Read Sangir MALEAKHI 3 Bible Online

MALEAKHI 3 - Sangir bible

MALEAKHI 3

¹ Sasimbahu MAWU Limembong Kawasa e, ”Iạ e sarung měndingọ u rarolohang-Ku waugu měndiahing daral᷊engang-Ku. Tangú sěngkělěndịu Iạ e, MAWU kụ dẹ̌deakeng i kamene, sarung duměnta su Wal᷊e-Ku. Darolohang-Ku kụ ikẹ̌karalọ i kamene e sarung duměnta ringangu mapakasingkạ u pẹ̌dariandi-Ku.”

² Kaiso i saing makakědang su ěllong darěntang MAWU e ringangu mẹ̌těngkal᷊ahẹ u watangengʼE? U i Sie kai mẹ̌sul᷊ungu putung tahasěbu uase, ringangu mẹ̌sul᷊ungu saboěngu tahaunsạ.

³I Sie riměnta waugu měhukung, kere taumata kụ měmurẹ̌si ringangu mapakasahị u sal᷊aka. Kere sěngkatau kipung kụ mapakasahị u wul᷊aeng dingangu sal᷊aka, kerene wue rarolohangu MAWU sarung mapakasahị u manga imang tadeạu i sire měněmbang manga gaghěllị su ral᷊enge kere ikẹ̌kapulung MAWU e.

⁴Tangú kerẹewe nạung su tempo nạung kal᷊imona e, MAWU e sarung lẹ̌lahimpuluangu manga sasěmba kụ isẹ̌sěmba si Sie kahiang umatʼu Yehuda ringangu Yerusalem.

⁵Angkuěngu MAWU Limembong Kawasa, ”Iạ e sarung duměnta su anunu waugu měhukung. Iạ e sarung tạ kararěngụ e makoạ sahidi waugu manga tahatariang, taumata apang tahapẹ̌sundal᷊ẹ̌, apang mẹ̌sẹ̌sahidi konti, apang tawẹ katul᷊ide měngonggọ tatendenge su taumata apang bẹ̌baehang, apang měmpạngěpisẹ̌ taumata wal᷊u, manga rariọ kasisi, dingangu taumata raghị, miěbạ kal᷊awọu taumata kụ tawe měngangadatẹ̌ si Siạ.”

⁶”Iạ e kai MAWU, ringangu Iạ e tawe nẹ̌bẹ̌bal᷊ui. Ual᷊ingu ene i kamene, pal᷊ahiten Yakub e, tawe ipakawinasa.

⁷Kere manga i upungu nạung kal᷊imona, i kamene kěbị e nělenga wọu kal᷊awọu tita-Ku kụ seng tawẹ satiane měndal᷊engu ene. Pẹ̌sul᷊ẹ e sol᷊ong anu-Ku, tangú Iạ e mal᷊aing sarung mẹ̌sul᷊e su anunu. Kaiso i kamene nakiwal᷊o, ’Kai apạ e hinong koateng i kami e mědeạu mẹ̌sul᷊e su anu-Nu?’

⁸Ini e Iạ makiwal᷊o si kau: Botonge taumata měngakal᷊ẹ̌ Mawu? Mamben tawe wotonge. Kaiso i kamene něngakal᷊ẹ̌ si Siạ l᷊ai. I kamene nakiwal᷊o, ’Kereapa?’ Sasimbang-Ku: Su ral᷊ungu hal᷊ẹ̌ u měmaehẹ̌ pẹ̌sěngkatahạpul᷊o ringangu mẹ̌gěllịu sasěmba.

⁹Patikụ bansa e měngakal᷊ẹ̌ si Siạ, tangu i kamene kěbị e katuhungangu laane.

¹⁰ Bawạ e kěbị sěngkatahạpul᷊onu e sol᷊ong Bal᷊e-Ku tadeạu piạ laidopẹ̌ mạhěmpal᷊iu sene. Banikateko Iạ e tangú i kamene e sarung makasilo u, Iạ nanope manga tukadu sorga ringangu mapẹ̌dal᷊embong kamene ringangu kal᷊awọu apang mapia.

¹¹Iạ e sarung tawe mapakawalang binatang su sahomang e něnggolọ gěsing ěntana e; manga kalung anggoru e sarung mapenẹ u wuane.

¹²Tangú i kamene sarung iwera u mal᷊unsemahẹ̌ kahiang patikụ bansa, u wanuanu e makoạ tampạ mapia mědeạu pẹ̌tanakeng.”

¹³MAWU e něhengetang, ”Kal᷊awọu waweranu e mambeng makasamedẹ̌ si Siạ.” ”Kaiso i kamene nakiwal᷊o, ’Kai a niwerang kami mạanung Kau e tangú?’

¹⁴I kamene nẹ̌bera, ’Tawẹ kěhase mẹ̌kal᷊iomaneng su Mawu Ruata. Kai a gunane mẹ̌koạ munarang kitẹ baugu MAWU Limembong Kawasa e arau manodẹ si Sie u i kitẹ e nẹ̌sasěsilu pẹ̌sasal᷊ang kitẹ e?

¹⁵I kitẹ e makạsilo hala u taumata mal᷊aobotẹ̌ e makariangkamang. Taumata ral᷊akisẹ̌ e bal᷊inewe kětạeng nahuntinambang kasorogạ e, kaiso kamagengu i sire měmanikạ kasasabaru Mawu Ruata e kụ mẹ̌koạ dal᷊akisẹ̌, i sire mal᷊aing mal᷊iwirẹ̌.’ ”

¹⁶Tangú taumata kụ mạtakụ su MAWU e mạhumbisara sěmbaụ dingangu wal᷊ine. MAWU e rụdaringihẹ̌ dingangu tụtatingang apang kụ iwẹ̌beran sire. Taumata kụ apang mẹ̌ngadatẹ̌ si Sie ringangu mạtakụ i Sie iwohẹ arenge su ral᷊ungu bukẹ̌ u pamamohekang su těngonʼE.

¹⁷MAWU Limembong Kawasa e něhengetang, ”I sire sarung makoạ umatẹ̌-Ku, su ěllong Iạ kumanoạ, i sire sarung makoạ tataghuaneng lẹ̌lawokang-Ku. Iạ e sarung kuměndagʼi sire, kere sěngkatau i amang kụkěndagu anạ e kụ mẹ̌sẹ̌samal᷊ẹ si sie.

¹⁸Umatẹ̌-Ku e sarung makasilo l᷊ai pẹ̌dal᷊ahaedangu pal᷊edu wiahu taumata mapia ringangu taumata ral᷊akisẹ̌ e, sutal᷊oarang taumata kụ mẹ̌sẹ̌samal᷊ẹ si Siạ dingangu apan tala e.”