Read Sangir MATIUS 1 Bible Online

MATIUS 1 - Sangir bible

MATIUS 1

¹Ini e kai rol᷊ẹ̌ u manga i upung gaghurangu Mawu Yesus Kristus, hěnton Daud, hěntong Abraham. Bọʼi Abraham sarang i Daud, manga areng i upungu Mawu Yesus kai kere ini:

²Abraham, Ishak, Yakub, Yehuda ringangu manga anạ u sěmbaụe, i Peres dingang i Zerah (i ninang i sire isẹ̌sẹ̌ba si Tamar), Hezron, Ram, Aminadab, Nahason, Salmon, Boas (i ninange i Rahab), Obed (i ninange i Rutẹ̌), Isai, dingangu Ratu i Daud.

⁶ Bọu i Daud sarang tempone tau Israel niwembang sarang Babel, mạbawohẹ manga areng ini: Salomo (i ninange kai wal᷊ung Uria), Rehabeam, Abia, Asa, Yosafat, Yoram, Uzia, Yotam, Ahas, Hizkia, Manasye, Amon, Yosia, Yekhonya dingangu manga anạ u sěngkataune.

¹²Bọu tempon tau Israel niwembang su Babel sarạeng kawawantelʼu Mawu Yesus mạbawohẹ manga areng ini: Yekhonya, Sealtiel, Zerubabel, Abihud, Elyakim, Azur, Zadok, Akhim, Eliud, Eleazar, Matan, Yakub, Yusup kawing i Maria. Kụ bọu i Maria ene nawantelʼe Mawu Yesus kụ isẹ̌sẹ̌bạ si Kristus.

¹⁷Kụ bọu i Abraham sarang i Daud kal᷊awọe mapul᷊o — ěpạ su hawenge. Bọu i Daud sarang tau Israel niwembang su Babel ute mal᷊aing mapul᷊o — ěpạ su hawenge. Bọu tempon tau Israel niwembang su Babel sarang kal᷊aiwantelʼu Mawu Yesus Kristus mal᷊aing mapul᷊o — ěpạ su hawenge.

¹⁸ Kere ini wẹ̌keng kal᷊aiwantelʼu Mawu Yesus Kristus. I ninange i Maria e měkẹ̌kakaghiang dingang i Yusup. Arawe i rẹ̌dua reng tawe někẹ̌kawing, kutẹu nạung i Maria kai seng piạ kapapia. I Yusup bẹ̌daweng bẹ̌ga u kapapia ene kai ual᷊ingu kawasang Rohkẹ̌ u Ruata.

¹⁹I Yusup kaghiange ene kai sěngkatau masatia tutuhụ titang agama. Kutẹu i sie měkẹ̌karaki maměsụ pẹ̌kakaghiange su kapapěnisẹ̌, tadeạu i Maria tawe mamea su těngong l᷊awọ.

²⁰Tangu piạ e i Yusup mělẹ̌hingidẹ̌ hal᷊ẹ̌ ene, i sie nipi. Su ral᷊ungu ipine ene, i sie nakasilo sěngkatau malạekatʼu Mawu kụ nẹ̌berạe si sie, ”Yusup, hěnton Daud, abe katakụ mẹ̌kawing i Maria; batụ u anạ kụ su ral᷊ungu gandongange kai pinẹ̌pohiama ual᷊ingu kawasang Rohkẹ̌ u Ruata.

²¹ I Maria sarung maiwantelʼu sěngkatau ahusẹ̌ esẹ. Dariọ ene mambeng sěbạu arenge i Yesus, u kai i Sie sarung mangambang umatʼE wọu rosan sire.”

²²Patikụ ene nariadi kerene, tadeạu misěhụ apan nihengetangu Mawu limiu nabinʼE, angkuěng,

²³ ”Sěngkatau mahuala sahị sarung piạ kapapia ringangu maiwantelʼu sěngkatau ahusẹ̌ esẹ. Ahusẹ̌ ene sarung isẹ̌ba Imanuel.” (Imanuel su werang Ibrani mangal᷊ene ute, ”Mawu Ruata e ene ringang i kitẹ”.)

²⁴Sarạeng i Yusup napukọe, i sie nẹ̌koạe kěbị apan niwerang malạekatʼu Mawu e si sie. I sie nẹ̌kawing dingangʼi Maria.

²⁵ Kụ karěngụewen i Maria reng tawe nạmantelʼu ahusẹ̌ ene, i rẹ̌dua e reng tawe nẹ̌tẹ̌tatamba nakoạ gẹ̌si sěmbaụ. Kụ sarạeng ahusẹ̌ ene nawantelẹ̌. I Sie nisẹ̌bạ i Yusup si Yesus.