Read Sangir ZAKHARIA 6 Bible Online

ZAKHARIA 6 - Sangir bible

ZAKHARIA 6

¹Iạ e nakahombang papasilo wal᷊ine e. Sěnsul᷊e ini takụ kinasilo karetan sekẹ ěpạ u waụ siměbang bọu wěllạu wul᷊udu witụ darua e.

² Manga kareta ene e niwol᷊engu apang kawal᷊o pinẹ̌paparẹ̌, humotong kawal᷊o mahamụ, karuane kawal᷊o mitung,

³ katěllune kawal᷊o mawira ringangu kaěpạ e kawal᷊o kambal᷊ọ.

⁴Iạ nakiwal᷊o su malạekatẹ̌ ene, ”Tuang, apa mangal᷊ene manga karetan sekẹ ini?”

⁵ I sie simimbang, ”I sire e nẹ̌buạ nẹ̌timona ěpạ u kawunakeng sarětạeng bọu nẹ̌těngong MAWU kasěllahu sarul᷊uang.

⁶Karetan sekẹ kụ niwol᷊engu kawal᷊o mitung nẹ̌timona sarang Babel su sěmběkan sawěnahẹ̌ e. Kawal᷊o mawira mẹ̌tẹ̌timona sarang sěmběkaʼm bahẹ dingangu kawal᷊o kụ kambal᷊ọ e mẹ̌tẹ̌timona wanua su sěmběkan timuhẹ̌.”

⁷Piạ e kawal᷊o nạung kambal᷊ọ ene siměbang, i sire kakělaěng mamben tawe makasabarẹ̌ mědeạu tamai měmarikěsa wanua. Malạekatẹ̌ ene něbera, ”Dakọe pěmarikěsa wanua!” Tangu wọu ene tamaị e i sire.

⁸Bọu ene malạekatẹ̌ ene nẹ̌kui si siạ, ”Kawal᷊o kụ nakoạ sarang Babelẹ̌ e ene seng nakaputị dal᷊angehu MAWU e.”

⁹MAWU e nẹ̌gěllịu tatanata ini e si siạ.

¹⁰AngkuěngʼE, ”Pěngal᷊ạko sasěmba kụ nionggọ i Heldai, Tobia ringangu i Yedaya, kụ kai taumata apam buhu kawawal᷊ị bọu pinaměmbangeng su Babelẹ̌ e. Lighạko wawa sasěmban sire ene sorong bal᷊eng Yosia anạ i Zepanya.

¹¹Bọu wul᷊aeng dingangu sal᷊aka laonggọ i sire ene, pẹ̌koạko makotane sěmbaụ kụ takạko su těmbọ u Imang Mawantugẹ̌ i Yosua anạ i Yozadak.

¹² Paul᷊ịko si sie, u Iạ e MAWU Kụ Limembong Kawasa e nẹ̌bera, ’Taumata kụ isẹ̌sěbạ si Anu Tumbal᷊e, sarung makaual᷊i su tampạ suapang i sie ene sene dingangu i sie sarung měmětị kapia Wal᷊em MAWU.

¹³Seng i sie e sarung měmangung Bal᷊e-Ku ringangu měnarimạ u kal᷊aadatẹ̌ kere sěngkatau ratu, ringangu i sie sarung mẹ̌parenta kawanuane. Sěngkatau imang sarung dumingang si sie ringangu i sire e sarung mẹ̌sěngkapěhal᷊ẹ̌ dingangu maghaghighilẹ̌.’

¹⁴Makota ene niresọ su Wal᷊e-Ku waugu mẹ̌tahěndung si Heldai,[7] si Tobia, si Yedaya ringangu si Yosia.[8]

¹⁵Taumata e sarung duměnta wọu tampạ kụ marau ringangu mẹ̌tul᷊ung měmangung Bal᷊e-Ku. Kereu bangunang ene e masueng koạ e, i sire sarung masingkạ u Iạ e MAWU Kụ Limembong Kawasa e seng něndingọ i kau e su anun sire. Kěbị ene e sarung mariadi kereu i sire e kahěnga-hěngang tụtuhụ manga tita-Ku e, MAWU Ruatan sire.”