Read Sangir MATIUS 11 Bible Online

MATIUS 11 - Sangir bible

MATIUS 11

¹Sarạeng i Yesus bọuten nangonggọu manga těntironʼE kerene su muritʼE mapul᷊o dua e, i Sie naněntangken tampạ ene. I Sie tamai maněntiro ringangu mangeken hengetangʼu Ruata su manga soa mararanine.

²I Yohanes Mananahani nạung kạtatahungkụe kai nakaringihẹ̌ kakakoạu munarang Kristus. Bọu e i sie něndolohʼu tumatol᷊ene pirang katau apakạkoạ sarang anung Yesus pakịbal᷊o, angkuěng,

³”I Tuang ngae sarung duměnta kere su kědom Mawu Ruata, arau i kami kai mangampal᷊ẹ̌ taumata wal᷊ine?”

⁴Mawu Yesus simimbang, ”Pěmpẹ̌bal᷊ịe kụ paul᷊ị si Yohanes apang kinaringihẹ̌ dingangu kinasilong kamene:

⁵ Tau wuta nakasilo, tau peosẹ̌ nakaral᷊eng, taumata piạ sakịe su pisị makạtatakụe[9] nul᷊e; tau wengelẹ̌ nakaringihẹ̌, taumata nate e nẹ̌biahẹ̌ kapia, ringangu Injilẹ̌ e nihabarẹ̌ bue su taumata kasiang.

⁶Kariangkamang kụ i sain tawẹ banggilu mẹ̌binsị u Iạ e!”

⁷Samurin manga rarolohang i Yohanes ene naral᷊eng, tangu Mawu Yesus nanětạe něhengetang su taumata l᷊awọ mạanung Yohanes, angkuěngʼE, ”I kamene něngkakoạ sol᷊ong banua l᷊inggi e kai nẹ̌kakěllạe apa? Děmpugẹ̌ tẹ̌tiukangu anging?

⁸Kai a tamai nịkakěllaěng i kamene? Arau kai sěngkatau mẹ̌pẹ̌pakeang mal᷊ěnggihẹ̌ ngae? Taumata apam mẹ̌pẹ̌pakeang kerene ute kai mětẹ̌tanạ su wal᷊em mararatu.

⁹Unụe wue i kamene makoạ sol᷊ong banua l᷊inggi? Měmanda sěngkatau nabi tangu? Kahěngang bue, luhudʼu něngalembo l᷊ai wọu sěngkatau nabi.

¹⁰ Batụ u kai i Yohanes ene ilẹ̌habarʼu Winohẹ Susi ini, ’Ini e kai rarolohangku, angkuěngu Mawu Ruata, Iạ dimolohʼi sie pěngal᷊imona wọʼi kamene tadeạu i sie mamuka ral᷊eng baugʼi kamene.’

¹¹Pẹ̌tahěndung! Su dunia ini tawẹ taumata limembo wọʼi Yohanes Mananahani. Maning kerene, i saing kakạdodokange su tal᷊oarang kawanuan Duata e limembowen gẹ̌guwạ wọʼi Yohanes.

¹² Dokeng bọʼi Yohanes mạngekeng habarẹ̌ sarangkeng orasẹ̌ ini e, kawanuan Duata e rẹ̌dokatengu taumata apam měngkai mạngal᷊ạ kawasa e ringangu wuntal᷊ẹ̌.

¹³Sarang darěntang Yohanes, kal᷊awọu titan Musa ringangu těntiron manga nabi e měnẹ̌něbal᷊ʼu apang hinom mariadi.

¹⁴ Kụ kereu i kamene měmpangimang bue ute, i Yohanes ene kai i Elia, kụ darěntane seng nitěbal᷊ẹ̌.

¹⁵I sain piạ tul᷊ine ute pẹ̌daringihẹ̌!

¹⁶Takụ isihing suapa tangu taumatang orasẹ̌ ini e? I sire kai kere manga rariọ mạhungkaiang su pasarẹ̌. Sěnggal᷊ipoho e měmpẹ̌kẹ̌kui si sire wal᷊ine,

¹⁷’I kami mẹ̌kantarị u kakantarị makal᷊uasẹ̌ si kamene, kaiso i kamene mang tawẹu měmpẹ̌sal᷊ai! I kami e mẹ̌kantarịeweng kantarị u pěhampugang kaiso i kamene mang tawẹu mahunsangị!’

¹⁸I Yohanes e riměnta — i sie nẹ̌puasa ringangu tawe nanginung anggorẹ̌; kụ taumata e němpẹ̌bera, ’I sie kai nikasetangeng!’

¹⁹Ěndaị Ahusʼu Taumata e riměnta — i Sie kimaěng dingangu něnginung; mase taumata e němpẹ̌bera, ’Kakělla tau ěndaị! Kombangeng, tahawukaneng, hapịu maghaghělle bea ringangu taumata warạdosa.’ Maning kerene, kai katatahuěnnan Duata e limětạ bue wọu kal᷊awọu ual᷊ine.”

²⁰Bọu e Mawu Yesus nanětạe naněngkul᷊ẹ̌ kal᷊awọu soa, suapang i Sie kasauange mẹ̌koạ tanda makal᷊aherang. Batụ u taumata suapan soa ene tawe mapulu mẹ̌tobatẹ̌ bọu rosan sire.

²¹ ”Kạěngkěhang i kamene Korazim! Dingangu kaěngkěhang lai i kamene, Betsaida! U kamagengu kal᷊awọu tanda makạl᷊aherang nikoạe seng nariadi sutal᷊oarang kamene su Tirus dingangu Sidon, ute angkeěnge taumata apan sene sembem marěngụ němpẹ̌tobatẹ̌ bọu kal᷊awọu rosan sire ringangu němpẹ̌lutu mase němpanawuhʼu awu su těmbọ i sire.

²²Pẹ̌tahěndung, u su Ěllong Kiamatẹ̌, taumatan Tirus dingangu Sidon e limembowen kal᷊owọe ampungang u Ruata wọu i kamene!

²³ Ringangu i kamene Kapernaum! I hengkẹ sarang sorga ngae i kamene? Tala wue! Buạ i kamene ute sarung iwahung su naraka! U kawe mangạewe kal᷊awọu tanda makạl᷊aherange nikoạ sutal᷊oarang kamene e seng nikoạ l᷊ai su Sodom, ute Sodom e wẹ̌dangbe lai ene orasẹ̌ ini!

²⁴ Pẹ̌tahěndung! U su Ěllong Kiamatẹ̌ e tau Sodom sarungbe limembong kal᷊owọe ampungang u Ruata e wọu i kamene!”

²⁵Su tempo ene Mawu Yesus někal᷊iomaneng, ”O i Amang, Mawu mẹ̌ngẹ̌ngawasa l᷊angị ringangu dunia! Iạ makitarimakasẹ si Kau, u kěbị ini e kinal᷊irungu wọu mapapande ringangu matatahuěnna e, kụ nilahẹu su taumata rararodọ.

²⁶Kụ kai ene nạung mětẹ̌tatahino si Amang.”

²⁷ Mase Mawu Yesus něhengetang, ”Patikụ sạbarange seng nisarakang i Amange si Siạ. Tawẹu makakiral᷊a Ahusẹ̌, sul᷊iung Amang. Tawẹu l᷊ai makakiral᷊a si Amang, sul᷊iung Ahusẹ̌, dingangu si sai-saịewe pělahekang i Amang kahiạeweng Ahusẹ̌ e.

²⁸Děntako su anu-Ku i kamene kěbị apan něngkasaghedẹ̌ dingangu něngkawěhạ u wawawaěnge; Iạ e sarung mapangirul᷊eng kamene.

²⁹ Pěmpẹ̌tol᷊eko tita-Ku e dingangu pěmpangěndungko si Siạ e i kamene. U Iạ ini e kai masikome ringangu masanạ naung-Ku, kụ i kamene sarung makapěndang mal᷊unsemahẹ̌.

³⁰U kal᷊awọu tita-Ku e makạl᷊uasẹ̌, dingangu wawawaěng Takụ pakipasaěng si kamene e mahaěng!”