang-Ku kụ isẹ̌sěbạ, ”Itumbal᷊ẹ̌.”

⁹Takụ ipěllọ su těngon Yosua batu sěmbaụ nẹ̌buku pitu kụ sarung Takụ ketakeng dingangu wohẹ. Su ral᷊ungu sěhěllo e Takụ děmekang dosa e wọu wanua ene.

¹⁰ Kereu ěllo ene marěnta, apan taumata kụ měnotẹ̌ u lampunge mědeạu aparěnta kụ pẹ̌teěngu karal᷊enehẹ̌ dingangu kal᷊ahumpia sutal᷊oarang manga waelu anggorẹ̌ e ringangu manga kalung arang kamene.”