Read Sangir ZAKHARIA 9 Bible Online

ZAKHARIA 9 - Sangir bible

ZAKHARIA 9

¹ Seng ini e tatanatang MAWU. I Sie seng němutusu měhukungu wanuang Hadrakh dingangu soang Damsyik. Bal᷊inewe kětạeng manga ghal᷊ipohong Israel, kaiso kawe lai niupunangu soang Siria e kai tataghuanengu MAWU.

²Hamat kụ mẹ̌sẹ̌sara ringangu Hadrakh mal᷊aing tataghuanengʼE, kerene lai manga soang Tirus dingangu Sidon dingangu kal᷊awọu kasasingkạ u tumanạ e.

³Tirus seng němětị manga těndạ baugu watangenge ringangu něngambung bul᷊aeng mal᷊awọ-l᷊awọ dingangu sal᷊aka hakịu nakoạ kere hal᷊ẹ̌ biasa mẹ̌sul᷊ungu ěnne ringangu lěbo su ral᷊eng.

⁴ Arawe MAWU sarung mapakariadin sie kasiang. Kal᷊awọu kakakalạ u soa ene sarung irěmmẹʼE su ral᷊ungu laudẹ̌ dingangu soa ene hala e sarung masue kanengangu putung.

⁵ Soang Askelon dingangu Gasa sarung makasilo ringangu měngkatakụ. Ekron sarung makasilo l᷊ai ringangu kailangengu kal᷊awọu apang lẹ̌antibange. Gasa sarung kailangengu ratune, dingangu Askelon sarung marěmasẹ̌ tawẹ taumatane.

⁶Asdod sarung pẹ̌tanakengu taumata wọu wansa kal᷊aukang. MAWU e něhengetang, ”Tau Pilistin kụ maobotẹ̌ ene e sarung Takụ ěnsueěng.

⁷I sire e semben tawe lai kuminạ gěsi kụ bědang piạ dahane arau kumaěng lai kaěng bal᷊ine kụ isẹ̌sěding. Kěbị taumata kụ nal᷊ěmbe e sarung makoạ umatẹ̌-Ku ringangu nikoạ kere wahageangu ghal᷊ipohong Yehuda. Ekron sarung makoạ dal᷊ohong umatẹ̌-Ku, kere tau Yebus[11] su tempo kal᷊imona.

⁸Iạ sarung měndiagạ ěntana-Ku ringangu měnahaghe manga wuntuangu tau raghị kụ lumiu e. Iạ selain tawe mapakawala apang měnanědạ e mẹ̌tahuěllangu umatẹ̌-Ku. U sigěsạ i sire e seng kinasilo-Ku.”

⁹ Ei tumanạ u Sion, pahul᷊uase! Ei tumanạu Yerusalem, pěmpahul᷊iage! Kakěllạe! Datunu e riměnta ringangu kal᷊auntu! I sie kai ratu adilẹ̌ kụ něbawa kasasal᷊amatẹ̌. Kaiso napenẹ u kasasanạu naung i sie nasongo simake kalide, sěmbaụ kalide kawuhuang.

¹⁰ MAWU e něhengetang, ”Manga karetan sekẹ e wọu Efraim sarung Takụ děmekang, kěbị kawal᷊o su Yerusalem sarung Takụ ipakailang kụ kal᷊awọu papitị e sarung gagholokang. Datunu e sarung měmohangu pẹ̌darame sutal᷊oarang manga wansa. Bọu laudẹ̌ sarang laudẹ̌ i sie sarung mẹ̌kawasa, wọu Sal᷊ụ u Efrat sarang pondol᷊u dunia.”

¹¹ MAWU e něhengetang su manga umatʼE, ”Ual᷊ingu pẹ̌dariandi kụ Takụ kinoạ dingang i kamene, pẹ̌dariandi kụ niaku ringangu rahang binatang sasěmba e, sarung Takụ ipakal᷊iwirẹ̌ kawanuanu kụ nal᷊ikibẹ̌ su ral᷊ungu pinamembangeng mẹ̌sul᷊ungu taumata kụ nakurung su ral᷊ungu sumu mamara.

¹²Pẹ̌sul᷊eko ei taumatang pinamembangeng, ini e i kamene seng mạnaghuang pělaharapẹ̌. Pẹ̌sul᷊ẹ e sarang tampạ pẹ̌sasirungangu, Iạ e sarung tatapẹ̌ měngal᷊amatẹ̌ si kamene. Daringihẹ̌ko: Dua sul᷊e mawalung i kamene e Takụ al᷊amateng ual᷊ingu kal᷊awọu likibẹ̌ nạung seng kinahombangeng i kamene.

¹³Yehuda e sarung Takụ paketang kere papitịu tahapẹ̌sekẹ, dingangu Israelẹ̌ e kere horoʼm papitị kụ seng sadia ěnakeng. Tumanạu Sion Takụ paketang kere peda; kụ dingangu peda ene e tau Yunani sarung Takụ aloěng.”

¹⁴MAWU e sarung mapakatodẹu watangenge su umatʼE, kere kilạ manga horoʼm papitị e ěnakengʼE. MAWU Limembong Karangetange sarung měniụ u slompretẹ̌ tatialang mẹ̌sekẹ mase tamai mẹ̌těngesẹ su ral᷊ungu rěllang bọu sěmběkan timuhẹ̌.

¹⁵UmatʼE nal᷊ahẹ u ghěllirangʼE pẹ̌kakěllungang, hakịu kal᷊awọu sědụ e ikawatạ i sire. Mẹ̌sul᷊ungu wansagu taumata niwukangu inumang, kerene wansagʼi sire su ral᷊ungu pẹ̌seketang. Al᷊ingkai rahang binatang kụ niwembang su wowom pananěmbaěng, kerene rahaʼn dokạ i sire e nẹ̌boso.

¹⁶Kereu ěllo ene e marěnta, MAWU e sarung mapakasal᷊amatẹ̌ umatʼE, mẹ̌sul᷊ungu lukadẹ̌ měngambang dombane wọu silakạ. I sire sarung humena su ěntanam MAWU, mẹ̌sul᷊ungu paramata makota kụ kụkerong.

¹⁷Apạ e kapia ěntanang MAWU e sarung, apạe kapia ringangu kal᷊ěnggihe! Sene anggorẹ̌ e ringangu gandung tumuwo masahawụ, makasombọ mangangudạ e mạhuntinambang katoghase.