Read Sangir MATIUS 17 Bible Online

MATIUS 17 - Sangir bible

MATIUS 17

¹ Ěnnungu ěllo samurim Mawu Yesus namaringang si Petrus dẹ̌duang Yakobus dingangu tuarine i Yohanes, němpěněntani sol᷊ong bul᷊ude marangẹ sěmbaụ.

²Su kěllaěng i sire, Mawu Yesus kai nẹ̌bal᷊ui ghahịe: GatinʼE sụsěnnang kere matangěllo ringangu pakeange kụkerong mawira.

³Mase i sire těllu manga muritʼE nakasilo si Musa rẹ̌duan Elia mạhumbisara ringangu Mawu Yesus.

⁴Mase i Petrus nẹ̌bera su Mawu Yesus, ”Mawu, kai kapaelẹ̌ pěndange i kitẹ su tampạ ini. Kereu Mawu mal᷊uasẹ̌ ute iạ e reng mamětị selo tatěllu sini, sěmbaụ baugu Mawu, sěmbaụ baugʼi Musa, ringangu sěmbaụewe lai e waugʼi Elia.”

⁵ Kutẹu i Petrus deng kapẹ̌bẹ̌berane, tangu winawa matuala-tualagẹ̌ e natimbuhungke si sire kụ bọu ral᷊ungu winawa ene kinaringihe tingihẹ̌ měbẹ̌bera, ”Ini e kai Ahusẹ̌-Ku ikẹ̌kěndagẹ̌. I Sie kai makạl᷊ahimpulu naungku e. Daringihe i Sie!”

⁶Lěpase manga muritʼi Yesus himaung nakaringihe tingihẹ̌ ene, i sire měngkatewe apa něngkatakụ hakịu něngkasumagẹ̌ su ěntana.

⁷Arawe Mawu Yesus himaung kụ nanenggehẹ̌ si sire, ”Pẹ̌bangungke,” angkuěngʼE, ”abe kěngkatakụ!”

⁸Sarạeng i sire němpamandạe, i sire tawe nakasilo si sai-sai tumbạben Mawu Yesus sẹ̌sane.

⁹Piạ e i sire kạpahundẹ̌sunge wọu wul᷊ude ene, Mawu Yesus kai mẹ̌gẹ̌gěllịu ingate si sire, ”Abe pěmpěhabarẹ̌ si sai-sai apang kinasilong kamene buhu-wuhu, těntal᷊ang Ahusʼu Taumata e reng tawe niapẹ̌bangung bọu papatene.”

¹⁰ Manga muritʼi Yesus nakiwal᷊ọe si Sie, ”Kawe unụe mananěntirong agama e němpẹ̌bera u i Elia kai harusẹ̌ duměnta kal᷊amona?”

¹¹Mawu Yesus simimbang, ”Mambeng kahěngang i Elia riměnta kụ i sie sarung měngul᷊ị kěbị.

¹² Kai Iạ e maul᷊ị si kamene, i Elia seng diměnta, arawe taumata e tawe nakakiral᷊a si sie, kaiso i sire němpẹ̌koạ si sie wal᷊ạewe kapulun sire. Kụ kerene lai i sire sarung měmpẹ̌koạ Ahusʼu Taumata.”

¹³Mase manga muritʼE nakaěnnạe u i Yesus měbẹ̌bisara mạanung Yohanes Mananahani.

¹⁴Piạ i Yesus dingangʼi sire těllu muritʼE nẹ̌bal᷊ị sol᷊ong anun taumata l᷊awọ ene, piạ sěngkatau esẹ himaung, kụ nẹ̌tumpěkuhẹ̌ su těngong Yesus,

¹⁵ringangu nẹ̌bera, ”Tuang, tal᷊ěntụkong anạku. I sie kai nitanggaěngu sakị u wawi. Tatanggang sakị u wawi e měngkate apa makasunsara, hakịu i sie seng tawẹ pal᷊ẹ e mawunsal᷊ẹ̌ su putung arau su akẹ.

¹⁶Iạ seng bọu nangěntudʼi sie su manga muritʼi Tuang, kai i sire tawe nakapia si sie.”

¹⁷Mawu Yesus simimbang, ”Bal᷊inewe mal᷊ongkọ i kamene ini! I kamene mangkewen taumata lụl᷊awang dingangu tawe měmpangangimang. Delaing kạděngụe Iạ mẹ̌tanạ dingangʼi kamene ringangu mẹ̌tingkědang ual᷊ingʼi kamene? Mahịe tonda rariọ ene!”

¹⁸Mase Mawu Yesus e namal᷊ěndihẹ̌ rohkẹ̌ dal᷊akị su ral᷊ungu rariọ ene niapasẹ̌bang. Tangu rohkẹ̌ dal᷊akị e simẹ̌bangke, kụ dariọ ene nul᷊ẹ e lai orasẹ̌ ene.

¹⁹Bọu e manga muritʼi Yesus němpẹ̌haungke si Sie pẹ̌sěngkatau kụ makịbal᷊o si Sie, ”Tuang! unụe i kami tawe makatokol᷊ẹ̌ rohkẹ̌ dal᷊akị ene?”

²⁰ Mawu Yesus simimbang, ”Suwụ u i kamene kadodọ pangangimang e. Tahěndungeko! Kamageng i kamene piạbe pangangimang i kamene kadiongeng kere kạguwạu wakị u sawi, ute i kamene makapẹ̌bera su wul᷊ude ini, u, ’Pangal᷊ingko sarang pai!’ mambeng těngadẹ̌ bul᷊ude ini sarung maal᷊ing. Tawẹu ta ikakoạ i kamene! [

²¹Kai rohkẹ̌ dal᷊akị kere ini e kětạeng botonge ikatokol᷊u kakal᷊iomaneng dingangu pẹ̌tatatělling samatang.]”

²²Piạ e manga muritʼi Yesus měmpẹ̌tẹ̌tampung su Galilea, Mawu Yesus něhengetang si sire, ”Selaing tawẹ karěngụe, Ahusʼu Taumata e sarung isarakang su kawasan taumata.

²³I Sie sarung pateěng, kaiso su katěllu ěllone i Sie sarungbe iapẹ̌bangung.” Tangu manga muritʼE měngkate něngkasusa tawẹ sihinge.

²⁴ Sarạeng Mawu Yesus dingangu manga muritʼE narěntạe su Kapernaum, maghaghělle pajak u Wal᷊em Mawu e nahunděnta anum Petrus dingangu nakiwal᷊o, ”Mananěntironu e mạmaehẹ̌be pajak u wal᷊em Mawu arau tala?”

²⁵I Petrus simimbang, ”Mạmaehẹ̌!” Sarạeng i Petrus e napul᷊ẹ, Mawu Yesus nakiwal᷊o si sie kal᷊amona, ”Simon, kerea su tiněnnanu e? I sai harusẹ̌ mamaehẹ̌ bea arau pajakẹ̌ su těmbonang u dunia ini e? Kawanua arau taumata raghị?”

²⁶”Tau raghị,” angkuěng i Petrus. ”Kamageng kerene,” angkuěngu Mawu Yesus, ”pamanuane sembeng tawe wahal᷊uasʼu mamaehẹ̌ ho.

²⁷Kai kumbahangbe i kitẹ makaněnggạ pěndang i sire ene. Kụ dakọe sol᷊ong dano pěngekẹ. Al᷊ạko kinạ nikaal᷊ạu humotonge. Su ral᷊ungu mohonge ene tangu, sarung makahombang doitẹ̌ kụ seng botonge makawaehẹ̌ pajakʼi kadua. Al᷊ạko roitẹ̌ ene kụ baehẹ̌ko pajakʼi kadua baugu Wal᷊em Mawu si sire.”