Read Sangir MATIUS 27 Bible Online

MATIUS 27 - Sangir bible

MATIUS 27

¹Deng mal᷊uka-l᷊ukadẹ̌, kal᷊awọu imang těmbonange ringangu matatimadʼu tau Yahudi nẹ̌sěngkanaungke mamate Mawu Yesus.

²I sire něhapusẹ̌ si Sie, ringangu nẹ̌bawa si Sie, wọu e něnarakang i Sie si Pilatus, guběrnurẹ̌ paparentaengu Roma.

³ Ene i Yudas tahapẹ̌sunial᷊ẹ̌ ene nakasilọe u i Yesus seng nihukung, i sie nẹ̌sasěsilẹ̌. Mase i sie něnul᷊ẹeng doitẹ̌ sal᷊aka těllung pul᷊o su kal᷊ěpane ene su manga imang těmbonange ringangu matatimadʼu tau Yahudi.

⁴I sie nẹ̌berạe, ”Iạ e mamben nẹ̌dosa, watụ u něnarakangu tau tạ sal᷊ane, sarang i Sie nihukungu papate!” Kai i sire němpẹ̌simbang, ”Kaia gunane si kami? Ene kai hal᷊ẹ̌ u!”

⁵I Yudas něhipen doitẹ̌ ene su Wal᷊em Mawu, mase nẹ̌těngkawitingu watangenge.

⁶Manga imang těmbonange němpangemongke roitẹ̌ ene kụ němpẹ̌bera, ”Doitẹ̌ ini e kai roitʼu raha. Tumuhụ toratẹ̌ e, doitẹ̌ ini e kai kumbahang isowa su ral᷊ungu tampạu sasěmba su Wal᷊em Mawu.”

⁷Mase sarạeng i sire sěngkanaungke, i sire něngal᷊ạ doitẹ̌ e piněmělli ěntana kụ isẹ̌sẹ̌bạ Ěntanang Mẹ̌kakoạ Kuring. Ěntana ene nịkakoạ pěndal᷊ẹ̌bingangu taumata raghị.

⁸Ual᷊ingu ene hakịu sarang orasẹ̌ ini e ěntana ene nisěbạ ”Ěntanang Daha”.

⁹ Ual᷊ingu ene, nisěhụe kere seng nipaul᷊ịu Nabi Yeremia, u, ”I sire něnarimạ doitẹ̌ sal᷊aka těllum pul᷊o su kal᷊ěpane, u kai arẹ̌ga pinẹ̌kiren tau Israel kere wawaehẹ̌ baugʼi Sie.

¹⁰Kụ doitẹ̌ ene nịpapakẹ i sire piněmělli Ěntanang Mẹ̌kakoạ Kuring e, kerẹewe seng niorong Mawu e si siạ.”

¹¹Piạ i Yesus nẹ̌těngom Pilatus, guběrnurẹ̌ u wanua ene, i Pilatus nakiwal᷊o, ”I Kau e ratun tau Yahudi?” ”Kere niweranu,” angkuěngu Mawu Yesus.

¹²Arawe nạung piạ e manga imang těmbonange ringangu matatimadʼu tau Yahudi e měnẹ̌nokeng kal᷊awọu laěnsilẹ̌ su Mawu Yesus, kai i Sie tawe simimbang sarang sěngkamohong.

¹³Ual᷊ingu ene i Pilatus nẹ̌berạe si Sie, ”I Kau kai ta nakaringihẹ̌ kal᷊awọu laěnsilʼi sire si Kau?”

¹⁴Kai Mawu Yesus e tawe simimbang kadiongeng sěngkamohong hakịu guběrnurẹ̌ e naral᷊ingu tạ sihinge.

¹⁵Su apan tempong Sal᷊imbang u Paskah e, guběrnurẹ̌ kai piạ tundune mạměllọu sěngkatau wọu tal᷊oaran taumata mạtatahungkụe walạewe tuhụ pinilen taumata l᷊awọe.

¹⁶Su tempo ene piạ sěngkatau taumatang hukumang pinẹ̌tateleng. Arenge i Yesus Barabas.

¹⁷Tangu piạ e taumata l᷊awọe natampungke, i Pilatus nakiwal᷊ọe si sire, ”Kai i sai tangu su kapulung kamene e takụ ipěllọ? I Yesus Barabas arau i Yesus isẹ̌sěbạ si Kristus?”

¹⁸I Pilatus nẹ̌bera kerene u i sie kai masingkạu manga mangangawasa tau Yahudi e němpěnarakang i Yesus si sie ual᷊ingu i sire němpananoi.

¹⁹Su tempong Pilatus kụkaiang su wal᷊eng mělahukung, kutẹu kawinge timanatang ini si sie, ”Kumbahang i kau mẹ̌těngkal᷊aụ pěrkarang tau tạ sal᷊ane ene, batụ u kai ual᷊ingu i Sie, iạ nipi ral᷊aị ěllo ini.”

²⁰Kai manga imang těmbonange ringangu matatimadʼu tau Yahudi e měngkai měmpạnahowong taumata l᷊awọ ene mẹ̌deạu i Barabas pakịpěllọ kụ Mawu Yesus pakịpate.

²¹Mase guběrnurẹ̌ saụ kapia nakiwal᷊o si sire, ”I sai su kapulung kamene takụ pěllokang bọu tal᷊oaran dẹ̌dua ěndaịe?” ”I Barabas,” angkuěng i sire.

²²”Kamageng kerene ute, iạ kai hinong mẹ̌koạ a si Yesus isẹ̌sěbạ si Kristus e?” angkuěng i Pilatus si sire. ”Kuruise i Sie!” angkuěng i sire kěbị.

²³”Kawe apa pẹ̌sasal᷊anʼE tangu?” angkuěng i Pilatus. Mase i sire němpamansagẹ̌ limembong kaihạe lai, ”Kuruise i Sie!”

²⁴ Nạdehọ i Pilatus nakahěngangke u i sie tawe lai makakoạ apa-apa ringangu i sire kawe sarung měmpẹ̌ganohạ. Ene i sie něngal᷊ạe akẹ, kụ su těngon taumata l᷊awọ ene i sie nanguhasẹ̌ l᷊imane ringangu kạpěberane, ”Iạ e tawe makatal᷊udẹ̌ su papaten tau ini! Ene kai kasingkạ i kamene!”

²⁵Kutẹu taumata l᷊awọe němpẹ̌simbangke, ”Ore, walạe si kami ringangu manga anạ i kami e kahombangengu hukumang su papatene!”

²⁶Mase i Pilatus naměllọeng Barabas baugʼi sire, kụ dimolohʼu taumata pinělimadẹ̌ Mawu Yesus dingangu nanarakang i Sie mědeạu pakịkuruisẹ̌.

²⁷Bọu e manga sordadom Pilatus němpẹ̌bawa si Yesus simuẹ̌ su wal᷊eng lawọ u guběrnurẹ̌, kụ kạguwạu wuntuangu sordado e nẹ̌komol᷊ẹ̌ něliwung Mawu Yesus.

²⁸I sire němpẹ̌luạ pakeangu Mawu Yesus, kụ pinẹ̌kakingkaengu kakingkaeng kamumụ si Sie.

²⁹I sire němpělokongu paporong bọu manga lelangu kalu piạ hanggange, kụ tinakạ i sire su těmbọu Mawu Yesus. Bọu e pinakiumpaedʼi sire těking sěmpědi su l᷊imanʼE koaneng, kụ němpamul᷊angeng su těngonʼE, kụ němpẹ̌taghunalangken Sie. ”Tabeạ Datun Tau Yahudi!” angkuěng i sire.

³⁰I sire němpěngědụe si Sie, kụ nangal᷊ạe těking sěmpědi ene, mase nipěměbahẹ̌ si Sie su těmbọʼE.

³¹Bọuten němpẹ̌taghunalang si Sie, i sire němpěluạe kakingkaeng kamumụe wọu e niluheěngken pakeange kapia. Bọu e i Sie niwawa sol᷊ong likude mẹ̌deạu ipakikuruisẹ̌.

³²Su tal᷊oarạen dal᷊eng, i sire němpẹ̌sěmạeng sěngkatau wọu Kirene arenge i Simon. I sire něnihasạen tau ene iapạmasaěng kuruisʼi Yesus.

³³Bọu ene i sire nahumpạe su tampạ sěmbaụ isẹ̌sěbạ Golgota, mangal᷊ene ”Tampạu Raran Těmbọ”.

³⁴ Su tampạ ene i sire napěnginung i Yesus anggorẹ̌ nilaukangu pědu. Kai sarạeng Mawu Yesus bọu nẹ̌temang anggorẹ̌ e i Sie nạdirịe nanginung.

³⁵ Bọu e i sire němpanguruise si Sie, kụ němpẹ̌papahiạen pakeangʼE kụ pinẹ̌dal᷊ahurị.

³⁶Mase i sire nahungkaiangke němpěhapa si Sie sene.

³⁷Su lantehu těmbọʼE i sire nẹ̌taingu wohẹ laěnsilẹ̌ si Sie kerei: ”Ini e kai i Yesus, Datun Tau Yahudi”.

³⁸Dingangu Mawu Yesus e, piạko l᷊ai tahapate ruang katau nikuruisʼi sire, sěngkatau su sěmběkane koaneng, sěngkatauewe lai su sěmběkane kaihi.

³⁹ Taumata apan sụsahe sene měmpẹ̌pakilingu těmbọ i sire[27] kapẹ̌lẹ̌hinakange Mawu Yesus.

⁴⁰ I sire kapẹ̌berane, ”I Kau mapulu měnggoghahẹ̌be Wal᷊em Mawu, kụ mamětị kapia su ral᷊ungu těllu ěllo! Kereu i Kau kai Ahusʼu Ruata ute ěnnạe e rěllusẹ̌ bọu kuruisẹ̌ ene, kụ pẹ̌těngkasal᷊amateng batangengu.”

⁴¹Kerene lai manga imang těmbonange ringangu manga mananětiro agama e ringangkewen manga matatimadʼu tau Yahudi měmpěbẹ̌baheaun Mawu Yesus. I sire němpẹ̌bera u,

⁴²”I Sie makạsal᷊amatẹ̌ taumata wal᷊ine, arawe watangengʼE sẹ̌sane, i Sie seng tawe makasal᷊amatẹ̌! Kereu i Sie kai ratuwen tau Israel ute mạpiangbe i Sie pẹ̌těngkarěllusẹ̌ bọu kuruisẹ̌ ene buhụe i kami mangimang si Sie.

⁴³ I Sie mạngimang su Mawu Ruata, kụ nẹ̌berau i Sie kai Ahusʼu Ruata. Ho, ene i kitẹ deng měmanda měnsang Duata e makasal᷊amatẹ̌be si Sie ini e.”

⁴⁴I rẹ̌dua tahapěhampasẹ̌ nikuruisẹ̌ dingangʼE mal᷊aing měmpělẹ̌hinakang si Sie kerene.

⁴⁵Ene, ěllo e mal᷊ětu, karěngụe těllung kaorasẹ̌, kaguwạu wanua ene měngkatewe narěndung.

⁴⁶ Ene mangạe pukul᷊ẹ̌ tatěllu wawěllo, Mawu Yesus nẹ̌kiạ dingangu tingihʼE maihạ, ”Eli, Eli lama sabakhtani?” kụ mangal᷊ene, ”O Ruataku, o Ruataku, unụe i Kau naněntang u Iạ e?”

⁴⁷Pirang katau sene nakaringihẹ̌ kakiạ ene, kụ němpẹ̌bera, ”I Sie mẹ̌kẹ̌kui si Elia!”

⁴⁸ Sěngkatau wọʼi sire měngkatewe nẹ̌bal᷊ikěkasẹ̌ tamai něngal᷊ạ bungan saghẹ kụ nilaehe su anggorẹ̌ mahaesẹ̌. Mase kahian sie nịsasusụe su kotọu kalu sěmpědi kụ niwuhane su wiwihʼu Mawu Yesus.

⁴⁹Arawe angkuěngu wal᷊ine e, ”Pěngampal᷊ẹ̌ko, i kitẹ deng kumakělla měnsang i Elia sumongo měngambang si Sie!”

⁵⁰Ene Mawu Yesus saụewe nẹ̌kiạ maihạ-ihạ, mase něminsul᷊u singongonʼE pěngěnsueěnge.

⁵¹ Gorden kạsasangẹ su ral᷊ungu Wal᷊em Mawu e natingkasẹ̌ napahiạ darua wọu rasị sarang bawa. Banua e nělinuhẹ̌ kụ manga wukidẹ̌ batu e nawawẹ̌ka.

⁵²Manga l᷊ěbing něngkatope, kụ l᷊awọ badang u masasusi nate e, nẹ̌bangung kapia.

⁵³I sire nahunsěbangke wọu manga lěbinge sarạeng i Yesus nẹ̌bangung bọu papatenʼE, kụ i sire nahunsuẹ̌ su Yerusalem. Kụ sene lawọ taumata nakasilo si sire.

⁵⁴Těmbonangu sordado ringangkewen manga sordado apạen mělẹ̌hapa si Yesus mangkewen něngkatakụ tạ sihinge sarang nakasilo l᷊inuhẹ̌, dingangu apạewen nariadie. I sire němpẹ̌berạe, ”Mambeng těngadẹ̌, i Sie ini kai Ahusʼu Ruata!”

⁵⁵ Sene piạko l᷊ai manga wawine lawọ měmpẹ̌kẹ̌kakẹ̌lla wọu marau. Kai i sire ene nạung nahuntol᷊e si Yesus mẹ̌tangkiang si Sie rokeng bọu Galilea.

⁵⁶Su ral᷊unge kai i Maria Magdalena, i Maria i ninang i Yakobus dẹ̌duan Yusup, dingang i ninangu manga anạ i Zebedeus.

⁵⁷Hěbi ene riměntạ e sěngkatau kalạ bọu Arimatea, kụ arenge i Yusupẹ̌. I sie mal᷊aing tumatol᷊e si Yesus.

⁵⁸I sie nakoạ sol᷊ong anung Pilatus kụ nẹ̌dorong bal᷊unangu Mawu Yesus. Mase i Pilatus nẹ̌parentạe tadeạu wal᷊unang u Mawu Yesus pakịgěllị si sie.

⁵⁹Tangu i Yusup nangal᷊ạe wal᷊unangʼE kụ nipikungu hekạ al᷊usẹ̌ leneng buhu.

⁶⁰Mase i sie něngomol᷊em bal᷊unang u Mawu Yesus su l᷊ěbing tataghuanenge, nạung seng těbe nipakange su wukidẹ̌ batu. Bọu e i sie nělungging batu masaria sěmbaụ, kere lahěping tukadʼu l᷊ěbinge, mase i sie napul᷊ẹ.

⁶¹I Maria Magdalena ringangu i Maria wal᷊ine mạhungkaiang sene tụtatěngo l᷊ěbing ene.

⁶²Tangu su sěngkariọěllone su ěllon Sabatẹ̌, manga imang těmbonange ringangu manga tau Farisi sěngkapahunděnta nẹ̌sombang i Pilatus,

⁶³ kụ nẹ̌bera, ”Mawu, i kami nakatahěndung su tempong i anu kontiang ene wědang biahẹ̌, i Sie kai wọu nẹ̌bera u, ’Mal᷊iun těllu ěllo Iạ e sarung mẹ̌bangung.’

⁶⁴Ual᷊ingu ene, pẹ̌parentako taumata pěhapa lěbing ene pakapia-pia sarang katěllu ěllone, mạdiringu manga muritʼE makatako wal᷊unang u wadange kụ nẹ̌bera su taumata u i Sie kai seng nẹ̌bangung kapia wọu papatene. Kụ pěmamitaugẹ̌ pangěnsueěnge ini sarung limembong karal᷊akịe wọu humotong e.”

⁶⁵”I kamene piạ be sordadong kamene měndal᷊ukadẹ̌,” angkuěng i Pilatus si sire, ”dakọe riagate pakasěgadẹ̌ lẹ̌binge sěngapam botonge.”

⁶⁶Mase i sire nakoạe sol᷊ong lěbinge, němpanegelẹ̌ lahěping tukadẹ̌, mase nipělloěngu měndariagạe su těngone tadeạu tawe makapěnggohaeng su l᷊ěbing e.