Read Sangir MATIUS 22 Bible Online

MATIUS 22 - Sangir bible

MATIUS 22

¹Kutẹu Mawu Yesus saụewe něhengetang su taumata l᷊awọ dingangu papinintu,

²angkuěnge, ”Pẹ̌paparenta Mawu Ruata e, kakakoạe kai mẹ̌sul᷊ungu papinintu: Sěngkatau ratu namangung sal᷊iwang u pẹ̌kakawing baugʼu ahuse esẹ.

³Datu ene rimolohen manga ěllange tamai pạněnsomahẹ̌ taumata apan nihabareng su sal᷊iwang ene. Kutẹu apạewen nihabarenge kai něngkadiri riměnta.

⁴Nẹ̌saụ kapia ratu e rimolohʼu manga ěllange wal᷊ine. Tatanatane si sire: ’Pěmpěhabarẹ̌ko si sai-saing kewe ninotẹ̌ e: Kaěngu sal᷊iwange seng nasadia. Sapi, ringangu manga anạ u sapi ku karal᷊ěnggihange seng pinotọ. Kěbịe seng nauadipẹ̌. Sal᷊amate mahunděnta su sal᷊iwang u kawing!’

⁵Kutẹu kal᷊awọu sake apan ninotẹ̌ e tawe němpẹ̌sěmpị. I sire nasịdal᷊engu ral᷊enge sol᷊ong pěmamunaraěnge — sěngkatau sol᷊ong baelẹ̌, sěnggạe wue ute nẹ̌deạ pẹ̌bawal᷊ukange;

⁶arawe sěnggạete wue kawe němpěhěgo manga ěllang u ratu e, mase němpěndariha ringangu němpamate si sire.

⁷Sarạeng datu e nakaringihẹ̌ hal᷊ẹ̌ ene, i sie měngkatewe limangehẹ̌. I sie rimoloheng buntuangu mẹ̌sasekẹ e mědeạu pěmate manga tahapate ene, ringangu niapanutung soan sire.

⁸Bọu e i sie kimui manga ěllange mase něhengetang, ’Sal᷊imbang u kawinge semben sadia, kai apan ninotẹ̌ e tawe hinone nạung.

⁹Dakọko luhu e apan dal᷊eng gaghaghuwạe kụ notẹ̌ko kal᷊awọewen taumata sol᷊ong sal᷊iwang u kawing ini.’

¹⁰Tangu manga ěllange nahundal᷊engke. I sire nahundal᷊eng suapạewen dal᷊eng gaghaghuwạe kụ němpěnampungu kěbị taumata apạewen kinaẹ̌bakeng i sire sene bae mapapia, bae raral᷊aị. Tangu napenẹ e tampạu pẹ̌sasal᷊imbangenge kahian sake.

¹¹Bọu e ratu ene simuẹ̌ kimakělla manga sake. I sie nakasilo kai piạ sěngkatau su sal᷊imbang ene tawe něluhen pakeangu sal᷊imbang.

¹²Bọu ene i sie nakiwal᷊o su tau ene, ’Hapị, kawe nakakasuẹ̌ kereapa i kau sarang ini kụ kawe tawe něluhen pakeangu sal᷊imbang e?’ Tau e tawe nakawerang apa-apa.

¹³ Tangu ratu e něhengetangke su manga ěllange, ’Hapusẹ̌ko laede ringangu l᷊imane, kụ bahungko i sie sol᷊ong l᷊ikude su tampạ marěndung. Sene sarung piạ sasangị dingangu kasasigěsạ.’ ”

¹⁴Mase Mawu Yesus nangěnsuen papinintu e kere ini, ”Lawọ bue kinakuiange, kai tangu kawe mahal᷊i kinapile.”

¹⁵Tangu manga tau Farisi e němpẹ̌sohọe kụ němpẹ̌dal᷊ahintau měnsang kereapa i sire makapěngal᷊ạ bera si Yesus e ringangu manga kakiwal᷊o.

¹⁶Tangu i sire rimoloheng manga muritʼi sire sol᷊ong anung Yesus, ringangkewen pirang katau taumatang Herodes. I sire němpẹ̌berạe si Yesus, ”Tuang Guru, i kami masingkạu i Tuang kai matul᷊idẹ̌. I Tuang mạněntirowe su katěngadẹ̌ mạanun kapulun Duata waugʼu taumata, tawe mẹ̌sasasěmpịbe tiněnnan sai-sai. U i Tuang e tawe měmamile ghatin taumata.

¹⁷Ual᷊ingu ene ute, kěnang i Tuang pẹ̌bera si kami: Kereu tumuhụ atorangu agamang kitẹ, botonge měmaehẹ̌ pajakẹ̌ su Kaisarẹ̌ arau tawe wotonge?”

¹⁸Mawu Yesus masingkạ tiněnnan sire ral᷊akị ene, kụ i Sie něhengetang, ”E, i kamene taumata mẹ̌mělle! Unụe i kamene měmpanal᷊ukạ Siạ?

¹⁹Todẹko si Siạ gahịu roitẹ̌ ipẹ̌pakẹ i kamene mědeạu pěmaehẹ̌ pajakẹ̌!” Mase i sire nangonggọu roitẹ̌ sal᷊aka sěngkal᷊ěpa si Sie.

²⁰Kutẹu Mawu Yesus nakiwal᷊ọe si sire, ”Kai ghahị i sai ringangu areng i sai ini e?”

²¹”Kaisarẹ̌,” angkuěng i sire. Tangu Mawu Yesus něhengetangke si sire, ”Kamageng kerene ute, onggọe su Kaisarẹ̌ apan tẹ̌taghuanengʼu Kaisarẹ̌ dingangu su Ruata apan tẹ̌taghuanengʼu Ruata.”

²²Sarạeng i sire nakaringihẹ̌ pěndal᷊ahẹ ene, i sire naral᷊ingu. Kụ i sire němpaněntang i Yesus.

²³ Su ěllo ene lai, piạ e tau Saduki pirang katau nahunděnta su anung Yesus. I sire kai taumata nạung měmpẹ̌bẹ̌bera u taumata nate e seng tawe sarung mẹ̌bangung kapia.

²⁴ ”Tuang Guru,” angkuěng i sire, ”I Musa e naněntiro kere ini: Kereu sěngkatau esẹ e mate, kụ tạ anạe ute anạ u sěngkataune harusẹ̌ pẹ̌kawing dingangu wal᷊une tadeạu mapal᷊ěton hite waugʼu tau ěndaị seng nate e.

²⁵Nạung piạ i sire pitu tamahuari kụ němpẹ̌tanạ sini. Ene kaiakanenge nẹ̌kawing kụ bọu ene nate tawẹ anạe. Tangu wal᷊une nitěntang baugʼu anạ u sěngkataune.

²⁶Bọu e tuarine mal᷊aing nate tawẹ anạe. Hal᷊ẹ̌ kerene mal᷊aing himombang su tuarine katěllune nakahakịewen lai kapitune.

²⁷Kasamuriange ute wawine ene hala e mal᷊aing nate.

²⁸Kụ su tempon taumata nate e ipẹ̌bangung kapia e ute, kawingken sai tau wawine e? U nạung i sire pitu e seng bọu pinẹ̌kawingange.”

²⁹Mawu Yesus ute simimbangke, ”I kamene mambeng nẹ̌sal᷊a, u i kamene tawe nakaěnna Winohẹ Susi, kerene lai kawasan Duata.

³⁰Batụ u kamạgeng taumata nate e sarung mẹ̌bangung kapia ute i sire semben tawe mẹ̌kawing kaiso i sire sarung mẹ̌biahẹ̌ kere malạekatẹ̌ su sorga e.

³¹Kai wědang ta nakạbasa i kamene apa hengetangu Mawu Ruata mạanun taumata nate nipẹ̌bangung kapia? Mawu Ruata e něhengetang,

³² ’Iạ e kai Ruatang Abraham, Duatang Ishak dingangu Ruatang Yakub.’ Mawu Ruata e tangu wal᷊inewe Ruatan taumata nate. I Sie kai Ruatan taumata wiahẹ̌!”

³³Sarạeng taumata l᷊awọ ene nakaringihẹ̌ tatualagʼi Yesus, i sire měngkatewe němpẹ̌dal᷊inaụ u těntironʼE.

³⁴Ene sarạeng tau Farisi e nakaringihẹ̌ u i Yesus kai seng nakapẹ̌kěmming mohongu tau Saduki e, kụ i sire kai němpẹ̌tampung.

³⁵ Sěngkatau wọʼi sire, kai sěngkatau mananěntiro agama, kai měnangkạ si Yesus kụ mangal᷊ạ bera ringangu kakiwal᷊o sěmbua.

³⁶”Tuang Guru,” angkuěnge, ”kai tita sude kahumotongange su ral᷊ungu atorang u agama?”

³⁷ Mawu Yesus simimbang, ”Kěndagʼu Mawu Ruatanu ringangu kạguwạu naungu, ringangu kaguwạu himukudʼu, ringangu kạguwạu l᷊aěnnanu.

³⁸Kai ene tita kahumotongange ringangu kạguwakenge!

³⁹ Tita karuane ute mẹ̌sul᷊ung dingangu humotonge ute kai: Kěndagʼu sěndinganengu kerẹewe i kau kuměndagu watangengu.

⁴⁰Patikụ tita kụ nionggọ i Musa ringangkewen těntiro manga nabi e niapakaiang su tita rarua ene.”

⁴¹Kutẹu tau Farisi e nạung deng mạtatampung sene, Mawu Yesus nakiwal᷊ọe si sire,

⁴²”Kerea su tiněnnang kamene mạanun Datu Mananal᷊amatẹ̌? Kai hěnton sai tangu i Sie?” ”Hěnton Daud,” sasimbahʼi sire.

⁴³”Mạeng kerene,” angkuěng i Yesus, ”kawe unụe tangu hakịu Rohkẹ̌ u Ruata e měkẹ̌karadiahang si Daud kụ mẹ̌sẹ̌sěbạu Ratu Mananal᷊amatẹ̌ e ’Mawu’? U i Daud nẹ̌bera,

⁴⁴ ’Mawu e něhengetang su Mawuku: kaiangko su koaneng-Ku,[19] sarang Iạ mẹ̌koạ manga rumarokạu e sumasuměllung si Kau.’

⁴⁵Kutẹu kereu i Daud měsěbạu Ratu Mananal᷊amatẹ̌ e kai ’Mawu’, ute kereapa wue i Sie hěnton Daud?”

⁴⁶Tawẹu sarang sěngkatau nakakasimbahẹ̌ si Yesus. Kụ nanětạ bọu ěllo ene tawẹu wahani makiwal᷊o manga apa l᷊ai si Sie.