Read Sangir MATIUS 12 Bible Online

MATIUS 12 - Sangir bible

MATIUS 12

¹ Piạ sěnsul᷊e su ěllon Sabatẹ̌, piạ e Mawu Yesus simahe waelʼu gandung, manga muritʼE e nanětạe němpaměnsạ gandung, kụ nahungkaěng batụ u kai seng kinal᷊unusang.

²Sarangke kinasilon tau Farisi e ute i sire němpẹ̌berạe si Sie, ”Kěllạe! Manga muritʼU e limawang toratʼi kitẹ dingangu němpẹ̌koạbe apan isẹ̌sěding su ěllon Sabatẹ̌.”

³ Mawu Yesus simimbang, ”I kamene kai ta nakạbasa apa kinoạ i Daud piạ i sie ringangu manga taumatane kinal᷊unusang?

⁴ I sie kawe simuẹ̌ su ral᷊ungu Wal᷊em Mawu Ruata; mase kimaěng borotẹ̌ nạung seng nakoạ sasěmba su Mawu. Sěmbal᷊iau tumuhụ toratʼi kitẹ e, i sire sěndinganenge kawe pělli mahungkaěng borotẹ̌ ene kaiso mantịewen manga imange wotonge.

⁵ Arau kai wědang ta nakạbasa i kamene su ral᷊ungu toratʼi Musa u apang ěllon Sabatẹ̌ e manga imang mẹ̌munara su Wal᷊em Mawu, kụ lụl᷊ampa atorangʼu ěllon Sabatẹ̌, kai tawe nipẹ̌sal᷊a?

⁶Tatingangko apa takụ niwera ini: ěndaị kai piạ limembong kasěllahe wọʼu Wal᷊em Mawu e.

⁷ Su ral᷊ungu Winohẹ Susi e mạbawohẹ: I kẹ̌kapuluku e kai pẹ̌kakakěndagẹ̌ e, wal᷊inewe sasěmba binatang. Kereu i kamene kahěnga-hěngang nakaěnna waweraku e, ute mambeng tawe sarung mapẹ̌sal᷊ang apan tawẹ sal᷊ane.

⁸Baugu Ahusʼu Taumata e kai kawasa su ěllon Sabatẹ̌ e.”

⁹Mawu Yesus naněntangken tampạ ene kụ simuẹ̌ su wal᷊em pẹ̌kakal᷊iomanengang.

¹⁰Akutẹu sene kai piạ tau l᷊imane sěmbẹ̌ka nipatene. Pirang katau mědẹ̌deạ aị u mapẹ̌sẹ̌sal᷊a Mawu Yesus kụ měmpạkibal᷊o si Sie, ”Botonge mapakapian masasakị su ěllon Sabatẹ̌?”

¹¹ Mawu Yesus simimbang, ”Mangawe piạ u sěngkatau wọu tal᷊oarang kamene piạ dombane, kụ su ěllon Sabatẹ̌ domba ene nataho su wangka maral᷊ung; kụ kereapa wue taghuangʼu domba e tawe měněngal᷊ẹ̌ kụ mamatung domba e wọu lohange?

¹²Kutẹu taumata e kawe limembom mạarěga wọu domba e! Kụ mạeng kerene, botonge wue mẹ̌tul᷊ungu taumata su ěllon Sabatẹ̌.”

¹³Bọu e i Yesus nẹ̌bera su tau limane nipatene sěmběka e, ”Ul᷊uhẹ̌ko limanu.” Tau ene něngul᷊uhẹ̌ limane, kụ lima ene napia kere limane sěmběka.

¹⁴Arawe taumataʼm Farisi e nahunsẹ̌bangke wọu wal᷊en pẹ̌kakal᷊iomanengange, mase němpẹ̌kakirẹ e mẹ̌deạu mamate.

¹⁵Mawu Yesus nakahěngangke u tau Farisi e piạ dial᷊e rumokạ si Sie. I Sie rimal᷊engke wọu ene kutẹu kai nitol᷊eěngu taumata l᷊awọ-l᷊awọ, kụ i Sie napakapian kal᷊awọu masasakị.

¹⁶Kụ i Sie nẹ̌sẹ̌dingken sire měmpẹ̌bawěken Sie su taumata wal᷊ine.

¹⁷Ual᷊ingu ene ute nisěhụe apang pinẹ̌hengetangʼu Mawu Ruata kere těbal᷊u Nabi Yesaya,

¹⁸ ”Kai ini e rarolohang-Ku Takụ pinile, i Sie ikẹ̌kěndagẹ̌-Ku ringangu mětẹ̌tatal᷊ahino su naung-Ku e. Rohkẹ̌-Ku e Takụ isarakang si Sie, kal᷊aadilẹ̌-Ku e sarung ipakasingkạ su patikụ bansa.

¹⁹I Sie tawe sarung manitori arau měmansagẹ̌, arau mẹ̌tahawerang su manga ral᷊eng gaghuwạ.

²⁰Hiung napěkuhẹ̌ e tawe pědiangʼE ringangu sol᷊o mědẹ̌dusẹ̌ e tawe tiukangʼE. I Sie sarung mẹ̌tatětol᷊ẹ̌ sarang makawunạ u kạadilẹ̌;

²¹patikụ bansa e samatang mělẹ̌harapẹ̌ si Sie.”

²²Ene niěntude su anun Yesus sěngkatau wuta ringangu ta kawawera ual᷊ingu pinẹ̌kawasaěngu rohkẹ̌ dal᷊akị e. Mawu Yesus napakaul᷊en tau ene hakịu i sie nakawera ringangu nakasilo.

²³Kal᷊awọu taumata e něngkaherang kụ němpẹ̌bera u, ”Wal᷊inewe i Sie ini ngae Ahusʼi Daud kere nạung su kẹ̌do e?”

²⁴ Arawe tau Farisi nạung makạdingihẹ̌ ene, i sire němpẹ̌simbahʼu, ”Tau ěndaịe kětạeng makạpanokol᷊ẹ̌ rohkẹ̌ dal᷊aị e ual᷊ingu i Beelzebul, těmbonangu manga rohkẹ̌ dal᷊aị e, seng nangonggọu kawasa si Sie.”

²⁵Mawu Yesus masingkạu tiněnnan tau Farisi e, kụ i Sie něhengetang si sire, ”Kamageng kararatuang sěmbaụ mapahiạ pirang kamonaěng, mase sěmbaụ dingangu wal᷊ine mẹ̌daral᷊aị, ute kararatuang ene tawe tumei, kaiso mang maromba. Dingangu soa sěmbaụ arau wọu tal᷊oarang anạ u sěngkatau e mẹ̌kal᷊iaesẹ̌ kụ měmpẹ̌sẹ̌dụ sěmbaụ su wal᷊ine ute mang maghoghahẹ̌.

²⁶Kerene lai su ral᷊ungu kararatuangʼu setang; kereu kamonaěng sěmbaụ měndal᷊aị kamonaěng bal᷊ine ute, kararatuangʼu setange seng napahiạ-pahiạ kụ mang sarung magholang.

²⁷I kamene měbẹ̌bera u Iạ mạnokol᷊ẹ̌ rohkẹ̌ dal᷊aị ual᷊ingu kawasam Beelzebul. Kamageng kerene ute, kai ual᷊ingu kawasan sai tumatol᷊e si kamene e měmpanokol᷊ẹ̌ rohkẹ̌ dal᷊aị? I sire apan tumatol᷊e si kamene hala e mapẹ̌sẹ̌sal᷊an kamene!

²⁸Arawe Iạ e kawe mạnokol᷊ẹ̌ rohkẹ̌ dal᷊aị ual᷊ingu kawasan Rohkẹ̌ u Ruata. Kụ ene mangal᷊ene ute, Mawu Ruata e seng manětạ mẹ̌parenta su tal᷊oarang kamene!

²⁹Kereapa tangu makakasuẹ̌ su wal᷊en sěngkatau taumata matoghasẹ̌ kụ mamul᷊aho rarotonge, kereu i sie tawe mangikị tau matoghasẹ̌ e kal᷊imona? Mase wọu ene i sie wuhụe makapul᷊aho rarotonge.

³⁰ I sain tawe manumbẹ̌ka wọu Iạ e ute nal᷊ahẹu i sie rumokạ si Siạ. Dingangu i sai tawe mẹ̌sumbala Siạ e ute, mambeng těngadẹ̌ makagholang hal᷊ẹ̌-Ku!

³¹Ual᷊ingu ene ute, kěngkasingkạko, kereu i sai měkẹ̌koạ dosa ringangu měbẹ̌berang lahinakang,[10] i sie wotonge i kaampung. Kai kamageng i sie měhinakang Rohkẹ̌ u Ruata e i sie tawe ikaampung!

³² Arawe kereu i sie kawe mẹ̌bẹ̌berang bawera ipěndokạ Ahusʼu Taumata, i sie wotonge kaampung, arawe kamagengu i sie kawe měhinakang Rohkẹ̌ u Ruata ute, i sie tawe kaampungang, baẹ orasẹ̌ ini kerene lai su aheratẹ̌ e!”

³³ ”Mědeạu makahombangbe wuang kalu mapia e ute kalune harusẹ̌be lai mapia. Kereu kalune ral᷊akị, ute wuane mal᷊aing dal᷊akị. U kai wọu wuane kapẹ̌kiral᷊aěng kalune.

³⁴ I kamene taumata ral᷊aị, i kamene kai makapẹ̌berawen mapia kereapa, kereu i kamene kawe ral᷊aị? Apang iwẹ̌beraʼm mohong, ute ene kai tụtompẹ bọu ral᷊ungu naung!

³⁵Taumata mapia e kai měbẹ̌bera manga hal᷊ẹ̌ mapapia e batụ u i sie kai napenẹ u kapia. Arawe taumata ral᷊aị kawe mẹ̌bẹ̌bera manga hal᷊ẹ̌ daral᷊aị e batụ u i sie kai napenẹ u karal᷊aị.

³⁶Kụ pẹ̌tahěndungko: u su Ěllong Kiamatẹ̌, sěngkatau-sěngkatau e měnal᷊udʼu apam bawerane kụ tawe mẹ̌tatal᷊ahino.

³⁷U kai wọu manga waweranu hala e kụ sarung ipakẹ ipěnilakehu i kau měnsang nẹ̌sal᷊a arau nihino.”

³⁸ Bọu e pirang katau mananěntiro agama ringangu manga tau Farisi e němpẹ̌bera, ”Tuang Guru, i kami kai mapulu reng makasilo si Tuang mẹ̌koạ tanda makạl᷊aherang.”

³⁹ ”Apạe karal᷊aị dingangu kạduruhakane manga taumata tempo ini!” angkuěng u Mawu Yesus. ”I kamene mědẹ̌dorong si Siạ pẹ̌koạ tanda makạl᷊aherang? I kamene tawe ghělirang u tanda makal᷊aherange maninglai tumbạu sěmbaụ, tabeạu katewe tanda makal᷊aherang i Nabi Yunus.

⁴⁰ I Yunus e nạung těllu ěllo těllu hěbi su ral᷊ungu tiangu kinạ gẹ̌guwạ. Kerene lai Ahusʼu Taumata e mal᷊aing těllu ěllo těllu hěbi su ral᷊ungu unidʼu dunia.

⁴¹ Su Ěllong Kiamatẹ̌ tumanạ u Niniwe sarung měmpẹ̌bangung dingangu taumatang orasẹ̌ ini kụ měmpẹ̌hukung i sire. U taumatan Niniwe e kai seng němpẹ̌tobatẹ̌ bọu kal᷊awọu rosan sire, piạ i Yunus e seng měnẹ̌nasẹ̌ si sire. Kaiso orasẹ̌ ini e ěndaị piạkong lai nangělembong kasěllahe wọʼi Yunus e!

⁴² Su Ěllong Kiamatẹ̌ e, datu wawine wọu wanuan sěmběkang timuhẹ̌ e sarung mẹ̌bangung dingangu taumata orasẹ̌ ini e kụ měhukung i sire. U i sie riměnta wọu pondol᷊ʼu dunia e mědeạu makaringihẹ̌ kapanden Salomo. Kutẹu ěndaịe kawe piạ nangělembong kasěllahe wọʼi Salomo!”

⁴³”Kamageng rohkẹ̌ dal᷊aị e měmpẹ̌sěbang bọu pẹ̌sěngkatau, ute rohkẹ̌ ene měpẹ̌paiwuhị banua mamara mědeạu pěngirul᷊eěng, kaiso tawe makal᷊ahombang.

⁴⁴Ual᷊ingu ene i sie nẹ̌berau, ’Iạ sarung mẹ̌bal᷊ị kạpia su wal᷊e kụ seng takụ nitěntang.’ Ene i sie nasongọe sene, kutẹu wal᷊e e kawe tạ taune, wurẹ̌si ringangu mahundugẹ̌.

⁴⁵Mase i sie rimal᷊eng kụ němaringang si sire pitu rohkẹ̌ bal᷊ine kụ limembong karal᷊aịe wọʼi sie. Bọu e i sire simuẹ̌ su tau ene, kụ nẹ̌tumanạ sene. Kụ pangěnsueěnge kakakoạu tau ene napal᷊iung karal᷊akịe wọu kal᷊amona. Kụ kerene lai sarung mariadi su taumata raral᷊aị orasẹ̌ ini.”

⁴⁶Ene Mawu Yesus bẹ̌dang kạpěhengetange su taumata l᷊awọ-l᷊awọe, tangu narěntạe i ninangʼE ringangu anạ u sěmbaụʼE. I sire mạhundarisị su l᷊ikude mědeạu mẹ̌bisaran Sie.

⁴⁷Sěngkatau wọu tal᷊oaran taumata l᷊awọe nẹ̌berạe si Yesus, ”Tuang, i ninang dingangu manga anạ u sěngkataun Tuang e ene wawa su l᷊ikudẹ̌. I sire mapulu mẹ̌bisaran Tuang.”[11]

⁴⁸Mase Mawu Yesus simimbang, ”I sai i ninang-Ku? I sai manga anạ u sěngkatau-Ku?”

⁴⁹Bọu e i Sie naněbọ su manga muritʼE ringangu nẹ̌bera u, ”Kakěllạe, kai ini e i ninang-Ku ringangu manga anạ u sěngkatau-Ku.

⁵⁰Taumata apam měmpẹ̌kẹ̌koạ kapulung Amang-Ku su Sorga, ute i sie anạ u sěngkatauku esẹ, anạ u sěngkatauku wawine ringangu i ninangku.”