Read Sangir MATIUS 18 Bible Online

MATIUS 18 - Sangir bible

MATIUS 18

¹ Su tempo ene manga muritʼi Yesus himaungke si Sie kụ nakiwal᷊o, ”I sai ngae lẹ̌ěnnaěng kasěllaheng e su tal᷊oarang kawanuan Duata?”

²Mawu Yesus kimuịe sěngkatau rariọ kadodọ, kụ niapararisị su těngon sire.

³ Mase Mawu Yesus něhengetang, ”Pangimangke! U kětạeng kereu i kamene měmpẹ̌bal᷊ui kụ měngkakoạ kere manga rariọ e ute, i kamene makoạ kawanuan Duata.

⁴I sai mẹ̌těngkasanạu watangenge kụ mẹ̌těngkakoạ kere rariọ ini, ute i sie kai kasěllaheng e su tal᷊oarang kawanuan Duata.

⁵Dingangu i sai kụ manarimạ u rariọ kere ini e ual᷊ingu Iạ e, mangal᷊ene manarimạ u Iạ.”

⁶”I sai makạbodaị sěngkatau wọu taumata kakạdọdokange ini e kụ seng tawe saụ mangimang si Siạ e, ute mạpiangbe i sie ikitangu watung gilimang su l᷊ehẹ e bọu e iwontol᷊ẹ̌ su l᷊audẹ̌ maral᷊ung.

⁷Kai kạěngkěhang bue dunia ini ual᷊ingkeng apan makạbodaị taumata měmpẹ̌dosa. Kahěngang bue kěbị-kěbị e mang těbe ene, kaiso kạěngkěhang bue i saing makạkoạ ene!

⁸ Kereu l᷊imanu arau l᷊aedʼu kawe makạbaradosa si kau e, ute potọe kụ děmmẹ. Mapiangbe i kau měbẹ̌biahẹ̌ dingangu Ruata tawẹ l᷊imanu sěmběka arau l᷊aedu sěmběka, kai sul᷊ungu i kau irěmmẹ su ral᷊ungu putung u naraka ringangu l᷊imanu arau l᷊aedu ruam běka.

⁹ Kụ kereu matanue kawe makạdiading kau warạdosa, ute lěsạe kụ hipẹ. Mạpiangbe i kau měbẹ̌biahẹ̌ dingangu Ruata kụ tawẹ matanu sěmbẹ̌ka, sul᷊ungu irěmmẹ su naraka ringangu matanu ruam běka.”

¹⁰”Pakapia wue! Kumbahang měhinakang su sarang sěngkatau wọu taumata kakạdọdokange ini. U pẹ̌tahěndung, batụ u manga malạekatʼi sire sidutu mang ene su těngong Amang-Ku su Sorga. [

¹¹ U Ahusʼu Taumata e kai riměnta waugʼu měngambang apan nailang!]

¹²Kereapa su tingirangu? Kereu piạ u sěngkatau piạ dombane mahasụ, kutẹu sěmbaụe kawe nailang, kai a koateng e? Nal᷊ahẹu i sie reng maněntangu dombane siom pul᷊o sio e su wawul᷊urange mase tamai mědeạ sěmbaụ kụ nailang e.

¹³Kụ kamagengu sembeng kareakeng domba ene, ute — pangimangke Siạ — u i sie kai sarung nangělembo lumuasẹ̌ su sěmbaụe wọu siom pul᷊o sio wal᷊ine kụ tawe nailang.

¹⁴Kerene lai i Amangu[14] su Sorga e mạdiri piạ u sěngkatau wọu taumata apan buhụewe mangimang si Siạ e miwuhị.”

¹⁵ ”Kereu anạ u sěngkataunue nẹ̌dosa su těngonu[15] ute, kakoạko sol᷊ong anune kụ pělahẹkon pẹ̌sasal᷊ane. Kụ koạko ene pakapěnisẹ̌ kụ pianẹ e i rua hala e masingkạ. Kereu i sie tumuhụ manga waweranue ute, nẹ̌barauntu i kau e nakawol᷊eng kapia anạ u sěngkataunue.

¹⁶ Kai kereu tala e ute, saụko l᷊ai pamaringang sěngkatau arau ruang katau. U su ral᷊ungu Winohẹ Susi mạbawohẹ, ’Mẹ̌těngkahal᷊i rarua arau těllungkatau sahidi ipẹ̌nahuntěngadẹ̌ sěngkatau kaěnsilangu pẹ̌sasal᷊a.’

¹⁷Kereu i sie tawe manarimạ u sasasan sire ene ute pěhabarẹ̌kong hal᷊ẹ̌ ene su jamaatẹ̌. Kụ samurine, kereu i sie tawe manarimạ u sasasang jamaatẹ̌ ute koạe i sie al᷊ingkai maghaghělle pajakẹ̌ dingangu al᷊ingkai sěngkatau wẹ̌gam Mawu Ruata.”

¹⁸ ”Kasingkạko: Apang isẹ̌sěding i kamene su dunia e ute, mal᷊aing isẹ̌sěding su sorga. Dingangu apan ipahuntěngadʼi kamene su dunia e, ute mal᷊aing ipahuntěngadẹ̌ su sorga.

¹⁹Dingangu kasingkạko l᷊ai: Kamageng su tal᷊oarang kamene ini kụ piạ duang katau kụ mẹ̌sěngkanaungu apa-apa ringangu mẹ̌kal᷊iomanengu ene ute, kakal᷊iomaneng ene sarung daringihang i Amang-Ku su Sorga.

²⁰U suapan piạ darua arau těllungkatau mětẹ̌tampung ual᷊ingu Iạ, ute Iạ ene su tal᷊oaran sire.”

²¹ Bọu e i Petrus himaung si Yesus kụ nakiwal᷊o, ”Mawu, kereu anạ u sěmbaụku němpẹ̌dosa su těngoku ute, kai sarang kapiran sul᷊ene ia harusẹ̌ mapěngampung i sie? Sarang pitun sul᷊e ngae?”

²²Mawu Yesus simimbang, ”Tala, bal᷊inewe sarang pitun sul᷊e, kaiso pitum pul᷊o pitung kapitun sul᷊ene![16]

²³U kamagengu Ruata e mẹ̌parenta, kakakoạe kai kere su ral᷊ungu papinintu ini: Piạko sěngkatau ratu mapulu mẹ̌darekengu utangu manga ěllang e.

²⁴Piạ i sie nanětạe nẹ̌darekeng ute, piạko sěngkatau ěllang něngutang yutane kụ nipẹ̌těngon sie,

²⁵kụ seng tawe nakawaehẹ̌. Kụ datu e nẹ̌parenta tadeạu ěllang ene pakiwal᷊ụ sěngkawal᷊ụ dingangu anạe ringangu kawinge, ringangkewen patikụ darotonge tadeạu ipěmaehẹ̌ utang e.

²⁶Ěllang ene nẹ̌tumpěkuhẹ̌ su těngon datu e, kụ kapědẹ̌doronge, ’Tuang, pakanandụko wue naungu su ěllangu e. Ěllang hědowen měmaehẹ̌ utang pakasueng baehe.’

²⁷Tangu ratu e měngkatewe nẹ̌kakal᷊ěkadʼu tatal᷊ěntụe hakịu i sie niliwirẹ̌ bọu kal᷊awọu utange.

²⁸Arakutẹu ěllang ene nasẹ̌bangke, i sie nẹ̌sombangkeng hapịe, mal᷊aing sěngkatau ěllang, kụ piạ utange manga pira hiwu. I sie měngkatewe něhěgo hapịe ene, nikěllọe kapẹ̌bẹ̌berane, ’Baeheko kěbị utangu e!’

²⁹Mase hapịe ene nẹ̌tumpěkuhẹ̌ su těngone kapẹ̌dẹ̌doronge, ’Pakasabarẹ̌ko wue hapị, kěbịe sarungbe takụ baehang!’

³⁰Arawe ěllang ene kai tawe nahimang. Kụ ěllange měngkatewe tamai nanuẹ̌ i sie su ral᷊ungu tahungkụ sarạeweng i sie namaehẹ̌ utang e.

³¹Ene manga ěllang bal᷊ine e nakasilọe apang seng nariadi, i sire něngkasusa kụ něhabarẹ̌ hal᷊ẹ̌ ene su anun datu.

³²Tangu ratu e kimui ěllang dal᷊aị ene kụ nipẹ̌beraěng, ’E ěllang dal᷊aị! Kal᷊awọu utangu e seng takụ nirědasẹ̌, sěmatang ual᷊ingu i kau e nakitul᷊ung si siạ.

³³Kụ i kau e wal᷊inewe lai hinong kuměndagʼu hapịu e kerẹewe iạ e seng kiměndagʼi kau?’

³⁴Datu e limangehẹ̌ matědụ. Kụ ěllang dal᷊aị ene nịsasuẹ̌ e su ral᷊ungu tahungkụ sarang i sie nakawaehẹ̌ kěbị utang e.”

³⁵Mawu Yesus nangěnsue wẹ̌kene ringangu wawerane kere ini, ”Kerene lai i Amang-Ku su Sorga e sarung mapěkoạ i kamene sěngkatau-sěngkatau, kereu i kamene tawẹ karal᷊uase mẹ̌gěllị u ampung su manga anạ u sěngkataunue.”