Read Sangir ZAKHARIA 7 Bible Online

ZAKHARIA 7 - Sangir bible

ZAKHARIA 7

¹Su tanggalẹ̌ ěpạ bul᷊ang u Kislew, kụ kai wul᷊ang kasione, su ral᷊ungu taung kaěpạ e pẹ̌paparentan Datu i Darius, MAWU e timanata lai si siạ.

²Tumanạ u Betel seng něndolohʼi Sarezer dingangi Regem-Melekh dingangu taumatan sire sarang Bal᷊eʼm MAWU Kụ Limembong Kawasa baugu mẹ̌dorong al᷊amatʼE.

³I sire mal᷊aing nirolohẹ̌ pinakiwal᷊o su manga imang dingangu manga nabi, kere ini, ”Bědangbe wotonge i kami dumal᷊umpasiangu kaghagholọ u Wal᷊eʼm MAWU ringangu mẹ̌puhědang apaʼm bul᷊ang kal᷊imane kere nạung seng kẹ̌koateng i kami ringangu taunge karěngụ e?”

⁴Seng ini e tatanatam MAWU kụ nahumpạ u anuku.

⁵AngkuěngʼE, ”Paul᷊ịko su patikụ tumanạ u wanua ini ringangu su manga imang, u pẹ̌papuhědang dingangu ral᷊umpasiang kụ kẹ̌koateng i sire e su wul᷊ang kal᷊imane ringangu kapitune karěngụ u pitum pul᷊o su taunge ini e wal᷊inewe laadatẹ̌ si Siạ.

⁶Kerene lai piạ i sire kimaěng dingangu něnginung, i sire e mẹ̌dẹ̌deạu mạpakạsaheng batangeng.”

⁷Seng ene e piněhengetangu MAWU wọu manga nabi su tempo nal᷊iu su tempong Yerusalem bědang pẹ̌tẹ̌tanakeng dingangu tumanạ e mal᷊unsemahẹ̌. Su tempo ene taumata e bal᷊inewe tumbạu mẹ̌tẹ̌tanạ su manga weọ e mạngělikụ soane kaiso su wahageang timuhẹ̌ dingangu su manga pentọ u wongkone su sěmběkaʼm bahẹ.

⁸MAWU Kụ Limembong Kawasa e něngonggọu tatanata ini e si siạ,

⁹”Dingangu taunge nal᷊iu Takụ nionggotangu manga parenta ini e su manga umatẹ̌-Ku, ’I kamene harusẹ̌ pẹ̌těngkaadilẹ̌, matal᷊ěntụ, naunge mapia su sěndinganengu.

¹⁰Kumbahang měnědạ taumata wal᷊u, manga rariọ kasisi ěndusẹ̌, taumata raghị kụ něngindunụ nẹ̌tanạ sutal᷊oarang kamene, arau walạewe i sai su ral᷊ungu kasasusa. Dingangu kumbahang lai mẹ̌karaking hal᷊ẹ̌ dal᷊akị baugu sěndinganengu.’

¹¹Kaiso umatẹ̌-Ku e makětị těmbọ e ringangu mambeng mạdiri rumararingihẹ̌; i sire mẹ̌něnsing tul᷊in sire e tadeạu tawe makaringihẹ̌.

¹²I sire e mẹ̌tẹ̌tungkětị u naung i sire e hakịu nakětị kere watu. Iạ nẹ̌pědu marasai ual᷊ingu i sire tawe tumuhụ kal᷊awọu těntiro kụ sen Takụ nionggọ si sire wọu manga nabi nạung kal᷊imona e.

¹³Iạ e tawe simimbahẹ̌ kakal᷊iomaneng i sire, ual᷊ingu i sire e mal᷊aing tawe rumararingihẹ̌ kereu Iạ e mẹ̌bisara.

¹⁴Mẹ̌sul᷊ungu rěllang maihạ, Iạ e něnapu si sire, hakịu i sire e nasihasa nẹ̌tanạ su manga wanua raghị. Ěntana matawa ini e seng narěmasẹ̌ tawẹ mẹ̌tatanạ e ringangu nahusụ.”