Read Sangir MARKUS 1 Bible Online

MARKUS 1 - Sangir bible

MARKUS 1

¹Ini e kai Injilẹ̌ mạanun Mawu Yesus Kristus, Ahusʼu Ruata e.[1]

² Injilẹ̌ e nitětạ kerẹewe nịbawohẹ u Nabi Yesaya kere ini, ” ’Kai ini e rarolohang-Ku,’ angkuěngu Mawu Ruata; ’Iạ e něndolohʼi sie niapěngal᷊imona si Kau, tadeạu i sie apẹ̌děndiahi raral᷊engangʼU.’

³ Piạ e tau mạmohang su wanua l᷊inggi, ’Riahiko ral᷊eng baugu Mawu; teneko raral᷊engang apan dal᷊engange.’ ”

⁴Mẹ̌sul᷊ungkewen mạbawohẹ e kerene lai rarěntang Yohanes su wanua l᷊inggi. I sie měnẹ̌nahani taumata ringangu mẹ̌děndal᷊engken habarʼu Mawu Ruata e.[2] ”I kamene harusẹ̌ pěmpẹ̌tobatẹ̌ bọu kal᷊awọu rosanu ringangu harusẹ̌ sahaniang, tadeạu Mawu Ruata e mẹ̌gěllịu ampung si kamene,” kerene angkuěng i Yohanes.

⁵Kěbị taumata wọu wanuang Yudea e ringangu soang Yerusalem nahuntamai němpẹ̌daringihẹ̌ si Yohanes. I sire němpangakung kal᷊awọu rosan sire, kụ i Yohanes něnahani si sire su Sal᷊ụ u Yordan.

⁶ I Yohanes měpẹ̌pakeangu pakeang bọu rukụ u onta. Papehẹ e wọu pisị, ringangu kinạe kal᷊imbotong dingangu kaěnge ghul᷊an katiupang.

⁷I sie kai mạul᷊ị u habarẹ̌ ini, ”Samurin iạ e sarung duměnta sěngkatau nangělembong kasěllahe wọu iạ e. Kal᷊ingung kumakurung měluka tal᷊ing sapatunʼE e, iạ e tawe wotonge.

⁸Iạ měnẹ̌nahani si kamene e kai ringangu akẹ arawe i Sie kụ sarung měnahani si kamene ringangu Rohkẹ̌ u Ruata.”

⁹Su tempo ene tangu Mawu Yesus narěnta wọu Nazaret su wanuang Galilea, kụ i Yohanes něnahani si Sie niurung su Sal᷊ụ u Yordan.

¹⁰Sarạeng Mawu Yesus e nasěpụ bọu akẹ ene, i Sie nakasilo langị natope kụ Rohkẹ̌ u Ruata e natěntung kere manụ paluma kụ dimorọ si Sie.

¹¹ Bọu e kinaringihẹ̌ tingihʼu Mawu Ruata mělẹ̌hengetang, ”I Kau e kai Ahusẹ̌-Ku ikẹ̌kěndagẹ̌. I Kau e mětẹ̌tal᷊ahino su naung-Ku e.”

¹²Bọu ene Rohkẹ̌ u Ruata apidʼu něngahạ Mawu Yesus sol᷊ong banua l᷊inggi.

¹³Ěpạ u pul᷊o su ěllone i Sie sene nisal᷊ukatengu setang. Manga binatang dul᷊u e mal᷊aing ene ringangkewen Sie sene e, kụ manga malaekatẹ̌ e měmpẹ̌tẹ̌tangkiang si Sie.

¹⁴Sarạeng i Yohanes nitahungkụ, Mawu Yesus e nakoạ sol᷊ong Galilea, kụ něhabarʼu Injilʼu Mawu Ruata e paịse.

¹⁵ AngkuěngʼE, ”Kararatun Mawu Ruata e seng masandigẹ̌. Kụ pěmpẹ̌tobate i kamene wọu kal᷊awọu rosang kamene, kụ pangimangke su Injilʼu Ruata!”

¹⁶Ene, Mawu Yesus kạdal᷊enge su apengu Ranong Galilea e, i Sie nakasilo měnanoma duang katau, kụ i Simon dingangu tuarine i Andreas. I rẹ̌dua e kai kapẹ̌nẹ̌nomane su rano.

¹⁷Mawu Yesus něhengetang si rẹ̌dua, ”Pěmpẹ̌tol᷊eko si Siạ. Iạ e sarung maněntiro si kamene měnomạ taumata.”

¹⁸Ene i rẹ̌dua měngkatewe naněntangu somạ i rẹ̌dua e mase timol᷊e su Mawu Yesus.

¹⁹Mawu Yesus mang kạdal᷊enge, tangu i Sie saụewe nakasilo si rẹ̌dua tahatuari wal᷊ine, i Yakobus dẹ̌duang Yohanes, manga anạ i Zebedeus. I rẹ̌dua kinaẹ̌bakeng su ral᷊ungu sakaeng, kạpěnẹ̌naminge somạ i rẹ̌dua.

²⁰Mawu Yesus apidʼu kimui si rẹ̌dua. Ku i rẹ̌dua e měngkatewe naněntang i amangi rẹ̌dua e su sakaeng, ringangkewen i sire mělahal᷊ẹ̌ bal᷊ine e. Bọu e i rẹ̌dua němpẹ̌tol᷊e e Mawu Yesus.

²¹Mawu Yesus dingangu manga muritʼE nahumpạ su soang Kapernaum. Kụ su ěllon Sabatẹ̌ tuhụe, Mawu Yesus nasuẹ̌ su wal᷊em pẹ̌kakal᷊iomanengang kụ nanětạe naněntiro.

²² Taumata kụ apan dụdaringihẹ̌ e mangkewen dụdal᷊inaụ u pananěntironʼE. U i Sie naněntiro e kai piạ pěhěngkinge, wal᷊inewe kere manga mananěntiro agama e.

²³Su tempo ene piạ sěngkatau kinasuẹ̌kangu rohkẹ̌ dal᷊akị kụ simuẹ̌ su ral᷊ungu wal᷊eng pẹ̌kakal᷊iomanengang, kụ němansagẹ̌,

²⁴”Ei Yesus tau Nazaret, kai pẹ̌kapuraěngu i kami e? I Kau e ruměnta waugʼu mapakawinasang kami e? Iạ e masingkạ i sai i Kau e: I Kau e kai rarolohang masusi wọu anun Duata!”

²⁵”Karěmasẹ̌ko!” angkuěngu Mawu Yesus něhěkadẹ̌ rohkẹ̌ dal᷊akị ene, ”Sẹ̌bangke wọu tau ini!”

²⁶Ene rohkẹ̌ dal᷊akị e měngkatewe něnggaghinggọ tau ene maihạ-ihạ, bọu e simẹ̌bang bọu ral᷊ungu tau ene kạbansage.

²⁷Kěbị taumata e měngkatewe něngkaherang hakịu i sire němpẹ̌bera sěmbaụ su wal᷊ine, ”Hu, kai apạe ini? Piạewe těntiro wuhu! Makạl᷊ahěngking rẹ̌děndinganengu kawasa i Sie nanokol᷊ẹ̌ rohkẹ̌ dal᷊akisẹ̌ niapasẹ̌bang, kụ i sire měngkawe mararingihẹ̌ si Sie!”

²⁸Tangu habarʼu Mawu Yesus e měngkatewe masahawụ nẹ̌kakeke su kaguwạu wanuang Galilea.

²⁹Mawu Yesus dingangu manga muritʼE naněntangu wal᷊em pẹ̌kakal᷊iomanengang ene, kụ nakoạ sol᷊ong bal᷊en Simon dẹ̌duang Andreas. I Yakobus dẹ̌duan Yohanes mal᷊aing natol᷊e ringangi sire.

³⁰I ninangi Simon kinaratingang nilěhabe sural᷊okaěng. Kụ ene piạ e Mawu Yesus dingangu manga muritʼE simuẹ̌ su wal᷊e ene, Mawu Yesus e nihabareng u hal᷊ẹ̌ ene.

³¹Tangu Mawu Yesus tamai himaung si ninang i Simon kinaratingang, kụ nangumpaedẹ̌ l᷊imane apidʼu němangung si sie. Kutẹu l᷊ěhabe napiạ e, kụ i sie nanětạe nakapẹ̌siliwirẹ̌ si sire.

³²Ene nawawěllọe, kụ matangělloe seng simědạe,[3] i sire tangu němpangěntudẹ̌ kal᷊awọu taumata apan masakị dingangu nikasuẹ̌kangu rohkẹ̌ dal᷊akịe sol᷊ong anun Mawu Yesus.

³³Kakẹ̌pal᷊ewen pěmamanuan soa ene e němpẹ̌tampungke su těngon bal᷊e ene.

³⁴Mase Mawu Yesus napakapiạen taumata l᷊awọ apan piạ sakịe mědẹ̌dal᷊ahaghi e, kụ nanokol᷊ẹ̌ko lai rohkẹ̌ daral᷊akịe malawọ. I Sie tawe napakawalang rohkẹ̌ daral᷊akị e pěběbera, watụ u i sire masingkạu kai i sai i Sie.

³⁵Sěngkariọěllone reng marěndung-děndung, Mawu Yesus nẹ̌bangung kụ limintụ naněntangu wal᷊e. I Sie nakoạ sol᷊ong tampạ marěmasẹ̌ su l᷊ikudʼu soa, kụ nẹ̌kal᷊iomaneng sene.

³⁶Arawe i Simon dingangu manga hapịe natamai němpẹ̌deạ si Sie.

³⁷Kụ sarạeng i sire nẹ̌sombang i Sie, i sire němpẹ̌berạe, angkuěng, ”Kěbị taumata e měmpědẹ̌deạ si Tuang.”

³⁸Mawu Yesus e kai simimbang, ”Bọete i kitẹ maněpasẹ̌kon daral᷊eng i kitẹ sol᷊ong apan soa wal᷊ine kụ mararani e wọu ini. Iạ harusẹ̌ lai maněntiro tamai sene, u kai ene tẹ̌gal᷊u rarěntakue.”

³⁹ Kai ual᷊ingu ene Mawu Yesus e rụdal᷊eng mạměpidẹ̌ kạguwạu Galilea e, mạněntiro su manga wal᷊eng pẹ̌kakal᷊iomanengang apidẹ̌ měnẹ̌nokol᷊u manga rohkẹ̌ dal᷊akị e.

⁴⁰Tau nirorokangu sakịe su pisị makạtatakụe[4] riměnta su anum Mawu Yesus. Tau ene němul᷊angeng kụ nẹ̌bera, ”Kereu i Tuang tumal᷊ěntụ u iạ, ute i Tuang botonge mapakaul᷊en iạ e.”

⁴¹Mawu Yesus timal᷊ěntụen[5] tau ene. Kụ i Sie něnenggehe tau ene apidʼu nẹ̌bera, ”Iạ e mapulu kụ kapiạ e!”

⁴²Su orasẹ̌ ene tangu sakịe nailang kụ i sie napia.

⁴³Mase Mawu Yesus něndolohʼi sie pinakapul᷊ẹ apidʼu timanatang ini,

⁴⁴ ”Ene ěng abe pẹ̌běke si sai-sai, kaiso tamaiko sol᷊ong anung imang, kụ pẹ̌dorong si sie pẹ̌sahiding kau u i kau e seng napia. Mase waugʼu pěngangundangu e, pěnondangkon sasěmba kerẹewe nititan Musa, kere tatiala su taumata l᷊awọ u i kau e kahěnga-hěngang seng napia.”

⁴⁵Kaiso taumata ene napul᷊ẹ, mang hanesẹ̌ mẹ̌bẹ̌běken karariadin hal᷊ẹ̌ ene suapan tampạ, hakịewen Mawu Yesus e tawe nakasuẹ̌ su soa ene ringangu waharia. I Sie kětạeng nẹ̌tanạ su l᷊ikudʼu soa su manga tampạ mararěmasẹ̌. Kai manilaing kerene taumata e mang tạ pontode mạhunděnta su anunʼE bọu apan beọ e.