Read Sangir ZAKHARIA 8 Bible Online

ZAKHARIA 8 - Sangir bible

ZAKHARIA 8

¹MAWU Kụ Limembong Kawasa e něngonggọu tatanata ini e si siạ,

²”Iạ e mapulu-pulu mẹ̌tul᷊ungu Yerusalem batụu Iạ e makěnda-kěndagẹ̌ su tumanạ e, ringangu ual᷊ingu kakěndagẹ̌-Ku ene, naung-Ku e natětị su manga sědụ su soa ene.

³Iạ e sarung mẹ̌sul᷊e kapia sarang Yerusalem, soa-Ku kụ susi ene, ringangu mẹ̌tanạ sene. Yerusalem sarung ikakiral᷊a kere soa kụ satia, ringangu bukidʼu MAWU Kụ Limembong Kawasa e[9] sarung isěbạ Bukide Susi.

⁴Su wimbaengu soang Yerusalem, sarung saụ maiang manga opọ dingangu manga nenẹ kụ seng maghurang-gurang kụ dumal᷊eng seng harusẹ̌ mẹ̌pakẹ u těking.

⁵Apan dal᷊eng su soa sarung lai mapenẹu manga rariọ kụ měmpěnẹ̌nalang.

⁶Hal᷊ẹ̌ ene aramanung tawe mariadi su taumata kụ bědang biahẹ̌ bọu wansa ini, kaiso wal᷊inewe tawe mariadi si Siạ e.

⁷Iạ e sarung mapakasal᷊amatu umatẹ̌-Ku bọu manga wanua katatanakeng i sire e piněhengketang,

⁸dingangu nẹ̌bawa si sire kapia wọu sěmběkan daki ringangu sěmběkam bahẹ, hakịu i sire nẹ̌tanạ su Yerusalem kapia. I sire sarung makoạ umatẹ̌-Ku ringangu Iạ e Ruatan sire. Iạ e sarung mẹ̌parenta si sire ringangu satia ore lai adilẹ̌.”

⁹MAWU e něhengetang su manga umatʼE, ”Pakatoghasẹ̌ bue naungu! Orasẹ̌ ini i kamene e seng nakaringihẹ̌ manga wawera kụ seng niwerang manga nabi su tempong batu wawuku e seng nipěllọ, baugu měmangung kapia Wal᷊e-Ku.

¹⁰Kal᷊imonan tempo ene tawẹ u makaumal᷊ẹ̌ měnewa tenagan taumata arau binatang, dingangu tawẹ u reng makapěndang mal᷊enehẹ̌ bọu sasal᷊ukạ u sekẹ e. Iạ e seng napẹ̌tanggan sěmbaụ su wal᷊ine e.

¹¹Arawe ini e taumata kụ bědang biahẹ̌ e bọu wansa ini e Takụ nikoạ nipẹ̌tatěntang u nạung kal᷊imona e.

¹²I sire e sarung měnawuhu wine su pẹ̌darame. Manga kalung anggorʼi sire e sarung mẹ̌bua, ěntana e sarung mẹ̌gěllịu ghěsine, ringangu tahiti e sarung dumasehẹ̌ mahěmpal᷊iu. Kal᷊awọu al᷊amatẹ̌ ene Takụ nionggọ su taumata kụ bědang biahẹ̌ bọu wansa ini.

¹³Ei tumanạ u Yehuda ringangu Israel! Su tempo nal᷊iu, kereu tau raghị e kụ lawọ mẹ̌pẹ̌papangane, i sire e nẹ̌bera, ”Karimạko hombang kụ seng nawuạ su Yehuda ringangu Israelẹ̌ e mal᷊aing mihombang lai si kau!” Arawe Iạ e sarung měngambang si kamene, hakịu apan tau raghị ene sarung mahumbisara lawọ i sire, ’Karimạko al᷊amatẹ̌ kụ seng natěntung baugu Yehuda ringangu Israelẹ̌ e mal᷊aing matěntung su watangengu!’ Ual᷊ingu ene apakatoghasẹ̌ko naungu e ringangu kumbahang matakụ!”

¹⁴MAWU Kụ Limembong Kawasa e něhengetang, ”Piạ e manga i upung i kamene e napakariading Iạ e limangehẹ̌, Iạ e němutusu waugu měhukung i sire e pakatědụ. Iạ e tawe měmal᷊ui putusang-Ku ene, kaiso kawe mẹ̌koạ ene.

¹⁵Arawe orasẹ̌ ini Iạ e měngal᷊amatẹ̌ tumanạ u Yerusalem dingangu tumanạ u Yehuda. Kụ kumbahangbe matakụ.

¹⁶ Kai ini e tita kụ harusẹ̌ koateng i kamene: Kamagengu mẹ̌bisara, pẹ̌berangkong apa kahěngang su sěndinganengu. Pěngonggọkong putusangu pěngadilang kụ su kạadilẹ̌ e ringangu makawawa pẹ̌darame.

¹⁷Kumbahangbe mẹ̌karakin dal᷊akisẹ̌ e waugu sěndinganengu. Kumbahangbe mẹ̌salu konti. Iạ e mạběnsingu konti ringangu tawẹ kạadile ore lai kal᷊ahasa e.”

¹⁸MAWU Kụ Limembong Kawasa e timanata kere ini si siạ baugu umatʼE,

¹⁹”Pẹ̌papuhědang kụ ikẹ̌koạ su wul᷊ang kaěpạ e, kal᷊imane, kapitune, ringangu kapul᷊one sarung mariadi pěmamantugẹ̌ napenẹ u ral᷊uasẹ̌ dingangu ral᷊iagẹ̌ baugu tumanạ u Yehuda. Pẹ̌karalọkong katul᷊idẹ̌ dingangu pẹ̌darame!”

²⁰MAWU Kụ Limembong Kawasa e něhengetang, ”Tempone sarung marěnta, tumanạ u soa mal᷊awọ[10] e sarung makoạ sarang Yerusalem.

²¹Tumanạu soa sěmbaụ sarung mẹ̌bera su tumanạu soa wal᷊ine, ”Bọete i kitẹ e tamai měněmba MAWU Kụ Limembong Kawasa e ringangu mẹ̌dorong al᷊amatʼE. Tol᷊eko si kami!”

²²Mase mal᷊awọ taumata ringangu mal᷊awọ bansa kụ matoghasẹ̌ e ruměnta sarang Yerusalem baugu měněmba si Siạ MAWU Kụ Limembong Kawasa e ringangu kụkakindoạ u al᷊amatẹ̌-Ku.

²³Su ěllo tamai ene, i sire mapul᷊o tau raghị e sarung duměnta su anung sěngkatau tau Yahudi kụ nẹ̌bera, ’I kami e mapulu l᷊ai mẹ̌barauntu kere i kamene; u i kami e nakaringihẹ̌ u Ruata e něngal᷊amatẹ̌ si kamene.’ ” MAWU Kụ Limembong Kawasa e seng nẹ̌bisara.