Read Sangir MATIUS 10 Bible Online

MATIUS 10 - Sangir bible

MATIUS 10

¹Mawu Yesus kimui si sire muritʼE mapul᷊o dua su kataune pinẹ̌komolẹ̌, kụ nẹ̌gěllị u kawasa si sire apěnokol᷊ʼu manga rohkẹ̌ dal᷊aị dingangu mapạkapian kal᷊awọu haghin sakị dingangu tědụ u wadang.

²I sire ene ute kai: humotong, i Simon (isẹ̌sẹ̌bạ lai si Petrus) dingangu tuarine i Andreas, mase i Yakobus dingangu tuarine i Yohanes, manga anạ i Zebedeus.

³Bọu e i Filipus dingang i Bartolomeus, i Tomas dingang i Matius maghaghělle bea ringangkewen Yakobus anạ i Alfeus, dingang i Tadeus;

⁴mase pěngěnsueěnge i Simon, i Anu Wahani ringang i Yudas Iskariot, i anu nẹ̌tul᷊ạen Mawu Yesus.

⁵I sire mapul᷊o dua ene nirolohʼi Yesus ringangu nitumbal᷊ungang u, ”Kumbahang měmpahundal᷊eng makahumpạ u wanuam bal᷊ine tau Yahudi. Dingangu abe lai kakoạ sarang soan tau Samaria.

⁶Kaiso kahumotongange kakoạko sarang anun tau Israel apan něngkailang.

⁷ Pẹ̌habarẹ̌ko si sire u Ruata e sarung mal᷊ighạ mẹ̌parenta kere sěngkatau Ratu.

⁸Pakapiangkon masasakị; Pamiahẹ̌ko apan nate; pakaul᷊ekong apang piạ sakịe su pisị makạtatakụ, dingangu pěnokol᷊ẹ̌kon manga rohkẹ̌ daral᷊aị. I kamene seng něnarimạu kěbị ene tawẹ bawaehe, kụ pěmpěgěllịko l᷊ai tawẹ bawaehe.

⁹Abe pěmpẹ̌bawa roitẹ̌ bul᷊aeng, roitẹ̌ sal᷊aka arau lai roitẹ̌ tambaga.

¹⁰ Abeko l᷊ai pěmpẹ̌bawa kawihʼu roitẹ̌ arau l᷊ahaweng u rarua waugʼu raral᷊engu, arau sapatu, arau těking. U i sai měkẹ̌karadiahange ute hinone wue makahombang laidope.

¹¹Kereu i kamene makahumpạen soa arau kampong sude, ute pěmpẹ̌deạbe si sai mapulu manarimạ i kamene. Kěngkatanạbe ringange sarạeweng i kamene měmpahundal᷊eng kạpia wọu ene.

¹²Kereu i kamene kạdangenge su wal᷊e ute, pẹ̌berako, ’Karimạko Mawu e měngal᷊amatẹ̌ si kamene.’

¹³Kamageng taumata su wal᷊e ene manarimạ u ene, ute pěngangadatʼu e remben marěpang si sire. Kai kereu i sire tawe manarimạ i kamene ute kaul᷊e e kapia pangangadatʼu e.

¹⁴ Kereu piạ bal᷊e arau soa tawe manarimạ i kamene arau tawẹu rumaringihẹ̌ si kamene, ute pahuntěntangkeng kamene tampạ ene ringangu tontongke awul᷊ẹ̌ bọu pal᷊edʼu laedu.

¹⁵ Tahěndungeko u, su Ěllong Kiamatẹ̌, Duata e mạhaěngangbe mangonggọu ampung su taumatan soan Sodom dingangu Gomora e sul᷊ungken taumatan soa ene!”

¹⁶ ”Pẹ̌daringihẹ̌ko: Iạ e měndolohʼi kamene kere domba su tal᷊oaran dal᷊ugẹ̌ marangěngisẹ̌. Kụ pakapapentesẹ̌ko i kamene kere těmpu ringangu pakatatul᷊idẹ̌ naung, i kamene kere paluma.

¹⁷ Pakaral᷊ěndị bue, batụ u i kamene sarung samekang kụ ipẹ̌těngo manga mělahukung. U i kamene sarung ipakasịgěsạ su kanisan sire.

¹⁸I kamene sarung isarakang su těngom mangangawasa ringangu manga ratu ual᷊ingu i kamene kawe tumatol᷊e Siạ. Kụ seng tempone si kamene waụgʼu měmpẹ̌sahiding Iạ si sire ringangu su taumata apạewem bẹ̌gan Duata.

¹⁹Arawe kamagengu i kamene kawe i sarakang su mělahukung ute, abe ghěnggangu apa hinong i werang kamene, arau kereapa i kamene hinong mẹ̌bisara. U apa hinong i werang kamene ene, sarung ihabarẹ̌ si kamene su tempone.

²⁰U měbẹ̌bisara su tempo ene e wal᷊inewe i kamene, kaiso kawe Rohkẹ̌ i Amang su Sorga e su ral᷊ung i kamene.

²¹ Sarung mariadi u taumata e sarung manarakangu anạ u sěmbaụe sẹ̌sane mědeạu ipakapate. Dingangu ene lai sarung mariadi sutal᷊oarang amange ringangu anạe. Manga anạ sarung dumokạ si ninange ringangu si amange ku manarakang i sire mědeạu pakipate.

²² I kamene sarung ipẹ̌binsị u kěbị ual᷊ingu i kamene kawe tumatol᷊e-Ku. Arawe i sai makakẹ̌dang sarang pangěnsueěnge, sarung masal᷊amatẹ̌.

²³Kereu i kamene sẹ̌sahusuang su soa sěmbaụ, ute pahuntal᷊ang sol᷊ong soa sěmbaụ. Iạ maul᷊ị si kamene: U mambeng kahěngang těntal᷊ang i kamene reng ta nakạsuen pěpide kal᷊awọu soang Israelẹ̌ e, Ahusʼu Taumata e seng diměnta.

²⁴ Muritẹ̌ e wal᷊inewe limembong gẹ̌guwạ bọu mananěntirone, ringangu ěllange wal᷊inewe limembong kasěllahẹ̌ wọu mawune.

²⁵ Seng kapapiane kereu sěngkatau muritẹ̌ mariadi kere mananěntirone, ringangu sěngkatau ěllange kere mawune. Kereu matimadʼu wal᷊e seng nisěbạ si Beelzebul ute, rumakeleng kawe ral᷊ohom bal᷊ene. I sire sarung kaghělirangu areng limembong karal᷊akise!”

²⁶ ”Abe kěngkatakụ u taumata. U tawẹu kạl᷊ahěmbung kụ tawe ikasilo, dingangu tawẹu kạbawuni kụ tawe kasingkateng.

²⁷Apạeweng takụ nipaul᷊ị si kamene su marěndung, ul᷊ịko su matualagẹ̌. Dingangu apạeweng nịsasiang su tul᷊ing kamene ute wohangko pakal᷊ikụ!

²⁸Abe kěngkatakụ i sire apam měmpamate wadang, kai tawẹ kawasa měmpamate himukudẹ̌ e. Kai kěngkatakụben Mawu Ruata kụ kai makạbinasa himukudẹ̌ ringangkewelaing badange su naraka.

²⁹Hěnggeng duambaụ botonge kawěliangu roitẹ̌ sěngkal᷊ẹ̌pa kakạdodokange. Maning kerene kai tawẹu sarang sěmbaụ manawo su ěntana su l᷊ikudʼu kasingkạ i Amang i kamene.

³⁰Kakěpal᷊u utạ su těmbọ u seng nirekenang kěbị.

³¹Batụ u ene, abe kěngkatakụ! I kamene limembowe maarẹ̌ga wọu manga hěnggeng!”

³²”Tangu i saịewen mangakung Iạ su těngon taumata e, sarul᷊aing takụ iaku su těngong Amang-Ku su Sorga e.

³³ Arawe i saing kawe mẹ̌sunial᷊ẹ̌ su těngong lawọe, Iạ e lai sarung mẹ̌sunial᷊ʼi sie su těngong Amang-Ku su Sorga.”

³⁴”Abe pěmpangiral᷊ingu Iạ e kawe ruměntam pẹ̌darame su dunia ini. Iạ e wal᷊inewe riměntam pẹ̌darame, kaiso kai pẹ̌darokạ.

³⁵ Iạ e riměnta mapẹ̌daral᷊aị anạu esẹ dẹ̌duang amange, anạ bawine rẹ̌duan ninange, ringangu anạ mirarating bawine e rẹ̌duan ninange kinaratingang.

³⁶Ore, kụ sarung mariadi sědụ kạguwakenge, ute kai ral᷊ohong bal᷊ene sẹ̌sane.

³⁷I saing kụkěndagʼi amange arau i ninange limembo wọu Iạ e, tawe hinone makoạ muritẹ̌-Ku. Kerene lai isaing kụkěndagu anạe esẹ arau anạe wawine limembo wọu Iạ e.

³⁸ Dingangu i sain tawe mapulu mamasaěng kuruisẹ̌ e ringangu tumol᷊e si Siạ, ute tawe hinone makoạ muritẹ̌-Ku.

³⁹ I sai mẹ̌tẹ̌tatahangu pẹ̌bawiahẹ̌ sarung kailangeng pẹ̌bawiahe, arawe i sai mẹ̌tẹ̌tatahangu pẹ̌bawiahẹ̌ e ual᷊ingu satiane si Siạ, e ute, sarungbe makahombang pẹ̌bawiahẹ̌.”

⁴⁰ ”I sai manarimạ i kamene ute, manarimạu Iạ. Dingangu i sai manarimạu Iạ e ute manarimạ i Sie něndolohʼu Iạ e.

⁴¹I saim manarimạu nabi, ual᷊ingu i sie kai nabi ute, sarung manarimạ bawal᷊ise waugʼu sěngkatau nabi. Dingangu i sai manarimạu sěngkatau mapia ual᷊ingu i sie mapia ute, sarung manarimạ bawal᷊ise waugʼu sěngkatau mapia.

⁴²I sai mapěnginungu sěngkatau wọu tal᷊oaran sire kasiang ini e manịeng tumbạ u akẹ lěnding ual᷊ingu i sie kawe muritẹ̌-Ku ute, pěmpangimangke u i sie mambeng těngadẹ̌ sarung manarimạ bawal᷊ise!”