Read Sangir MATIUS 20 Bible Online

MATIUS 20 - Sangir bible

MATIUS 20

¹”Kamageng u Ruata e mẹ̌parenta ute kakakoạe kai mẹ̌sul᷊ungu papinintu ini: Sěngkatau taghuangu waelʼu anggorẹ̌ e siměbang dokeng mal᷊ukadẹ̌ mědẹ̌deạ taumata waugʼu pěmunara su waelʼu anggorẹ̌ e.

²Sarạeng i sie kimirẹ e měmaehʼu roitẹ̌ sal᷊aka sěngkal᷊ěpa sahěllo si sire, i sie rimolohen sire pěmẹ̌munara su wawaelangu anggorẹ̌ e.

³Pukul᷊ẹ̌ sio mal᷊ukadẹ̌, taghuangu waelẹ̌ e rimal᷊eng kạpia, kụ nakasilọe pirang katau lụl᷊iongahẹ̌ tawẹ hal᷊ẹ̌ e su pasarẹ̌.

⁴Tangu něbera i sie si sire, ’Dakọe i kamene pěmunara su waelʼu anggorẹ̌ku. Iạ sarungbe mamaehẹ̌ si kamene ringangu wawaehe mẹ̌tatal᷊ahino.’

⁵Tangu i sire němpẹ̌tamaịe. Pukul᷊ẹ̌ mapul᷊o dua ěllo mal᷊ětu ringangu pukul᷊ẹ̌ tatěllu wawěllo, taghuangu waelẹ̌ ene saụewe rimal᷊eng, kụ nẹ̌koạ hal᷊ẹ̌ mẹ̌sul᷊ung.

⁶Kụ mangạe pukul᷊ẹ̌ lima wawěllo, i sie saụewe simẹ̌bang kụ nakasilo lai piạ taumata lụl᷊iongahẹ̌ tawẹ hal᷊ẹ̌ e. Mase i sie nakiwal᷊o si sire, ’Unụe i kamene měngkai mạhundarisị sahěllo tiwatu ěndaị sini kụ tawe němpẹ̌koạ apa-apa?’

⁷I sire němpẹ̌simbang, ’Tawẹ taumata mapěhal᷊ẹ̌ i kami.’ Angkuěngu taghuangu waelẹ̌ e, ’Mạeng kerene ute, rakọko i kamene pěmunara su waelʼu anggorẹ̌ku.’

⁸ Nawawěllọe, taghuangu waelʼu anggorẹ̌ e nẹ̌berạe su sawohịe, ’Kuịe manga měmamunara ene kụ baehẹ e sewan sire sěngkatau-sěngkatau, něnětạ bọu i sain simuẹ̌ pěngěnsueěnge sarang i sain simuẹ̌ kahumotongange.’

⁹Mase nahunděntạe měmpělahal᷊ẹ̌ apan nanětạ bọu pukul᷊ẹ̌ lima wawěllo. I sire němpanarimạ u roitẹ̌ sal᷊aka nahuntiạ u pẹ̌sěngkal᷊ěpa.

¹⁰Bọu ene nahunděntạe lai měmamunara apang bẹ̌baehang nanětạ dokeng mal᷊ukadẹ̌. I sire měmpạngěnnau reng makatarimạ nangělembo. Sěmbal᷊iau i sire kětạeng nighělikangu l᷊ai roitẹ̌ sal᷊aka pẹ̌sěngkal᷊ěpa.

¹¹Piạ e měnẹ̌narimạ doitẹ̌ ene, i sire měmpẹ̌sẹ̌simbul᷊ung su taghuangu waelẹ̌ e:

¹²’Manga apan měmpamunara apang kụ diměnta samuri ene kětạeng nempẹ̌halẹ̌ sěngkaorasẹ̌. Arawe i kami kawe mẹ̌munara ghěnangu pẹ̌sahěllo, su tětị u pědisẹ̌, kaiso i Tuang kawe namaehẹ̌ si sire mẹ̌sul᷊ungu si kami!’

¹³Taghuangu waelʼu anggorẹ̌ e simimbahẹ̌ su sěngkatau wọʼi sire, ’E hapị, iạ e tawe něsal᷊a si kau. Bal᷊inewe i kau napulu waehang pẹ̌sěngkal᷊ěpa waugʼu pěmamunaranu sěhěllo?

¹⁴Kụ, al᷊ạ e bawaehe dingangu kapul᷊ẹ e. Iạ e mang mapulu měgěllị bawaehe su tau simuẹ̌ samuri mẹ̌sul᷊ung dingangu takụ nighěllikang si kau.

¹⁵Kai tawe wotonge iạ mẹ̌batụ kapuluku su rarotongku e? Arau kai sumingking i kau, puhinengu iạ kawe matal᷊ěntụe?’ ”

¹⁶ Mase Mawu Yesus nẹ̌berạe lai, ”Mal᷊aing kerene taumata apang kasamuriange sarung makoạ kal᷊ahumotongange, ringangu taumata apang kal᷊ahumotongange sarung makoạ kasamuriange.”

¹⁷Piạ e i Yesus makoạ sarang Yerusalem, ene su tal᷊oaran dal᷊eng i Sie kai namaringang muritʼE mapul᷊o dua nẹ̌komol᷊ẹ̌ i sire hala. Bọu e i Sie něhengetang si sire,

¹⁸”Pẹ̌daringihẹ̌ko! I kitẹ ini mětẹ̌timona Yerusalem. Pai sene Ahusʼu Taumata e sarung isarakang su manga imang těmbonange ringangu manga mananěntirong agama. Mase i Sie sarung ihukung pateěng,

¹⁹bọu e isarakang su wal᷊ine taumatang Yahudi. I sire sarung měmpẹ̌taghunalang i Sie, manigěsạ si Sie, dingangu měnguruisʼi Sie. Kai su katěllu ěllone, i Sie sarung iapẹ̌bangung kapia.”

²⁰Bọu e kawing i Zebedeus diměnta ringangu manga anạe su anung Yesus. Su těngom Mawu Yesus i sie nẹ̌suba waụgu piạ dẹ̌dorongange.

²¹”I ninang kai mapulung a?” angkuěngu Mawu Yesus. I ninang ene simimbang, ”Iạ kai mapulu tadeạu anạku rarua ini pakaiang su kaihi ringangu su koaneng i Tuang kereu i Tuang makoạ Datu.”

²²”I kamene wẹ̌gaweng apa rẹ̌dorongang i kamene,” angkuěng i Yesus si sire. ”I kamene makainung bue wọu panganginumangu kasasigěsạ-Ku kụ hinon takụ inungang?” ”Botonge,” angkuěng i sire.

²³Mawu Yesus něhengetang, ”Těngadẹ̌ i kamene sarungbe manginung lai wọu panganginumang-Ku. Arawe mạanun i sai sarung kumaiang su kaihiʼU ringangu su koaneng-Ku, ene wal᷊inewe Iạ mananilakehe. Manga tampạ ene kai waugʼu taumata apan seng nitilakehʼi Amang-Ku.”

²⁴Tangu sarang i sire manga muritẹ̌ mapul᷊ongkatau wal᷊ine nakaringihẹ̌ hal᷊ẹ̌ ene, i sire kai limangehẹ̌ si rẹ̌dua tahatuari ene.

²⁵ Batụ u ene ute Mawu Yesus kimuịe si sire kěbị kụ něhengetang, ”I kamene masingkạu manga těmbonang u bansa kụ tawe makakiral᷊a Ruata e, manigěsạ kawanuane. Dingangu kasasěllaheng i sire měmpanědạ si sire.

²⁶ Arawe i kamene e tawe wotonge kerene. Su sěmběkane, i saing kụ mapulu mẹ̌těngkasěllahẹ̌ su tal᷊oarang kamene, hinong makoạ mẹ̌tatangkiang si kamene.

²⁷Dingangu i sai mapulu makoạ kahumotongange su tal᷊oarang kamene, hinom makoạ ěllang i kamene.

²⁸Kerẹewe lai Ahusʼu Taumata e; i Sie riměnta wal᷊inewe waugʼu makitangkiang, kaiso kawe mědeạu mẹ̌tangkiang, dingangu mangonggọu niawane mědeạu ipěliwirẹ̌ taumata l᷊awọ.”

²⁹Tangu piạ i sire nahunsẹ̌bangke wọu Yerikho, lawọ taumata timol᷊e si Yesus.

³⁰Kutẹu kai piạ tau wuta ruang katau mạhungkaiang su wiwihʼu ral᷊eng. Sarang i sire nakaringihẹ̌ u i Yesus kai sụsahe ute i rẹ̌dua němpẹ̌kuịe, ”Ahusʼi Daud, tal᷊ěntụkong kami!”

³¹Taumata l᷊awọ apang ene sene němpěhěkadẹ̌ si rẹ̌dua e kụ měsẹ̌sěding i rẹ̌dua e apakạděmmasẹ̌. Kaiso i rẹ̌dua e nakapiang pěmamansage něngalembong kaihạe lai, ”Tuang, Ahusʼi Daud, tal᷊ěntụkong kami!”

³²Mase Mawu Yesus e timaingke kụ kimui si rẹ̌dua. ”I rua e mapulu takụ kapuraneng?” kakiwal᷊ong Yesus.

³³I rẹ̌dua e němpẹ̌simbang, ”Tuang, i kami e mapulu makasilo!”

³⁴Mawu Yesus e timal᷊ěntụen dẹ̌dua e, kụ bọu nanenggehẹ̌ matan dẹ̌dua. Kụ su orasẹ̌ ene lai i sire nakasilo. Bọu e i rẹ̌dua e němpẹ̌tol᷊e si Yesus.