Read Sangir MATIUS 8 Bible Online

MATIUS 8 - Sangir bible

MATIUS 8

¹Ene Mawu Yesus narěsungke wọu wul᷊ude e, i Sie nitol᷊eěngken gapaěngu taumata l᷊awọ.

²Arakutẹu riměntạe tau piạ sakịe su pisị makatatakụ.[6] I sie nẹ̌suba su těngom Mawu Yesus, kụ nẹ̌bera, ”Tuang, kereu wotonge, apakaul᷊eko iạ.”

³Tangu Mawu Yesus nanenggeheng limane si sie apidʼu kạpěberane, ”Iạ mapulu. Kapiạe!” Kụ orasẹ̌ ene lai sakịe nailang.

⁴ Mase angkuěngu Mawu Yesus si sie, ”Pakatahěndung! Abe pẹ̌běke si sai-sai. Kaiso pětěngkatodẹko su imang kụ gause i sie pěnahutěngadẹ̌kong kau u, kawe seng naul᷊e. Bọu ene pangěntudẹ̌be sasěmba ilẹ̌oron Musa e, makoạ tatahutěngadẹ̌ su těngon sire u i kau e mamben těngadẹ̌ seng naul᷊e wọu sakị!”

⁵Sarạeng Mawu Yesus nasuẹ̌ e su Kapernaum, piạ e těmbonangu sordadong Roma e riměnta mẹ̌sombang i Sie, kụ kimahiorọe.

⁶”Tuang,” angkuěngu těmbonang ene, ”ěllangku e masakị su wal᷊e. I sie nipeose, rụdal᷊oka kụ mambeng matědụ.”

⁷Angkuěngu Mawu Yesus, ”Iạ e tamai mapakapian sie.”

⁸”Seng tawahal᷊uasẹ̌ i Tuang,” angkuěngu těmbonang ene, ”Iạ e tawe hinone manarimạ i Tuang su wal᷊eku. I Tuang pěhengetangke ěllangku e seng mul᷊e.

⁹U iạ e mal᷊aing harusẹ̌ sumasuměllung su parentang těmbonangku e. Kụ su al᷊ungkue piạ l᷊ai manga mẹ̌sasekẹ, kụ mal᷊aing su al᷊ungu kawasaku e. Kereu iạ měndolohʼu sěngkatau sordado, ’Dakọko!’ ute i sie mal᷊aing tamai. Iạ mẹ̌berạe wue su wal᷊ine u, ’Damahiko!’ i sie mal᷊aing damahi; kụ kereu iạ mẹ̌parenta ěllangku e, ’Koạko ini!’ ute i sie mang mẹ̌koạ.”

¹⁰Suapan Mawu Yesus nakaringihẹ̌ apan niweran těmbonang u sordado ene, i Sie rimal᷊inaụe tạ sihinge. Mase i Sie něhengetang su taumata apan mạhuntol᷊e si Sie, ”Taumatawe lai wotonge ini! Maninglai bọu tal᷊oaran taumatan Israel e, Iạ e mambeng ta nakahombang pangangimang kere ini kasěllahe!

¹¹ Mambeng kahěngang! Lawọ taumata sarung duměnta wọu sěmběkan daki ringangu wahẹ kụ měmpahul᷊uasẹ̌ dingang i Abraham, Ishak ringang i Yakub su ral᷊ungu Runian Duata Wuhu.

¹² Arawe i sire kụ mạngakum batangenge hinong makoạ kawanuan Duata e sarung iwahung su ral᷊ungu kararěndung su l᷊ikude. Sene sarung piạ pal᷊ahunsangị dingangu kasasigěsạ.”

¹³Mase Mawu Yesus něhengetang su těmbonang u sordado ene, ”Kapul᷊ẹ e, ual᷊ingu pangangimangue apang ikẹ̌kahiorọ u e sarungbe mariadi.” Kụ orasẹ̌ ene lai ěllange napiạe.

¹⁴Mawu Yesus e nakoạ sarang bal᷊em Petrus. Sene i Sie nakasilọe si ninang i Petrus kinaratingang, kạl᷊ěhabe sural᷊okaěng.

¹⁵Tangu Mawu Yesus nanenggehẹ̌ l᷊imane, kutẹu l᷊ěhabe nailangke. I sie nẹ̌bangung kụ nanětạe nẹ̌tangkiang Mawu Yesus.

¹⁶Sarạeng kạkabawěllone taumata e němpangěntuden sire lawọ apan niwal᷊iuang u rohkẹ̌ dal᷊aị e su anum Mawu Yesus. Kụ kětạewen dingangu wawera pẹ̌sěngkamohong, Mawu Yesus mạnokol᷊u manga rohkẹ̌ dal᷊aị e dingangu mạpakapian kěbị apan taumata masakị.

¹⁷ Mawu Yesus měkẹ̌koạ kěbị ene, kụ ual᷊ingu ene ute nisěhụe apan nịbaweran Nabi Yesaya, u, ”I Sie manal᷊udẹ̌ tědụ i kitẹ dingangu mapakapian sakị i kitẹ e.”

¹⁸Měngkate mal᷊awọ-l᷊awọ taumata mělẹ̌liwung Mawu Yesus e. Sarạeng Mawu Yesus nakasilọe si sire ene kěbịe, i Sie nangorọe su manga tumatol᷊ene apạl᷊iu rano e.

¹⁹Mase sěngkatau mananěntirong agama e himaung si Sie kụ nẹ̌berạe, ”Tuang Guru, iạ mapulu tumol᷊e si Tuang balạewe měnsang sarang a!”

²⁰Mawu Yesus simimbangu, ”Ral᷊ugẹ̌ e piạbe liange, ringangu manụ u winalangenge piạbe sal᷊ehe, arawe Ahusʼu Taumata e tawẹu pangulelengange.”

²¹Mase sěngkatau tumatol᷊enʼE wal᷊ine nẹ̌berạe, ”Tuang, kereu wotonge iạ deng mapul᷊ẹ kal᷊imona měngubul᷊ʼi amangku e.”

²²Arawe Mawu Yesus e kawe simimbahʼu, ”Tol᷊ẹ e Siạ, kụ balạe taumata nate e apělěbingken taumatan naten sire hala.”

²³Mawu Yesus simakẹ e su sakaeng kụ manga muritʼE nahunsakẹ e ringang.

²⁴Sěngkělěndị u piạ anging maihạ-ihạ timangga su rano e hakịu sakaenge tẹ̌takal᷊eng u wělladẹ̌ e. Su tempo ene Mawu Yesus e kạpěhědange.

²⁵Ene manga muritʼE himaungke kụ namukọe si Sie. ”Tuang! Ambangeko! I kitẹ kai miwonohẹ̌!” angkuěng i sire.

²⁶”Kawe unụe i kamene něngkatakụ?” angkuěngu Mawu Yesus. ”Kai kadodọ pangangimang i kamene si Siạ e!” Bọu e i Sie rimarisị e kụ namal᷊ěndihẹ̌ anging dingangu rano e. Tangu měngkatewe nal᷊ene-l᷊enehẹ̌.

²⁷Manga muritʼu Mawu Yesus něngkaherang. Angkuěng i sire, ”Kai taumata kereapa ěndaịe, kal᷊ingung anging dingangu rano e kawe mạhimang si Sie!”

²⁸Mawu Yesus nahumpạe su sěmbẹ̌kan dano su soang Gadara. Paị sene i Sie nihaungangken taumata niwal᷊iuangu rohkẹ̌ dal᷊aị duang katau. I rẹ̌dua e kai taumata makạtatakụ tạ sihinge, hakịu tạ u sarang sěngkatau nakal᷊awesʼu ral᷊eng ene.

²⁹I sire nahunsẹ̌bang bọu manga ral᷊ungu wangkang kubul᷊ẹ̌ kạpěmansage, ”Ahusʼu Ruata, sarung pẹ̌kapuranengʼU i kami e? Kai seng mapulu manịgěsạ si kami maningbe wẹ̌dang bal᷊ine tempone?”

³⁰Ene tawẹ karaune wọu ene, piạko ghapaěngu wawi mal᷊awọ-l᷊awọ kạpẹ̌dẹ̌deạe kaěnge.

³¹Tangu manga rohkẹ̌ dal᷊aị e němpẹ̌kal᷊iomanengke si Sie angkuěng, ”Kereu i kami e itokol᷊ʼu, ute rolohẹ̌ko i kami pasuẹ̌ su ral᷊ungu manga wawi tamai e.”

³²”Dakọe!” angkuěngu Mawu Yesus. Manga rohkẹ̌ dal᷊aị e nahunsẹ̌bangke wọʼi rẹ̌dua e, kụ nahunsuẹ̌ e su manga wawi ene. Kutẹu manga wawi e nahuntal᷊angke apidʼu nahuntumpa wọʼu wiwihu tagial᷊u sarang dano e, mase něngkal᷊ěmisẹ̌.

³³Měndal᷊ukadẹ̌ bawi e nahuntal᷊ang sol᷊ong soa, kụ němpẹ̌běkem patikụ apan nariadi su wawi ringangu su ruang katau niwal᷊iuangu rohkẹ̌ dal᷊aị e.

³⁴Tangu sěngkasoange měngkatewe nahunsěbang naněnsomahẹ̌ Mawu Yesus. Su tempong i sire nakasilọe Mawu Yesus, i sire němpẹ̌dorongke sěngapam botonge tadeạu i Sie maněntang bọu wanuan sire.