Read Sangir MARKUS 13 Bible Online

MARKUS 13 - Sangir bible

MARKUS 13

¹Sarạeng Mawu Yesus naněntangu Wal᷊em Mawu, sěngkatau wọu manga muritʼE nẹ̌bera, ”Tuang Guru, tingangko manga wal᷊e tamai e. Tingangko manga mesele. Kụ bal᷊inewe mal᷊ongkọ lěnggihe!”

²Mawu Yesus simimbang u, ”I kau e nakasilo manga wal᷊e gaghaghuwạ ene eng? Tawẹ batu sarang sěmbaụ bọu manga wal᷊e tamai e sarung mạtatanạ mạdal᷊ěnsung su ěnnạ e. Kěbị e sarung matatěnehẹ̌.”

³Bọu e Mawu Yesus nakoạ sol᷊ong Bukidʼu Zaitun, kụ naiang[21] su tampạ tụtatěngo Wal᷊em Mawu. Tangu i Petrus, i Yakobus, i Yohanes dingangu i Andreas diměnta su anun Sie kụ mahumbisara ringangʼE sẹ̌sane.

⁴”Kěnangko i Tuang pěhabarẹ̌ si kami,” angkuěng i sire si Sie, ”su tempo sude patikụ ene sarung mariadi? Dingangu kai mangạ e apạ e tatialan mapakal᷊ahẹ u seng tempone?”

⁵”Pakatatahuěnna wue,” angkuěngu Mawu Yesus, ”kumbahangbe sarang i kamene kal᷊ingaěng.

⁶Mal᷊awọ taumata sarung mahunděnta měmpẹ̌bawa arengku kụ měmpẹ̌bera, ’Seng iạ e i Sie!’ mase mělinga taumata lawọ e.

⁷Kamageng i kamene makaringihẹ̌ tingihʼu pẹ̌bawawuno ringangu habarʼu pẹ̌sasasekẹ, ute abe kěngkatakụ. Kěbị-kěbị e harusẹ̌ mariadi, kaiso ene wal᷊inewe seng tatialan tempon mẹ̌kiamatẹ̌.

⁸Bansa sěmbaụ sarung mẹ̌sekẹ dumokạ bansa wal᷊ine. Něgara sěmbaụ sarung mangalo něgara wal᷊ine. Balạewe su tampạ sude sarung mělinuhẹ̌ dingangu mariadi piạ karal᷊unusẹ̌. Patikụ ene wuhụewe ahạ e, kụ tabidạu sakịu manga wawine su tempong kapẹ̌tahasenggọ e.

⁹ I kamene harusẹ̌ pakal᷊aingatẹ̌, batụu i kamene sarung samekang dingangu i wawa sarang anum mělahukungu agama. I Kamene sarung dal᷊imadeng su manga wal᷊em pẹ̌kakal᷊iomanengang. I kamene sarung itonda apẹ̌těngon manga těmbonange ringangu manga ratu watụ u i kamene kai tumatol᷊e-Ku. Kụ seng ene loahʼi kamene manodẹ u pẹ̌sasahiding Iạ su těngon sire.

¹⁰Injilẹ̌ bọu anum Mawu Ruata e harusẹ̌ ipẹ̌kakeke kal᷊amona su patikụ bansa.

¹¹Kụ kamagengu i kamene samekang dingangu iwawa su mělahukung, ute abe ghagha u kai mẹ̌berạeng apa i kamene. Kamagengu seng nidating tempone waugʼu mẹ̌bisara, ute měngkate paul᷊iu apạewen nihabarẹ̌ si kamene su tempone. Batụu manga wawera kụ apang pinẹ̌berang kamene e wal᷊inewe wawerang kamene hala, kaiso kawe riměnta wọu anung Rohkẹ̌ u Ruata e.

¹²Taumata sarung mẹ̌sunial᷊ʼu anạ u sěngkataune hala e mẹ̌deạu pateěng. Ene mal᷊aing sarung mariadi su pẹ̌sěntahanakeng. Manga rariọ dumokạ si ninange ringangu si amange, dingangu měnarakang i sire pakipate.

¹³ I kamene sarung ipẹ̌binsị u patikụ taumata ual᷊ingu i kamene kawe tumatol᷊e-Ku. Kai taumata kụ apam měkẹ̌kakědang sarang pangěnsueěnge, sarung iapakasal᷊amatẹ̌.”

¹⁴ ”I kamene sarung makasilo ’Karal᷊akisẹ̌ kụ Makawihua’ dụdarisị su tampạ ipẹ̌tẹ̌teghang baugʼi sie. (Těhusẹ̌ su mẹ̌bawasa: Pěmanda wue apa mangal᷊ene!) Su tempo ene taumata kụ apang su Yudea harusẹ̌ mahuntal᷊ang sol᷊ong bawul᷊urange.

¹⁵ I sain su wowong atụ abe lintụ dingangu abe suẹ̌ su ral᷊ungu wal᷊e kụ měngal᷊ạ apa-apa.

¹⁶I sain su sasuang abe pẹ̌sul᷊e kụ měngal᷊ạ l᷊akụ e.

¹⁷Enẹ e makạl᷊ahiasẹ̌ su tempo ene, su manga wawine piạ kapapia ringangu su sěngkatau inang kụ bědang mạpasusung anạe.

¹⁸Měngkate pěmpẹ̌kal᷊iomaneng tadeạu manga hombang ene abe katarang su tempon tahiti.

¹⁹ Suapang ěllo makạl᷊ahiasẹ̌ ene e sarung piạ kasasusa kụ bědang ta nikẹ̌kahombangeng deng dokeng Mawu Ruata něndiadi dunia sarang orasẹ̌ ini, dingangu sembelaing tawe mẹ̌saụ.

²⁰Kai manga Mawu Ruata tawe mangěsọu ěllo ene ute, tawẹu sarang sěngkatau masal᷊amatẹ̌. Kai ual᷊ingu kawanuanʼE, ute Mawu Ruata e mang nangěsọ u ěllo ene.

²¹Su orasẹ̌ ene kereu piạu mẹ̌bera si kamene, ’Kakěllako, Datu Mananal᷊amatẹ̌ e kai ěndaung sini!’ arau ’Kakěllako, i Sie kai paịse!’ — ute abe pěmpangimang su tau ene.

²²Batụu manga mananal᷊amatẹ̌ konti ringangu manga nabi konti e sarung měmpahunděnta. I sire sarung měmpẹ̌koạ hal᷊ẹ̌ gaghuwạ dingangu manga karal᷊inaụ tadeạu ipěngakal᷊ẹ̌ apan pinilen Mawu Ruata sěngapam botonge.

²³Tangu pakatateghang bue! Kěbị ene seng Takụ nihabarẹ̌ kal᷊imona si kamene ipạnal᷊umbaghẹ.”

²⁴ ”Su kapapal᷊usen tempong kasasusa ene, matangěllo e sarung iapakarěndung, dingangu wul᷊ang e selaing tawe suměnnang.

²⁵ Manga wituing e sarung měngkahondosẹ̌ bọu l᷊angị, dingangu kal᷊awọu měngangawasa kinoaěnge sarung mẹ̌golang.

²⁶ Kụ su orasẹ̌ ene Ahusʼu Taumata e sarung ikasilo ruměnta su ral᷊ungu winawa dingangu kawasanʼE masěllahẹ̌ dingangu kawawantugẹ̌.

²⁷I Sie sarung dumolohʼu manga malaekatẹ̌ tadeạu mapẹ̌tampungu umatẹ̌ pinilenʼE wọu wukung dunia ěpạ, bọu manga pondol᷊ʼu dunia sarang manga pungu langị.”

²⁸”Pangal᷊ạko těntiro wọu kalung ara. Kereu manga hakondane e melong dingangu masasikome kụ manětạe mẹ̌tumbal᷊ẹ̌, ute i kamene masingkạu tempom pědisẹ̌ e seng marani.

²⁹Kerene lai kamagengu i kamene makasiloe patikụ hal᷊ẹ̌ ene seng nariadi, kụ i kamene masingkạ u tempone seng marani-rani.[22]

³⁰Kasingkạko! Kěbị kakakoạ ini e sarung mariadi kal᷊imonang kěbị umatẹ̌ apang měbẹ̌biahẹ̌ orasẹ̌ ini e wědang tawe nẹ̌tate kěbị.

³¹Langị dingangu dunia e sarung mapaghohẹ̌ arawe waweraku e tatapẹ̌ sarang karěngụe.”

³² ”Manilaing kerene, tawẹu sarang sěngkatau masingkạu angerẹ ěllone arau angerẹ orase. Manga malạekatẹ̌ su sorga e wěga wue ringangu Ahusẹ̌ e mal᷊aing běga, kětạewen i Amang hala e masingkạ.

³³Kụ i kamene pakaral᷊ukadẹ̌ bue ringangu pakal᷊ahěkosẹ̌, u i kamene wěga wue měnsang angerẹ tempone.

³⁴ Kakakoạe kai tabidạu sěngkatau naněntangu wal᷊ene mase nakoạ sol᷊ong banua marau. I sie nangoro manga ěllang e apẹ̌tẹ̌tangkuang bal᷊ene ringangu nẹ̌gaghelarʼu munara si sire sěngkatau-sěngkatau. I sie nangoro su mělahapa tukadẹ̌ u pělẹ̌lukadẹ̌be pakapia.

³⁵Ual᷊ingu ene i kamene harusẹ̌ pakaral᷊ukadẹ̌, u i kamene wěga wue měnsang angerẹ taghuangu wal᷊e ene masongo — aramanung bawěllo, arau měnsang kẹ̌kal᷊oarane, arau kibasịu kawe kalonge, arau kai manga matangěllo kạsěbange.

³⁶Kamagengu i sie sěngkianu marěnta, ute kumbahangbe sarang i sie makaěbạ si kamene kạpahuntikịe.

³⁷Apan Takụ ipẹ̌bẹ̌bera ini si kamene mal᷊aing Takụ ipẹ̌bẹ̌bera su taumata l᷊awọ: u pakaral᷊ukadẹ̌ bue!”