Read Sangir MATIUS 16 Bible Online

MATIUS 16 - Sangir bible

MATIUS 16

¹ Piạko tau Farisi ringangu Saduki pirang katau nahunděnta su anung Yesus měhěbagẹ̌ si Sie. I sire němpẹ̌dorong u i Sie apẹ̌kẹ̌koạko tanda makạl᷊aherang pạnahuntěngadʼu rarěntanʼE kai wọu anun Duata.

²Mawu Yesus simimbang, [”Kamagengu matangěllo e kạsědạe, i kamene mạul᷊ị u, ’Wanua e mapia, u l᷊angịe kawe mahamụ.’

³Dingangu mal᷊ukade wue ute, i kamene nẹ̌bera u, ’Sahěllo ini e rumasehẹ̌, u l᷊angịe kawe mahamụ dingangu malělubẹ̌.’ Ho, i kamene masingkạbe mẹ̌patehẹ̌ banua ringangu makasilowe kakoạu l᷊angịe, arawe tatialan tempo e kawe tawe ikatighadʼi kamene!”]

⁴ ”Kai apạe karal᷊aị dingangu kawawal᷊ětohẹ̌ taumatang orasẹ̌ ini. I kamene měgẹ̌gausʼu Iạ e apěkẹ̌koạ tanda makạl᷊aherang. I kamene tawe panọdekangu tanda makạl᷊aherange sarang sěmbaụ tabeạu katewe tanda makạl᷊aherang bọu Nabi Yunus.” Sarạeng bọu něhengetang kerene, i Yesus e naněntangken sire, mase rimal᷊eng.

⁵Piạ e manga muritʼi Yesus nahumpạen sěmběkan dano e, wuhụe kinasingkateng i sire u i sire kawe niwul᷊e nẹ̌bawa borotẹ̌.

⁶ I Yesus něhengetangke si sire, ”Pakatateghang bue su ragin tau Farisi ringangu tau Yahudi e.”

⁷Nakaringihe manga waweraʼm Mawu Yesus e, manga muritʼE nanětạe němpahumbisara sěmbaụ su wal᷊ine. ”I Sie nẹ̌bera kerene e kai puhinengu i kitẹ tawe němpẹ̌bawa borotẹ̌ e.”

⁸Mawu Yesus e masingkạ u apang ipạhumbisaran sire. Kụ i Sie něhengetang, ”Unụe i kamene měmpạhumbisaran tawẹ borotẹ̌ niwawang kamene? I kamene kadodọ pangangimang e!

⁹ Kai wẹ̌dang ta nakaěnna i kamene ngae? Kai ta nakatahěndung i kamene borotẹ̌ l᷊imam baụ takụ pinẹ̌papahiạ baugu l᷊ima hiwu su kataune? Pirang luwe lěmbeng kaěng nịkakomol᷊ʼi kamene?

¹⁰ Kụ kereapa wue borotẹ̌ pitu ene waugu ěpạ u hiwu su kataune? Piran luwe lěmbeng kaěng nịkakomol᷊ʼi kamene.

¹¹Kawe nakoạ kereapa ho i kamene mang ta makal᷊aěnna, u Iạ, tawe mal᷊aanum borotẹ̌ si kamene? Pakatateghang bue su wawitaugu tau Farisi ringangu Saduki!”

¹²Kasueěnge manga muritʼi Yesus e nakaěnnạe u Mawu Yesus mạul᷊ịu pakatateghang e wal᷊inewe apẹ̌tẹ̌tihọ u ragi kakaugẹ̌ borotẹ̌ e, kaiso kawe apětẹ̌těghangu manga těntirong tau Farisi ringangu Saduki.

¹³Mawu Yesus nakoạe sarang banua maraning soang Kaisarea Filipi. Sene i Sie kai nakiwal᷊o su manga muritʼE, ”Ungkuěng u taumata e, kai i sai Ahusʼu Taumata e uade?”

¹⁴ Manga muritʼE naul᷊ị u, ”Angkuěngu sěnggạ i Yohanes Mananahani, sěnggạe wue mạul᷊ị u i Elia. I sirẹewe lai wal᷊ine ute mạul᷊ị u i Yeremia, arau sěngkatau wọu tal᷊oaran manga nabi.”

¹⁵”Arawe su tiněnnan kamene hala, i sai wue tangu Iạ e?” angkuěng i Yesus si sire.

¹⁶ Ene i Petrus simimbangu, ”I Tuang kai Ratu Mananal᷊amatẹ̌, Ahusʼu Ruata Kụ Biahẹ̌.”

¹⁷”Kariangkamang i kau, Simon anạ i Yona!” ungkuěng i Yesus, ”U wal᷊inewe taumata nělahẹu ene si kamene, kaiso kai i Amang-Ku su Sorga.

¹⁸Ual᷊ingu ene tangu kasingkạko, i kau e kai i Petrus, batu hanibẹ̌, kụ su wowom batu sasukunang ini e takụ pamětikang u gaheda-Ku; kụ tawe ikawatạ maning lai papate!

¹⁹ Iạ e sarung mẹ̌gěllị u kakunsị u Runian Duata Wuhu e si kau. Kụ apạewen isẹ̌sẹ̌dingu su dunia e mal᷊aing isẹ̌sědingu su sorga. Dingangu apạewen nẹ̌tatal᷊ahino angkuěngu su dunia e, ute nẹ̌tatal᷊ahino lai su sorga.”

²⁰Bọu e Mawu Yesus měsẹ̌sědingu manga muritʼE tadeạu i sire kumbahang maul᷊ị si sai-sai u i Sie kawe Ratu Mananal᷊amatẹ̌.

²¹Nanětạ bọu tempo ene Mawu Yesus naul᷊ị mal᷊ahẹ su manga muritʼE, u i Sie hinong sol᷊ong Yerusalem kụ mẹ̌tatahangu sunsara l᷊awọ bọu manga těmbonange, manga imang těmbonange dingangu manga mananěntirong agama. I Sie sarung pateěng, kaiso su katěllu ěllone i Sie sarung iapẹ̌bangung kapia.

²²Kutẹu i Petrus kai namol᷊eng si Yesus sol᷊ong sěndihange ringangu nẹ̌bera si Sie, ungkuěnge, ”Karimạko Mawu Ruata e mapakaraung ene Mawu! Kumbahang bue hal᷊ẹ̌ ene humombang si Kau Mawu!”

²³Ene Mawu Yesus nẹ̌bihụe mase nẹ̌bera si Petrus, ”Pamehọ e i kau wọu ini setang! I kau e kai mạnahaghe si Siạ. Tiněnnanue kai tiněnnan taumata; bal᷊inewe tiněnnan Duata!”

²⁴ Bọu e Mawu Yesus něhengetangke su manga muritʼE, ”I sai mapulu tumol᷊e si Siạ, ute harusẹ̌ mẹ̌timbul᷊eng batangenge sẹ̌sane, kụ pamasaẹ̌ng kuruise kụ měngkatewe tol᷊e si Siạ e.

²⁵ U i sai mapulu mẹ̌tahuntěndạ u pẹ̌bawiahe, ute sarung kailangengu pẹ̌bawiahe. Arawe i sai manarakangu pẹ̌bawiahe waugʼu Iạ e, ute sarung makahombang ene.

²⁶Kai apạe untune su pẹ̌sěngkatau, kereu kạguwạu dunia ini makoạ tataghuanenge arawe i sie kailangengu pẹ̌bawiahẹ̌ e? Botonge pẹ̌bawiahẹ̌ e kasal᷊iuangu apa-apa?

²⁷ Selain tawẹ karěngụe Ahusʼu Taumata mahundingangu manga malạekatẹ̌ e sarung duměnta ringangu kawasang Amange. Su tempo ene i Sie sarung mamal᷊isẹ̌ su sěngkatau-sěngkatau tuhụewe kakanoạe.

²⁸Kasingkạko! U wọu tal᷊oarang kamene ěndaịe piạ u ta nakasilo Ahusʼu Taumata ruměnta kere sěngkatau Ratu.”