Read Sangir MATIUS 24 Bible Online

MATIUS 24 - Sangir bible

MATIUS 24

¹Sarạeng Mawu Yesus dimal᷊engke naněntangu Wal᷊em Mawu e, tangu manga muritʼE himaung si Sie kụ němpaněbọeng saheng kakakoạ u Wal᷊em Mawu e si Sie.

²Kutẹu i Yesus něhengetang si sire, ”Nakasilo wue patikụ ene i kamene? Kasingkạko, mambeng těngadẹ̌ u, tawẹu watu sarang sěmbaụ bọu manga wal᷊e tamai ini e bẹ̌dang mawala mạdal᷊ěnsung sěmbaụ su wal᷊ine, su ěnnạe. Kěbịe sarung těnnehang.”

³Bọu e Mawu Yesus simaka sol᷊ong Bukidʼu Zaitun, tangu piạ e i Sie mạiang, manga muritʼE himaungke mědeạu mahumbisara ringangʼE mẹ̌těngo. ”Pěhabarẹ̌ko si kami kụ kai angerẹ tempone patikụ ene sarung mariadi,” angkuěng i sire si Sie. ”Kai mangạe tatiala apa ngae pělahekangu rarěntan Tuang dingangkewe lai kasueěngu runia?”

⁴Mawu Yesus simimbang, ”Pakapapia wue, kumbahangbe sarung i kamene kaakal᷊eng.

⁵Batụ u taumata l᷊awọe sarung měmpẹ̌děnta ringangu areng-Ku kụ měmpẹ̌bera, ’Kai Iạ e Ratu Mananal᷊amatẹ̌!’ I sire kai sarung měngakal᷊ẹ̌ taumata l᷊awọ.

⁶I kamene sarung makaringihẹ̌ tingihu pẹ̌sasekẹ e dingangu habarʼu pẹ̌sasasekẹ e, kaiso abe kěngkatakụ. U kěbị ene mang harusẹ̌ mariadi, kai ene wal᷊inewe tempone seng mẹ̌kiamatẹ̌.

⁷Bansa sěmbaụ sarung mẹ̌sekẹ dumokạ bansa wal᷊ine, dingangu kararatuang sěmbaụ sarung měngalo kararatuang bal᷊ine. Kụ suapan tampạ sarung piạ karal᷊unusẹ̌ dingangu mělinuhẹ̌.

⁸Kụ patikụ ene wuhụewe panẹ̌takenge, kere tědụ u sěngkatau wawine su tempon měhěnding.

⁹ Bọu e i kamene sarung samekang kụ isarakang mědeạu pahangeng dingangu pateěng. Patikụ dunia e sarung měmpẹ̌binsị i kamene ual᷊ingu i kamene kai muritẹ̌-Ku.

¹⁰Su tempo ene sarung mal᷊awọ taumata měmpẹ̌sohọ dingangu mẹ̌daral᷊aị ore lai měmpẹ̌binsị sěmbaụ dingangu wal᷊ine.

¹¹Lawọ mahang nabi sarung měmpẹ̌lěto, kụ makaakal᷊ẹ̌ taumata l᷊awọ.

¹²Karal᷊akịe mangken mạhuntinambang katoghase hakịu taumata l᷊awọe selaing tawe makakoạ mẹ̌kakěndagẹ̌.

¹³ Arawe i saịewen mạtatanạ satia sarang pangěnsueěnge ute sarung iapakasal᷊amatẹ̌.

¹⁴Kụ Injilẹ̌ e mạanung kereapa Mawu Ruata mẹ̌parenta ute sarung ihabarẹ̌ su kaguwạu dunia, tadeạu patikụ umatẹ̌ e makaringihẹ̌. Mase wuhụewe ruměnta kiamatẹ̌.”

¹⁵ ”I kamene sarung makasilo, ’Karal᷊akisẹ̌ kụ makawihua’, kere ilẹ̌habarʼi Nabi Daniel, dụdarisị su tampạ susi. (Kaketạ suapam mẹ̌bawasane: Ěnnaiko kaia mangal᷊ene!)

¹⁶Su tempo ene i saing ene su Yudea harusẹ̌ tumal᷊ang sol᷊ong bawul᷊udange.

¹⁷ I sain su wowong atụ u wal᷊e abe lintụ měngal᷊ạ apa-apa wọu ral᷊ungu wal᷊e.

¹⁸I sain su waelẹ̌ abe pẹ̌sul᷊e měngal᷊ạ l᷊akụe.

¹⁹Kạěngkěhang ěllo ene su manga wawine piạ kapapia, ringangu su manga wawine kạpanusune rariọ!

²⁰Pěmpẹ̌kal᷊iomanengko tadeạu kumbahang sarang i kamene harusẹ̌ tumal᷊ang su tempong pẹ̌dasehang arau su ěllon Sabatẹ̌!

²¹ Su ěllo makạgaghěnggang ene sarung piạ kasasusa masaria kerẹewe wẹ̌dang ta nạdiadi rokeng bọu tětạu dunia sarangkewen orasẹ̌ ini, ringangu selaing tawe mẹ̌saụ.

²²Kai manga Mawu Ruata e tawe mangěsọ tempone ute; tawẹ u sarang sěngkatau masal᷊amatẹ̌. Kai ual᷊ingu umatʼE, ute Mawu Ruata e nangěsọ u tempo ene.

²³Kụ su tempo ene kereu piạ sěngkatau mẹ̌bera si kamene, ’Kakělla, Ratu Mananal᷊amatẹ̌ e ěndaung sini!’ arau ’i Sie paị sene!’ — ute abe pěmpangimang su tau ene.

²⁴U kai sarung luměto mahang kristus e ringangu mahang nabi. I sire sarung měmpẹ̌koạ manga hal᷊ẹ̌ makadal᷊inaụ dingangu makạl᷊aherang mědeạu makaakal᷊ẹ̌, sěngapam botonge sarang su kawanuan Duata ewe lai.

²⁵Kụ, pẹ̌tahěndungko! U Iạ e seng něhabarẹ̌ si kamene kal᷊amona těntal᷊ang hal᷊ẹ̌ ene ta nạdiadi.

²⁶ Kereu piạ u mẹ̌bera si kamene, ’Kakělla, i Sie ene pai su wanua l᷊inggi!’ — kumbahang i kamene tamai. Arau kereu i sire měmpẹ̌bera, ’Kakělla, i Sie měkẹ̌kěmbuni su ral᷊ungu kamarẹ̌ ěndaị sini e!’ — ute abe pangimang.

²⁷U rarěntang Ahusʼu Taumata e kai mẹ̌sul᷊ungu sěnnang u kilạ bọu sěmběkan daki, kụ mạtuahẹ̌ sol᷊ong sěmběkam bahẹ.

²⁸ Suapan piạ kasuang ute sene piạ manụ tahapanemọ kasuang.”

²⁹ ”Tangu lěpasewen napal᷊usẹ̌ kasasusan tempo ene ute, matangěllo e sarung marěndung, dingangu wul᷊ang e seng tawe suměnnang. Manga wituing e sarung měngkahondosẹ̌ bọu l᷊angị, dingangu kal᷊awọu mangangawasa kinoaěng e sarung mẹ̌kal᷊emboghang.

³⁰ Bọu e tatialang Ahusʼu Taumata e sarung ikasilo su l᷊angị. Su tempo ene patikụ umatẹ̌ su dunia e sarung mahul᷊ungkang. I sire sarung makasilo Ahusʼu Taumata kạděntane su wowom binawa ringangu kawasa ringangu kawawantugẹ̌ masěllahẹ̌.

³¹Napiri gaghuwạe sarung tiukang, kụ Ahusʼu Taumata sarung měndolohʼu manga malạekatẹ̌ ipangomol᷊ẹ̌ kawanuanʼE wọu kěbị bukun dunia ěpạ e, dingangu wọu pungu l᷊angị sěmbaụ sarang pungu l᷊angị bal᷊ine.”

³²”Pěngal᷊ạko těntiro wọu kalung ara, kereu manga hakondane kawe melong dingangu masasikome, ringangu manětạe humětị, i kamene masingkạu tempom pědisẹ̌ e seng marani.

³³Kerene lai kereu i kamene makasilo hal᷊ẹ̌ tamai ene mariadi, i kamene masingkạu tempone seng masandi-sandigẹ̌.[21]

³⁴Kasingkạko! Hal᷊ẹ̌ tamai ene sarung mariadi těntal᷊ang taumata apan měbẹ̌biahẹ̌ orasẹ̌ ini e, měngkairị kěbị.

³⁵Langị dingangu dunia e sarung mapaghohẹ̌, arawe wawera-Ku e tatapẹ̌ sarang marěngụ-děngụ.”

³⁶”Tawẹu masingkạ měnsang angerẹ ěllone ringangu orase, manga malaekatẹ̌ su sorga e wěga, Ahusʼu Taumata e mal᷊aing běga,[22] samatang i Amang tumbạ masingkạe.

³⁷ Kamageng Ahusʼu Taumata e ruměnta ute, kakakoạe kai mẹ̌sul᷊ungu su tempong Nuh nạung.

³⁸Su pira ěllo těntal᷊ang ta nědẹ̌darulung gẹ̌guwạe, taumata e mạhungkaěng měmpạnginung dingangu měmpẹ̌kẹ̌kawing. Kerene sěntiniạ sarạeweng nịdating u ěllon Nuh nasake su ral᷊ungu kapal᷊ẹ̌.

³⁹ Sarạeng darulunge nangelọe si sire kěbị buhụe i sire nakahěngangu kaia seng nariadi. Kerene lai kakakoạe sarung kereu Ahusʼu Taumata e ruměnta.

⁴⁰Su tempo ene piạko ruang katau su waelẹ̌ kạpamunarane: Sěngkataue sarung paringaneng, arawe sěngkataụe wue itěntang.

⁴¹Manga wawine ruang katau e kạpěnggilinge gandung: Sěngkatau paringaneng, sěngkataụewue itěntang.

⁴²Tangu pakal᷊ahěkosẹ̌ bue, u i kamene wẹ̌ga wue měnsang angerẹ Mawunu sarung duměnta.

⁴³ Pẹ̌tahěndungko ini! Kereu manga taghuangu wal᷊e e masingkạu kai pukul᷊ẹ̌ pira su hěbi kụ piạ tahatako e sarung duměnta, ute i sie tawe mẹ̌tikị, tadeạu tahatako e tawe sumuẹ̌ sol᷊ong dal᷊ungu wal᷊ene.

⁴⁴Ual᷊ingu ene, i kamene mal᷊aing pakarariahi. Batụ u Ahusʼu Taumata e sarung duměnta su orasewe i kamene tạ pěngangantibe.”

⁴⁵Angkuěngu Mawu Yesus kapia, ”Kamageng kerene, kai ěllang sude masatia ringangu matahuěnna? Seng i sie niruị u mawune nakoạ těmbonang u manga ěllang bal᷊ine; tadeạu i sie mangonggọu kaěng si sire su tempone.

⁴⁶Kariangkamang su ěllang ene kamageng kawal᷊ikangu mawune, kụ i sie kahombangengbe kapẹ̌koạe munarane.

⁴⁷Pangimangke, u mawune sarung manarakangu kal᷊awọu rarotonge su ěllang ene.

⁴⁸Kai kereu ěllang ene kawe ral᷊akị ute, i sie sarung mẹ̌bera su ral᷊ungu naunge,

⁴⁹’Mawuku bědaweng marěngụ mẹ̌bal᷊ị,’ kụ i sie nanětạe namal᷊ọ manga ěllang bal᷊ine, mase kimaěng nanginung dingangu tahapẹ̌těngkiwukang.

⁵⁰Bọu e mawune sarung mẹ̌bal᷊i su ěllo ringangu orase ta l᷊aantiwange.

⁵¹Tangu ěllang ene sarung bẹ̌bawẹ̌bahengu[23] mawune, kụ iwahung sol᷊ong tampạu taumata mělle. I sire sarung mahunsangị dingangu mẹ̌tatahangu sigěsạ paịse.”