Read Sangir MATIUS 4 Bible Online

MATIUS 4 - Sangir bible

MATIUS 4

¹ Bọu e Mawu Yesus niahạ u Rohkẹ̌ u Ruata sarang banua l᷊inggi tadeạu pakisal᷊ukate su setang.

²Ěpạ u pul᷊o su ěllone ringangu ěpạ u pul᷊o su hěbine Mawu Yesus tawe kimaěng. Nạdehọ i Sie nakapěndangke nahutung.

³Setang himaungke bọu e nẹ̌bera, ”O kai i Kau Ahusʼu Mawu Ruata e ěng? Ho, pangorọe manga watu tamai e apakakoạ borotẹ̌.”

⁴ Mawu Yesus simimbangke, ”Su ral᷊ungu Winohẹ Susi mạbawohẹ: Taumata tawe makapẹ̌biahẹ̌ kětạeng bọu borotẹ̌ samatang, kaiso mal᷊aing bọu patikụ hengetang, kụ nipěhengetangu Mawu Ruata.”

⁵Kutẹu setange namaringangken Mawu Yesus sarang Yerusalem, soa susi, kụ napararisị i Sie sene su wowom pusigʼu Wal᷊em Mawu.

⁶ Mase setange nẹ̌berạe si Sie, ”I Kau kai Ahusʼu Ruata arau? Mageng kerene ute pẹ̌těngkanawọe; u su ral᷊ungu Winohẹ Susi kai mạbawohẹ kere ini, ’Mawu Ruata e sarung mẹ̌parenta manga malạekatẹ̌ pěndiagạ si Kau, kụ i sire sarung měmpěnal᷊endengu l᷊iman sire si Kau, tadeạu laedʼu mal᷊aing tawe masangkong su watu.’ ”

⁷ Mawu Yesus simimbang, ”Kai su ral᷊ungu Winohẹ Susi mal᷊aing kạbawohẹ, ’Kumbahang i kau měnal᷊ukạ Mawu Ruatanu.’ ”

⁸Bọu ene setang namaringang Mawu Yesus sarang bul᷊ude marangẹ-dangẹ kụ napatodẹ u kal᷊awọu kararatuangu dunia e ringangkeweng kěbị kakakalạe si Sie.

⁹Mase setange nẹ̌bera su Mawu Yesus, ”Kěbị ini e sarung takụ ionggọ si Kau, kereu i Kau mẹ̌tumpěkuhẹ̌ mẹ̌suba si siạ.”

¹⁰ Mawu Yesus simimbangke, ”Pamehọe i kau setang! Su ral᷊ungu Winohẹ Susi mạbawohẹ: I kau pangadatẹ̌ko Mawu Ruatanu, dingangu pẹ̌tahamawu si Sie sidutu!”

¹¹Nạdehọ setange naněntangkeng Yesus, kụ manga malạekatẹ̌ mal᷊aing nahunděnta němpẹ̌tangkiang si Sie.

¹² Suapan nakaringihẹ̌ʼu i Yohanes kai nitahungkụ, Mawu Yesus nělingkạ sarang Galilea.

¹³ Mawu Yesus naněntangu Nazaret, mase natanạ su Kapernaum su wiwihʼu Ranong Galilea su wanuan Zebulon dingang i Naftali.

¹⁴Ual᷊ingu Mawu Yesus nẹ̌koạ kerene, ute nisěhụe apan nitěbal᷊u Nabi Yesaya, bawal᷊one:

¹⁵ ”Ěntanang Zebulon dẹ̌duan Naftali su ral᷊eng sol᷊ong dano, su sěmběkang Sal᷊ụ u Yordan, Galilea e nakoạ ěntanang taumata wal᷊ine Yahudi!

¹⁶Bansa kụ měbẹ̌biahẹ̌ su ral᷊ungu kararěndung seng nakasilo tualagẹ̌ mahamagẹ̌! Apan mětẹ̌tanạ su kararěndungu papate e nịsasarangengu sěnnangu tualagẹ̌!”

¹⁷ Nanětạ orasẹ̌ ene Mawu Yesus něhabarʼu, ”Pěmpẹ̌tobate wọu kal᷊awọu rosang kamene, batụ u semben tạ kararěngụe Mawu Ruata e sarung mẹ̌parenta kere sěngkatau Ratu!”

¹⁸Ene Mawu Yesus rụdal᷊engke su apengu Ranong Galilea e, i Sie nakasilo měnanoma ruang katau, i Simon (kụ lai isẹ̌sěbạ si Petrus) dingangu tuarine i Andreas. I rẹ̌dua kạpěnẹ̌nomane su rano.

¹⁹Mawu Yesus něhengetang si rẹ̌dua, ”Mahịe tol᷊e Siạ kụ Iạ deng maněntiro si kamene měnoma taumata.”

²⁰I rẹ̌dua měngkatewe naněntangu soma mase němpẹ̌tol᷊e su Mawu Yesus.

²¹Mawu Yesus rimal᷊engke, mase nakasilo l᷊ai si rẹ̌dua tahatuari wal᷊ine, kụ kai i Yakobus rẹ̌duang Yohanes, anạ i Zebedeus. I rẹ̌dua sěngkapěnaming soma ringang i amang i rẹ̌dua su ral᷊ungu sakaeng. Mawu Yesus mal᷊aing nẹ̌kui si rẹ̌dua,

²²kụ i rẹ̌dua měngkatewe němpaněntangu sakaeng dingang i amang i rẹ̌dua e, mase timol᷊e Mawu Yesus.

²³ Su Galilea, Mawu Yesus naměpidẹ̌ kạguwạu wanua ene ringangu naněntiro su manga wal᷊eng pẹ̌kakal᷊iomanengang. I Sie mělẹ̌habarʼu Injilẹ̌, u Mawu Ruata e sarung mẹ̌parenta. Dingangu i Sie mal᷊aing napakapian masasakị, dingangu apạewen piạ kurangu wadange.

²⁴Habarẹ̌ mạanun Mawu Yesus e timeleng su kạguwạu wanuan Siria, hakịu l᷊awọ taumata nahunděnta su anunʼE. I sire němpangěntudẹ̌ kal᷊awọu taumata masasakị dingangu l᷊ụl᷊ahunsusa. Taumata apan niwal᷊iuang u rohkẹ̌ dal᷊aị, apan piạ sakị u wawi ringangu peosẹ̌, kěbịe niapakapiang Yesus.

²⁵Měngkate apa l᷊awọ taumata nahuntol᷊e Mawu Yesus su tempo ene. Piạben diměnta wọu Galilea, piạben bọu Soa Mapul᷊o, wọu Yerusalem, wọu Yudea, dingangu l᷊ai wọu soa su sěmběkang Yordan.