Read Sangir MATIUS 15 Bible Online

MATIUS 15 - Sangir bible

MATIUS 15

¹Tau Farisi sěngkomol᷊ang dingangu mananěntiro agama pira-pira wọu Yerusalem nahunděnta sol᷊ong anung Yesus. I sire němpẹ̌kiwal᷊o si Sie,

²”Unụe manga muritʼU kawe lụl᷊ampa tundung i upung gaghurang i kitẹ? Mageng mahungkaěng, i sire kawe tawe měmpanguhasẹ̌ l᷊iman sire kal᷊amona kere su atorange!”

³Mawu Yesus ute simimbangke si sire ungkuěng, ”Kụ kawe unụe i kamene mal᷊aing lụl᷊ampa parentang Duata ual᷊ingu pamamewẹ tundung i upung gaghurang i kamene?

⁴ U Mawu Ruata kai něhengetang, ’Pangadatẹ̌ si amangu ringangu si ninangu, kụ i sai měngane si amang dingangu si ninange ute hinong pateěng.’

⁵Arawe ungkuěng i kamene ute, mạeng u piạ u mẹ̌bera su gaghurange, ’Apạe angkeěng takụ ighěllị si amangku ringangu si ninangku, seng takụ nịsasěmba su Ruata,’

⁶tangu tau ene seng tawe wahal᷊uasʼu měngadatẹ̌ gaghurange.[13] Kụ, ual᷊ingken tundung i upung gaghurang i kamene, ute i kamene kawe měmẹ̌malang hengetangʼu Mawu Ruata.

⁷I kamene kai tau mělle! Nihino-hino apan nitěbal᷊u Nabi Yesaya mạanung kamene, u,

⁸ ’Kai kere ini ungkuěngu Mawu: Umatẹ̌ ini e kai měmpạngadatʼu wiwihʼi sire si Siạ, arawe naung i sire ute maraung Iạ.

⁹Tawẹ gunane i sire měmpangadatẹ̌ Siạ, batụ u i sire kai mạněntirong atorangu taumata isẹ̌sihing i sire su atorangku.’ ”

¹⁰Tangu Mawu Yesus kimuịe taumata l᷊awọe kụ něhengetang si sire, ”Pěmpẹ̌daringihẹ̌ko mẹ̌deạu makaěnna!

¹¹Apan seng nawoko su mohonge tawe makakal᷊amuhụ taumata; tumbạeng apang mạl᷊ua wọu mohonge, ute kai ene makạkal᷊amuhụ si sie.”

¹²Mase manga muritʼi Yesus nahunděnta kụ němpẹ̌bera si Sie, ”Masingkạ bue i Tuang u i sire tau Farisi e kawe niměnggạu nakaringihẹ̌ hengetang i Tuang kawe kerene?”

¹³Mawu Yesus simimbang, ”Apạewen sasuang kụ bal᷊ine nisuang i Amang-Ku su Sorga e, kai ěbukang.

¹⁴ Manịeng aị sěmpike i sire tau Farisi ene. I sire kai měngangahạ buta; kụ kereu kawe wuta měngahạ buta ute i rẹ̌dua měngkawunsal᷊ẹ̌ sěngkawunsal᷊ẹ̌ su ral᷊ungu songe.”

¹⁵Ene i Petrus něberạe si Sie, ”Tul᷊ungko i Tuang pělahẹu papinintu ene si kami.”

¹⁶Kutẹu Mawu Yesus simimbang si sire, ”Kai ta nakaěnna i kamene?

¹⁷Kai wěga i kamene, u apam masuẹ̌ su mohonge kawe sumuẹ̌ su tiang, kụ bọu e sumẹ̌bang kapia?

¹⁸ Arawe apan sụsěbang bọu mohong, ute kai měbẹ̌buạ bọu naung; kụ kai ene makạdiadi taumata mal᷊amuhụ.

¹⁹U kai wọu ral᷊ungu naunge pěbẹ̌buakengu tiněnna raral᷊akịe, makạual᷊i taumata měmate, mawuang, mẹ̌sundal᷊ẹ̌, mẹ̌tako, mẹ̌sahiding konti, ringangu měhodatẹ̌.

²⁰Kakakoạ tamai ene makạual᷊i taumata mal᷊amuhụ, kai wal᷊inẹbe kumaěng u l᷊ima ta nịuhasẹ̌.”

²¹Bọu e Mawu Yesus dimal᷊engke naněntangu tampạ ene sol᷊ong banua maraning soan Tirus dingangu Sidon.

²²Ene piạ e sěngkatau wawineng Kanaan bọu wanua ene, lụhaung si Yesus kapẹ̌kẹ̌kuine, ”Ahusʼi Daud, tal᷊ěntụkong iạ! Anạku wawine e kai niwal᷊iuangu rohkẹ̌ dal᷊akị kụ tangu kakakoạe marasai.”

²³Mawu Yesus e měngkate tawẹ kěndịe. Tangu manga muritʼE němpẹ̌haungke si Sie kụ němpẹ̌dorong, ”Tuang, dolohẹ̌ko apěngensọ bawine ěndaịe pakarau. I sie měngkate kětạeng měgẹ̌gahẹ su l᷊ikudʼi kitẹ!”

²⁴Mawu Yesus simimbang, ”Iạ e nirolohẹ̌ samatang baugʼu kawanuang Israel e, tumange si sire apan něngkapal᷊idẹ̌.”

²⁵Tau wawine ene himaungke kụ nẹ̌suba si Yesus kạpẹ̌berane, ”Tul᷊ungko iạ, Mawu!”

²⁶Kai i Yesus simimbang, ”Tawe hinone měngal᷊ạ kaěng u pal᷊ahanạ kụ iteledẹ̌ su manga asu.”

²⁷”Kerene wue, Mawu,” ungkuěngu wawine ene, ”arawe asu e mal᷊aing kụkaěng manga popahẹ̌ apan měngkạhondosẹ̌ bọu medan mawune.”

²⁸Mase Mawu Yesus něhengetangke si sie, ”Ei wawine, mambeng masaria pěngangimangu e! Kariadịe apan dẹ̌dorongangu e!” Tangu wọuten orasẹ̌ ene anạe napiạe.

²⁹Ene Mawu Yesus naněntangken tampạ ene, kụ simělẹ e wiwihʼu Ranong Galilea e. Bọu e i Sie simaka su wěntihe kụ naiang sene.

³⁰Mal᷊awọ taumata nahunděnta su anunʼE němpangěntudʼu tau kempal᷊ẹ̌, buta, peosẹ̌, mou ringangkewelain masasakị bal᷊ine. I sire němpanondang masasakị ene su těngong Yesus, kụ i Sie napakapian sire ene.

³¹Taumata l᷊awọ apan ene sene měngkate apa měngkạherang, makạsilọ e apang mou makawera, kempal᷊ẹ̌ něngkapia, peosẹ̌ makạdal᷊eng, dingangu wuta makạsilo. Kụ i sire měngkate měmpẹ̌dẹ̌dalo Mawu Ruatang Israel.

³²Ene Mawu Yesus kimuịe manga muritʼE mase něhengetang, ”Iạ e tụtal᷊ěntụ u taumata l᷊awọ ini. Seng těllu ěllo karěngụe i sire měngkai ringangku kutẹu i sire seng tạ u kanengang. Iạ mạdiri wue i sire měngkapul᷊ẹ dingangu tiang tạ l᷊ohone, kibasịʼu i sire mapinsang su ral᷊eng.”

³³Mase manga muritʼi Yesus nakiwal᷊ọe si Sie, ”Kai makaěbạ kaěng bọu apa i kitẹ su wanua maghea ini waugʼu taumata kal᷊awọe ini?”

³⁴”Pirambaụ borotẹ̌ si kamene? Mawu Yesus nakiwal᷊o si sire.” ”Pitumbaụ dingangu kinạ darodọ pirambua.”

³⁵Tangu Mawu Yesus nangorọe taumata l᷊awọe niapahungkaiang su ěntana.

³⁶Mase i Sie nangal᷊ạe borotẹ̌ pitumbaụ dingangu kinạe kụ bọu e nakitarimakasẹ su Mawu. Bọu ene pinẹ̌kakakempangete borotẹ̌ dingangu kinạe ringangu l᷊imanʼE, mase tinẹ̌gonẹ e su manga muritʼE. Kụ i sire němpamahiạe su taumata l᷊awọ ene.

³⁷Kụ i sire nahungkaěng kěbị sarang něngkal᷊aedẹ̌. Bọu ene i sire němpěngomol᷊e manga lěmbeng kaěnge. Kěbị kal᷊awọe pitung kěmbuahẹ̌ napenẹ.

³⁸Kal᷊awọu manga esẹ apan nahungkaěng su orasẹ̌ ene tangu nạung ěpạ u hiwu su kataune, tawẹ nạdekeng manga wawine ringangu manga rariọ e.

³⁹Bọu e Mawu Yesus něndolohʼu taumata l᷊awọe pinakapul᷊ẹ. I Sie simakẹ e su sakaenge, kụ nawunạu wanuang Magadan.