Read Sangir MALEAKHI 1 Bible Online

MALEAKHI 1 - Sangir bible

MALEAKHI 1

¹Seng ini e papaul᷊ị u MAWU si Maleakhi e waugu umatu Israel.

² MAWU e něhengetang su umatʼE, ”Iạ kụkěndagi kamene.” Kaiso i sire simimbang, ”Kereapa MAWU e kiměndagi kami?” MAWU e simimbang, ”Kai wal᷊inewe tuhang i Yakub tangu i Esau e? Kai kawe i Yakub ikẹ̌kěndagẹ̌-Ku e,

³arawe i Esau kawe ikẹ̌kawěnsing-Ku. Banua piạ bul᷊ude i Esau e seng nasue Takụ nịgaghagholang, dingangu ěntanane Takụ nisarakang su manga binatang dul᷊u su wanua l᷊inggi.”

⁴Manga andene pal᷊ahiteng Esau e kụ kawe taumatang Edom ene e mẹ̌bera, ”Manga soang kami e seng nịgagholang, kaiso i kami e sarung měmangung kapia,” tangú MAWU e sarung sumimbang, ”I sire e wotonge wue měmangung kapia, kaiso Iạ e sarung mapakahakang ene. I sire e sarung isěbạ ’Banua duruhaka’ ringangu ’Wansa kụ kinahinoěngu ral᷊angehu, MAWU sarang marěngụ-děngụ.’ ”

⁵Tau Israel sarung makasilo hala, ringangu mẹ̌bera, ”Mambeng masěllahẹ̌ MAWU; kawasa-Ne sarang likudu ěntanang Israel!”

⁶MAWU Limembong Kawasa e něhengetang su manga imang, ”Sěngkatau anạ e mạngadatẹ̌ si amange, ringangu sěngkatau mẹ̌tatangkiange mạngadatẹ̌ mawune. Iạ ini e i Amangu; unụe i kamene tawe měngadatẹ̌ si Siạ? Iạ ini e těmbonangu; unụe i kamene tawe matatakụ si Siạ? I kamene mělẹ̌hinakang si Siạ, kaiso i kamene makịbal᷊o, ’Kai kereapa kakakoạ i kami něhinakang si Kau e tangú?’

⁷Něnarakangu wiahẹ̌ kụ hinon tawe wotonge i sarakang su wowom pananěmbaěng-Ku. Mase i kamene e nakiwal᷊o, ’Dingangu kereapa kakakoạ i kami e tawe mẹ̌papandung si Kau?’ Kụ kawe mapakasamedu tampạu pananěmbaěng-Ku.

⁸ Mạengu i kamene kawe měngonggọu binatang buta sasěmba si Siạ arau masakị arau binatang peosẹ̌, ute kai wal᷊inewe kakanoạ nẹ̌sal᷊a ene tangú? Kěnang pěngonggọu binatang kerene su guběrnurẹ̌! Apa i sie mal᷊uasẹ̌ dingangu mẹ̌koạbe mapia si kamene ngae?”

⁹Kụ ini e manga imang, kěnangko pẹ̌kahiorọ su Mawu Ruata tadeạu i Sie kuměndagʼi kitẹ. I Sie sarung tawe sumimbahẹ̌ kakal᷊iomanengu, dingangu ene e sal᷊anu hala.

¹⁰MAWU Limembong Kawasa e něhengetang, ”Něngalembong kapiane tukadu Wal᷊e-Ku e hěpingang, u sia-sia wue i kamene e maparěllịu putung su wowong pananěmbaěng-Ku. Iạ e mạdiring kamene, kụ mạdiri rumaẹ sasěmbang kamene.

¹¹Iạ e lẹ̌adatengu kal᷊awọu wansa su kasěllahu dunia. Baewe su tampạ sude buwụ e rẹ̌dikotang baugu ipěngadatẹ̌ areng-Ku ringangu gẹ̌gělikangu sasěmba mẹ̌tẹ̌tatal᷊ahino e watụ u patikụ bansa e mạngadatẹ̌ si Siạ!

¹²Arawe i kamene e mělẹ̌hinakang si Siạ, ual᷊ingu mạngiral᷊ingu pananěmbaěng-Ku e tawẹ arẹ̌gane, ringangu isẹ̌sěmba sene ute kai apạeweng biahẹ̌ kụ ipẹ̌tẹ̌tělling i kamene.

¹³Angkuěng i kamene, ’I kitẹ e seng nasaheng kěbị tamai ene’, dingangu i kamene e tawẹ pandungange si Siạ. I kamene nẹ̌bawa binatang tako, binatang kụ nipatene arau masakị baugu i sěmba si Siạ. I kamene mạngěnna u Iạ kai mapulu manarimạ u sasěmbang kamene ene?

¹⁴Kai wontogẹ̌ itahaakal᷊ẹ̌ kụ naněmbang binatang kụ tawẹ arẹ̌gane, kereu sutal᷊oarang binatange piạ binatang mapia kụ seng nikědone si Siạ! U kawe Iạ e Ratu Mawantugẹ̌, dingangu lẹ̌adatengu patikụ bansa.”