Read Sangir MATIUS 21 Bible Online

MATIUS 21 - Sangir bible

MATIUS 21

¹Kakạsandigeng Yerusalem tangu, i sire nahumpạu Betfage su Wukidʼu Zaitun. Sene Mawu Yesus dimolohe muritʼE ruang katau piněngal᷊imona.

²”Dakọko sol᷊ong kampong su těngone pai,” tatanatan Mawu Yesus si rẹ̌dua. ”I kamene apidʼu makasilo kalide sěmbaụ mạl᷊aikị ringangkeweng anạe. Lukako kalide ene kụ ahạ damahi.

³Kereu piạ taumata makiwal᷊ong sạbarang ute, pẹ̌bera su tau ene, ’Kai Mawu[17] měgẹ̌gausẹ̌ e,’ tangu tau e měngkatewe lighạ napakawalang kalide ene pakiwawa.”

⁴Kerene katataingu hal᷊ẹ̌ ene tadeạu misěhụ kere pinẹ̌beran nabi, u,

⁵ ”Pěhabarẹ̌ko su Sion, Datunu seng kạděntane su anunu. I Sie měngkate masanạ naunge kụ i Sie simake su kalide, kụ kai sěmbaụ anạ u kalide, kụ deng bědang kawuhuang.”

⁶Bọu e muritʼE rarua e němpẹ̌tamaịe kụ němpẹ̌koạe kerẹewe nioron Mawu e si rẹ̌dua.

⁷I rẹ̌dua němpẹ̌bawa kalide e ringangu anạe. Mase pal᷊ukang kalide e niěmpahengu kakingkaeng i rẹ̌dua e. Kụ Mawu Yesus simakẹ e.

⁸Taumata sěmbuntuang sene e němpamilạe manga kakingkaeng i sire su ral᷊eng, arawe sěnggạ ute měmpaněntọe manga lelang u kalu e kụ niantehe su tal᷊oaran dal᷊eng.

⁹ Taumata měgẹ̌gapaěng kạdal᷊enge su těngo ringangu su l᷊ikudʼi Yesus e kạpěbẹ̌bansage u, ”Biahẹ̌ Ahusʼi Daud! Al᷊amatẹ̌ e mahundingang i Sie kụ dụděnta su ral᷊ungu arengu Mawu! Pẹ̌daloko Mawu Ruata Su Marangẹ!”

¹⁰Ene, sarạeng Mawu Yesus sụsuẹ̌ e su Yerusalem, sěngkasoaěng e měngkatewe mẹ̌gẹ̌gahẹ̌, ”Kai i sai ini?” angkuěngu taumata su soa ene.

¹¹”I Sie kai Nabi i Yesus, bọu Nazaret su Galilea,” angkuěngu taumata l᷊awọ měmpạhuntaking si Yesus.

¹²Bọu e Mawu Yesus simuẹ̌ e su Wal᷊em Mawu, kụ nanokol᷊ẹ̌ patikụ taumata apang měmpẹ̌bẹ̌bawělli sene. I Sie namal᷊intuị manga medaʼm mananal᷊iu roitẹ̌ dingangu kakaianeng u mẹ̌bawal᷊ụ paluma.

¹³ Mase i Sie něhengetang si sire u, ”Su ral᷊ungu Winohẹ Susi e kạbawohẹ u Mawu Ruata e kai něhengetang, ’Bal᷊e-Ku e sarung isěbạ bal᷊e pẹ̌kakal᷊iomanengang.’ Kutẹu kahiang kamene kawe nịkakoạ baesʼu tahapěhampasẹ̌!”

¹⁴Ene piạ e manga tau wuta ringangu peosẹ̌ nahunděnta su anung Yesus su Wal᷊em Mawu, kụ i Sie napakapian sire.

¹⁵Arawe manga imang těmbonange ringangu mananěntirong agama němpẹ̌pědu nakasilo manga hal᷊ẹ̌ makạdal᷊inaụ kẹ̌koateng i Yesus. Naung i sire naral᷊akị lai ual᷊ingu nakaringihẹ̌ manga rariọ měmpẹ̌gẹ̌gio su Wal᷊em Mawu, ”Kaumburẹ̌ Ahusʼi Daud!”

¹⁶ I sire němpẹ̌berạe si Yesus, ”I Kau e makạdingihẹ̌ apa iwẹ̌beran sire?” ”Ore, Iạ makạdingihẹ̌,” ungkuěng i Yesus. ”Kai wědang ta nakạbasa i kamene Winohẹ Susi ini: ’Manga rariọ dingangu anạ deng sụsusu seng takụ nitěntiroěng kereapa mẹ̌berang daralo mapia?’ ”

¹⁷Bọu e Mawu Yesus naněntang i sire, kụ simẹ̌bang bọu soa ene sol᷊ong Betania, kụ něhědang sene.

¹⁸Sěngkariọěllone mal᷊uka-l᷊ukadẹ̌ kạpahundal᷊enge mẹ̌sul᷊e sol᷊ong soa, Mawu Yesus kai nahutung.

¹⁹I Sie nakasilo ara sěngkalu su wiwihʼu ral᷊eng. I Sie himaungke kalu ene, kutẹu kai tawe nakahombang buane sarang manga kadiongeng sěmbaụ, tumbạewen daukalune sẹ̌sane. Mase Mawu Yesus nẹ̌berạe su kalu ene, ”I kau e kumbahang delaing mẹ̌bua!” Apidʼu nahẹ̌guete kalu ene.

²⁰Tangu, sarạeng manga muritʼi Yesus nakasilo hal᷊ẹ̌ ene, i sire měngkatewe apa něngkaherang, ”Kawe kereapa hakịu kalu ene apidʼu nahěgu kěbị?” i sire nakiwal᷊o.

²¹ ”Těngadẹ̌,” angkuěng i Yesus, ”kereu i kamene mangimang kụ tawẹ goẹ̌ e ute, i kamene makakoạ apan seng takụ nikoạ su kalu ara ini. Dingangu wal᷊inewe tumbạ ene lai, kaiso i kamene mal᷊aing makapẹ̌bera su wul᷊udẹ̌ ini, ’Kasapuạko kụ kateledẹ̌ su l᷊audẹ̌’; tangu hal᷊ẹ̌ ene sarung mariadi.

²²Kụ apạewen dẹ̌dorongang i kamene su ral᷊ungu kal᷊iomaneng i kamene e, sarungbe ikatarimạ i kamene, asal᷊u i kamene měmpangimang.”

²³Bọu e Mawu Yesus nẹ̌sul᷊e sol᷊ong Wal᷊em Mawu, mase simuẹ̌ e kụ naněntiro sene. Ene i Sie kạpaněntirone, manga imang těmbonange ringangu matatimadʼu tau Yahudi e kai himaung si Sie ringangu nakiwal᷊o, ”Kai wọu kawasang apa i Kau makapěkẹ̌koạ patikụ ini e? I sai tangu nẹ̌gěllịu kawasa ene si Kau?”

²⁴Mawu Yesus simimbang, ”Iạ e mal᷊aing mapulu makiwal᷊o si kamene. Kụ kereu i kamene sumimbang bue ute, Iạ sarung mẹ̌bera si kamene u kai ringangu kawasan sai Iạ makakoạ manga hal᷊ẹ̌ ini.

²⁵I Yohanes něnahani e kai ual᷊ingu kawasan sai tangu? Mawu Ruata arau taumata?” Mase manga imang těmbonange ringangu matatimadʼu tau Yahudi ene nanětạe němpẹ̌sasinggata su tal᷊oaran lawọ i sire, ”Kereu i kitẹ sumimbahʼu, ’Ringangu kawasan Duata,’ i Sie sarung mẹ̌bera, ’Mạeng kerene unụe i kamene tawe mangimang si Sie?’

²⁶Kai kereu i kitẹ mẹ̌bera, ’Dingangu kawasan taumata,’ ute i kitẹ e kai matakụben taumata l᷊awọe, u su naung i sire kěbịe i Yohanes e kai nabi.”

²⁷Tangu i sire simimbangke si Yesus u, ”I kami e wẹ̌ga wue.” Mase Mawu Yesus něhengetangke si sire, ”Mạeng kerene Iạ e tawe lai měhabarẹ̌ si kamene u kai ringangu kawasan sai Iạ makapěkẹ̌koạ kěbị ini e.”

²⁸”Kụ kerea su pěndangeng i kamene su hal᷊ẹ̌ ini?” angkuěng i Yesus tuhụe. ”Piạko matimadẹ̌ esẹ piạ anạe esẹ duang katau. I sie himaungke su anạe kaiakanenge kụ nẹ̌bera, ’Amang, dakọko pamunara su waelʼu anggorẹ̌ e sahěllo ini.’

²⁹’Mạdiri iạ,’ angkuěngu rariọ ene. Kai wọu e i sie nẹ̌sasaul᷊e tiněnnane kụ nakoạ sol᷊ong baelʼu anggorẹ̌ e.

³⁰Bọu e matimadẹ̌ esẹ e himaung su anạe karuane, kụ mal᷊aing nẹ̌bera kerene. ’Kerenẹ e gaghurang,’ angkuěngu anạ karuane e. Kaiso i sie tawe rimal᷊eng.

³¹Kụ bọu tal᷊oarang anạ darua ene, sudẹ e měkẹ̌koạ kapulung amange?” ”Kaiakanenge,” angkuěngu manga imang těmbonange ringangu matatimadʼu tau Yahudi e. Tangu Mawu Yesus něhengetangke si sire, ”Pangimangke: Manga maghaghělle pajakẹ̌ dingangu manga wawine tahapẹ̌sundal᷊ẹ̌ kai sarung makal᷊imona makoạ kawanuan Duata e wọu i kamene.[18]

³² Ual᷊ingu i Yohanes Měnanahani e riměnta kụ mělahẹ si kamene u kai kereapa mẹ̌biahẹ̌ kere ikẹ̌kapuluʼm Mawu, kaiso i kamene tawe mangimang těntirone arawe manga maghaghělle bea ringangu manga wawine tahapẹ̌sundal᷊ẹ̌ e měmpangimang bue si sie. Kai manịeng i kamene sembeng makạsilo kěbị ene, kai i kamene mang ta nẹ̌sasaul᷊e ringangu tawe němpangimang su Mawu.”

³³ ”Pěmpẹ̌daringihẹ̌ko l᷊ai papinintu sěmbaụ ini,” angkuěng i Yesus. ”Nạung kai piạ sěngkatau taghuang ěntana nẹ̌suangkeng anggorẹ̌ su waelẹ̌. Baele nitěndakenge pinakal᷊ikụ, mase němangka l᷊ohange waugʼu pěmaměhaěng u anggorẹ̌, mase napararisịu měnara pěndariagateng. Bọu ene i sie nakitamangu sasuange anggorẹ̌ e su manga měmamunarane, mase namundal᷊ẹ̌ sol᷊ong banua wal᷊ine.

³⁴Sarạeng seng masandigʼu tempon pananipo wuang anggorẹ̌ e, taghuang ěntana e rimolohen manga ěllange sol᷊ong anum měmamunara sasuange mědeạu iapanarimạ buane wahageange.

³⁵Kutẹu manga měmamunaraʼn sasuange kai němpěnamẹ manga ěllangu taghuang bael᷊ẹ̌ e: Kụ sěngkataue nilimadẹ̌, sěnggạ pinate, arawe sěnggạe wue ute niěntungangu watu.

³⁶Taghuangu waelẹ̌ saụewe rimolohʼu manga ěllange wal᷊ine, něngalembong kal᷊awọe wọu humotong. Kutẹu i sire mal᷊aing nikakoạ kerene.

³⁷Nadehọ taghuangu waelẹ̌ e rimoloheng ahusẹ̌ esẹ e niapakakoạ sol᷊ong anun sire. ’Nal᷊ahẹu anạku e sarungbe adateng i sire,’ angkuěngu naunge.

³⁸Kai sarang měmamunara nakasilọe ahusʼu taghuang baelẹ̌ e, i sire němpẹ̌berạe sěmbaụ su wal᷊ine, ’Enekụ ěndaị taghuange. Mahịe pateěngkeng kitẹ i sie, tadeạu i kitẹ makapěnaghuang pusakạe!’

³⁹Tangu rariọ e nihěgọen sire, niwahung sul᷊ikude, mase pinate.”

⁴⁰Mawu Yesus nakiwal᷊ọe, ”Ho, kereu taghuang baelʼu anggorẹ̌ e ruměnta kạpia ute, kai pẹ̌kapuraěng e ngae manga měmamunara ene?”

⁴¹I sire němpẹ̌simbang, ”Nal᷊ahẹu i sie sarung měmate taumata raral᷊akị ene mase makitamangu waelʼu anggorẹ̌ e su taumata wal᷊ine apang měmpạngonggọbem buane si sie su tempone.”

⁴² Tangu Mawu Yesus něhengetangke si sire, ”Kai wědang ta nakạbasa ngae i kamene mạbawohẹ su ral᷊ungu Winohẹ Susi e? ’Batu niwalan tukang e seng nakoạ batu kahumotongang e. Ini e kai munaraʼm Mawu; kụ enẹewe makạnaniang kal᷊ěnggihe!’ ”

⁴³”Kụ pěmpẹ̌tahěndung,” angkuěng i Yesus, ”patikụ apan tẹ̌taghuanengu kawanuan Duata e sarung al᷊akeng bọʼi kamene kụ ionggọ su umatẹ̌ měděndal᷊eng u kapulun Duata. [

⁴⁴I saing kụ maěnsạ su watu ene, sarung maral᷊umadẹ̌; kụ i saing kaěnsakengu watu ene, sarung mararul᷊ẹ kere awul᷊ẹ̌.]”

⁴⁵Ene, sarạeng manga imang těmbonange ringangu tau Farisi e nakaringihẹ̌ papinintun Mawu Yesus ene, i sire nakaěnnạe u i Yesus kai měbẹ̌bisara mạanun sire.

⁴⁶Kụ i sire němpẹ̌deạbe měhěgo si Sie. Kaiso i sire kai mạtakụ u taumata l᷊awọe, watụ u taumata l᷊awọ měngẹ̌ngěnnau Mawu Yesus kai sěngkatau nabi.