Read Sangir MALEAKHI 2 Bible Online

MALEAKHI 2 - Sangir bible

MALEAKHI 2

¹MAWU Limembong Kawasa e nẹ̌bera su manga imang, ”Seng ini e parenta-Ku si kamene:

²Pěngadatẹ̌ si Siạ dingangu kakanoạu. Kereu i kamene tawe mapulu rumaringihẹ̌ bawera-Ku, i kamene sarung Takụ aneěng. Patikụ apang itarimạ i kamene kere azeki sarung mẹ̌bal᷊ui makoạ laane. Mambeng kahěngang, u patikụ apang mapia e seng Takụ nianeěng ual᷊ingu i kamene e tawe něngarěgang tita-Ku.

³Manga anạ i kamene e sarung Takụ ihukung, dingangu ghahị i kamene e Takụ buhaěngu kotoru binatang kụ isẹ̌sěmbang kamene, kụ i kamene sarung suhudang sol᷊ong niěndukang u kotorẹ̌.

⁴ Tangú nakahěngangke i kamene u tita-Ku ini e sen Takụ nighěllị, tadeạu riandi-Ku ringangu manga imang pal᷊ahiten Lewi e tatapẹ̌be iral᷊eng.

⁵ Su ral᷊ungu pẹ̌dariandi ene, Iạ e nẹ̌kědong pẹ̌bawiahʼi sire e mal᷊enehẹ̌ dingangu mal᷊unsemahẹ̌, dingangu i sire Takụ oroěng pěngadatẹ̌ si Siạ. Su tempo ene i sire mambeng měngadatẹ̌ si Siạ dingangu mạtakụ u Iạ.

⁶I sire mạněntirong apang kụ sukatul᷊ide ringangu wal᷊inewe apang kụ nẹ̌sal᷊a. I sire e marěkạ si Siạ, mase ringangu katul᷊ide tụtol᷊e kapulu-Ku. I sire mal᷊aing nẹ̌tul᷊ung u taumata l᷊awọ mědeạu tawe saụ mẹ̌koạ apan dal᷊akisẹ̌ e.

⁷Mamben těngadẹ̌ kal᷊uandagu manga imang baugu maněntirong katěngade baugu Iạ e, MAWU Kụ Limembong Karangetange. Waugʼi sire e kawanuanu e harusẹ̌ makiwal᷊o kai apa kapulu-Ku, batụu i sire ene kai manga rarolohang-Ku.

⁸Arawe orasẹ̌ ini, i kamene manga imang, seng nělenga wọu ral᷊eng kahěngang. Kal᷊awọu těntironu e seng nakawunsal᷊u taumata l᷊awọ baugu mẹ̌koạ pẹ̌sasal᷊a. I kamene seng nakagholang pẹ̌dariandi Takụ nikoạ dingang i kamene.

⁹Tangú Iạ e mal᷊aing sarung mapakariading kamene tawe arẹ̌gaěngu kawanuang Israel ual᷊ingu i kamene tawe rumararingihẹ̌ kapulu-Ku, ringangu ual᷊ingu i kamene mapẹ̌dal᷊ahaedu taumata su tempong mạněntiro umatẹ̌-Ku.”

¹⁰Kai wal᷊inewe i kitẹ kěbị piạ i Amang i kitẹ mẹ̌sul᷊ung tangú? Kai wal᷊inewe i kitẹ kěbị e nirianding Mawung kitẹ mẹ̌sul᷊ung tangú? Mạeng kerene ute, unụe i kitẹ e ral᷊iu nělandang kire kụ ual᷊ingu kawe kerene ute limampawe riandi kinoạu Ruata su manga i upung i kitẹ e?

¹¹Umatu Yehuda e seng limampa pẹ̌dariandin Duata ringangʼi sire ringangu mẹ̌kẹ̌koạ mangạ e apa makạl᷊ahiasẹ̌ su Yerusalem dingangu su kasěllahu runia. I sire e seng nakal᷊amuhụ Bal᷊em MAWU makạl᷊ahimpulu si sie ringangu nẹ̌kawingu manga wawine kụ měmpạněmba manga mahang duatam bansa wal᷊ine.

¹²Mal᷊owọko taumata kụ měmpẹ̌kẹ̌koạ kerene ipakagheangu MAWU wọu umatu Israel. Mal᷊owọko i sire tawe lai tumol᷊e ringangu wansang kitẹ e měmpaněmbang manga gaghěllị su MAWU Limembong Kawasa.[1]

¹³Kụ ini e mal᷊aing kakanoạ u e sul᷊iung ene. Pananěmbaěng u MAWU e pinakanantạ i kamene ringangu ěllom mata; i kamene nahunsangị dingangu ghimunggui ual᷊ingu MAWU e sen tawe lai mapulu rumaẹ manga gaghěllị i kamene.

¹⁴I kamene nakiwal᷊o u unụe i Sie mạdiri rumaẹ u ene. Ual᷊ingu ene MAWU e masingkạ u i kamene tawẹ satiane su manga wawine pinẹ̌kawingang i kamene su tempong i kamene reng mangudạ e. Bawine ěndaị ene e kai hapị u su pẹ̌bawiahu, kaiso i kamene kawe nẹ̌tul᷊an sie, manimbe i kamene seng nẹ̌diandi su těngon Duata u tatapẹ̌ mẹ̌těngkasatia si Sie.

¹⁵Bal᷊inewe Ruata Mang Sěmbaụ e něndiadi si kamene wadang sěmbaụ dingangu diwa sěmbaụ dingangu wawine ěndaị ene.[2] Kai apạ e timonang MAWU su hal᷊ẹ̌ ene? Tawẹ bal᷊ine tadeạu i kamene e makareạbe manga rariọ kụ makoạ umatʼu Ruata e tutune. Kụ pěndiagạbe watangengu, kumbahangbe sarang piạ su tal᷊oarang kamene kụ tawẹ satiane su kawinge.

¹⁶”Iạ e mạtakehu pẹ̌tatal᷊ei,” Angkuěngu MAWU Ruatang Israel. ”Iạ e mạběnsing kereu piạ u sěngkatau wọʼi kamene kụ mẹ̌koạ kerene katingkaị e miěbạ kawinge. Tangu riagate wue watangengu e ringangu kumbahang-bahang mẹ̌tul᷊ung kawingu e.”

¹⁷Bisarang kamene e seng nakasahe Mawu Ruata. Kaiso i kamene nakiwal᷊o, ”Kereapa wue i kami nakasahe MAWU e tangú?” Dingangu mẹ̌bera, ”Kal᷊awọu taumata kụ mẹ̌koạ dal᷊akisẹ̌ e irẹ̌dekeng mapia kahiang MAWU, ringangu i Sie nẹ̌tatal᷊ahino si sire.” Arau reng makiwal᷊o, ”Kai suapa Ruata kụ niěnna u kawe adilẹ̌ ene?”