Read Sangir MARKUS 14 Bible Online

MARKUS 14 - Sangir bible

MARKUS 14

¹ Ene kate rua ěllo seng Ěllom Paskah ringangu Sal᷊iwangu Borotẹ̌ Tawẹ Kabọ e. Manga imang těmbonange ringangu manga mananěntirong agama e měngkate měmpědẹ̌deạ dal᷊engu mělikosẹ̌ e menamẹ Mawu Yesus, dingangu tadeạu měmate si Sie.

²”Kaiso kumbahang bue i kitẹ mẹ̌koạ ene su tempon sal᷊imbange,” angkuěng i sire, ”Kibasịu makapẹ̌gohaeng.”

³ Su tempoʼm Mawu Yesus narěnta su Betania, su wal᷊en Simon kụ nạung piạ sakị e kusta makạtatakụ, kụ piạ e tau wawine himaung si Sie. I Sie nẹ̌bawa wotol᷊ẹ̌ marmarẹ̌ lohong lana mawěngi mal᷊ẹ̌gadẹ̌, nikoạ bọu hamụ u kalu mawěngi. Ene Mawu Yesus kụkaiangke měsẹ̌simokol᷊ẹ̌, tau wawine ene měngkatewe namose wotol᷊ẹ̌ e, kụ naněbohʼu l᷊ana mawěngi ene su těmbọ u Mawu Yesus.

⁴Ene piạko pirang katau ěndaị sene němpẹ̌langehẹ̌, kụ nahumbisara lawọ i sire u, ”Apawe gunane lana mawěngi ene nipẹ̌gagholọ?

⁵Lana ene ikawal᷊ụbe ringangu arẹ̌gane nangělembo wọu těllu hasụ su kal᷊ěpane roitẹ̌ sal᷊aka,[23] kụ doite reng ikaonggọ su tau kasiang!” Tangu i sire němpẹ̌pědu su tau wawine ene.

⁶Kai Mawu Yesus e něhengetang, ”Balạe kere i sie! Unụe i kamene napakasusan sie? I sie kai nẹ̌koạ munara mapia ringangu rẹ̌daloěng baugu Iạ.

⁷ Tau kasiang hanesẹ̌be ene ringangi kamene. Apan tempo kereu i kamene mapulu, i kamene makaambang si sire. Arawe Iạ e tawe hanesẹ̌ dingangi kamene.

⁸Tau wawine ini e seng nẹ̌koạ apạewen botonge ikakoạ e. I sie seng namaghẹ baugu Iạ dingangu l᷊ana mawěngi waugʼu pěnanampạku kal᷊imonang tempone.

⁹Pěmpangimangke! Su kaguwạu dunia e suapạewen Injilẹ̌ bọu Mawu Ruata e ipẹ̌kẹ̌kakeke, kakakoạu wawine ini e ute sarung iwẹ̌ke lai makoạ kere tatahěndung si sie.”

¹⁰Ene i Yudas Iskariot, sěngkatau wọʼi sire mapul᷊o dua muritʼu Mawu Yesus, nakoạ sol᷊ong anum manga imang těmbonange manarakangu Mawu Yesus si sire.

¹¹I sire měngkatewe němpẹ̌luasẹ̌ kahěngang nakaringihe rorong ene, kụ němpẹ̌kědo sarung mangonggọu roitẹ̌ si Yudas Iskariot. Tangu i Yudas nanětạe mědẹ̌deạ loahe tadeạu manarakangu Mawu Yesus.

¹²Su ěllo kahumotongangu ěllon Sal᷊iwangu Borotẹ̌ Tawe Kabọ e — su tempon taumata mạmotọ dombaʼm Paskah e, manga muritʼu Mawu Yesus němpẹ̌kiwal᷊o si Sie, ”Suapạe mẹ̌tatal᷊ahino pěndiahiang i kami e kaěngu Paskah waugʼi Tuang?”

¹³Tangu Mawu Yesus něndolohen duang katau wọʼi sire, ”Rakọ e sol᷊ong soa, kụ paịse piạ tau esẹ, měnẹ̌nuěng běnsadu akẹ, sarung ipẹ̌sombang i rua. Pěmpẹ̌tol᷊ẹ e si sie

¹⁴sol᷊ong bal᷊e suěkange kụ pẹ̌bera su taghuang u wal᷊e ene, ’Mananěntiro e makịbal᷊o, kai suapa tampạ i Sie ringangu manga muritʼE makapẹ̌simokol᷊ẹ̌ kaěngu Paskah.’

¹⁵Tau ene sarung měnul᷊ada si rua dal᷊unge mal᷊oahẹ̌ su wowone rasị. Dal᷊unge ene seng nihundugẹ̌ nauadipẹ̌ dingangu manga apal᷊iwụe. Kụ sadiaịete kěbị sene waugʼi kitẹ.”

¹⁶Tangu muritʼu Mawu Yesus darua ene nakoạ sol᷊ong soa. Tangu sene i rẹ̌dua e nakahombangke kěbị kerẹewe nipaul᷊ịu Mawu Yesus. Tangu i rẹ̌dua e němpanadiạe kaěngu Paskah e.

¹⁷Sěhěbi ene, Mawu Yesus simongo ringangu muritʼE mapul᷊o dua.

¹⁸ Kutẹu i sire kụkaiang kạpahungkaěnge, Mawu Yesus něhengetang, ”Daringihẹ̌ko: sěngkatau wọʼi kamene, kụ su orasẹ̌ ini sěngkakaěng dingangku sarung mẹ̌sunial᷊u Iạ e.”

¹⁹Nakaringihẹ̌ ene, manga muritʼu Mawu Yesus e mamben něngkasusa, kụ sěngkatau-sěngkatau e nanětạe nakiwal᷊o su Mawu Yesus, ”Tantu wal᷊inewe iạ tẹ̌timonang i Tuang arau ěng?”

²⁰Mawu Yesus simimbang, ”I sie ute kai sěngkatau wọu i kamene mapul᷊o dua ini, kụkaěng su lamạ sěmbaụ dingangku.

²¹Kahěngang bue Ahusʼu Taumata e sarung mate kerẹewe mạbawohẹ su ral᷊ungu Winohẹ Susi. Kaiho! Kaěngkěhang bue i sai manarakangu Ahusʼu Taumata e! Mapiaěngbe nạung tau ene manịeng tawe kạdiongeng pinahanạ!”

²²Ene kạpahungkaěnge i sire e, Mawu Yesus něngal᷊ạe borotẹ̌ dingangu nẹ̌kal᷊iomaneng nakitarimakasẹ su Mawu Kasěllahenge. Bọu e něngangompeng borotẹ̌ e, mase nịbawal᷊awuhe su manga muritʼE apidʼu něhengetang, ”Daekeko kụ kaengko, ini e kai wadangku.”

²³Bọu e i Sie nangal᷊ạe panganginumangu anggorẹ̌ e. I Sie nẹ̌kal᷊iomaneng tatarimakasẹ su Mawu Kasěllahenge, kụ tinẹ̌gone su manga muritʼE. Tangu i sire kěbị e němpanginungke anggorẹ̌ e.

²⁴ Samuring ene ute Mawu Yesus něhengetang, ”Ini e kai rahaku, rahạen pẹ̌kakakědoʼm Mawu Ruata, kụ niapatědọ baugu l᷊awọ.

²⁵Pěmpangimangke: Iạ e seng tawe saụ manginung bọu anggorẹ̌ ini, sarạeweng su tempong Iạ manginung anggorẹ̌ buhu su Dunia Wuhung Amang-Ku e.”

²⁶Tangu i sire němpẹ̌kantarịeng kakantarị daralo sěmbua. Kụ bọu ene i sire nakoạ sol᷊ong Bukidʼu Zaitun.

²⁷ Tangu Mawu Yesus něhengetang si sire, ”I kamene kěbị e sarung měmpahuntal᷊ang maněntangu Iạ e. Batụu su ral᷊ungu Winohẹ Susi e kai mạbawohẹ u, ’Mawu Kasěllahenge sarung mapakaten mělal᷊ukadẹ̌ e, kụ gapaěngu rumba e sarung mẹ̌kal᷊iaesẹ̌.’

²⁸ Arawe samurin pẹ̌bawangung-Ku kapia e, Iạ e sarung tamai měngal᷊imona si kamene sol᷊ong Galilea.”

²⁹”Tala,” angkuěng i Petrus, ”Manilaing i sire kěbị maněntang i Tuang, kai iạ e mambeng tala.”

³⁰”Ene eng,” angkuěngu Mawu Yesus, ”hěbi ini lai, kal᷊imonan manụ kimukụ karuan sul᷊ene e, i kau seng těllun sul᷊e nẹ̌sunial᷊u Iạ e.”

³¹I Petrus simimbangke ringangu mahoto, ”Manilaing iạ iapakapate sěngkakate ringangi Tuang, kai iạ e mambeng ta makawera u iạ e wẹ̌gan Tuang!” Kụ manga muritʼE wal᷊ine e mal᷊aing němpẹ̌bera kerene.

³²I sire nahumpạen tampạ sěmpalang kụ arenge Getsemani, mase Mawu Yesus něhengetang su manga muritʼE, ”Pahungkaiangko sini, těntal᷊ang Iạ deng tamai mẹ̌kal᷊iomaneng.”

³³Mase Mawu Yesus němaringang i Petrus, i Yakobus, dingangi Yohanes sěngkapahundal᷊eng dingangʼE. I Sie nanětạe nakapěndang nasusa ringangu kimal᷊insau.

³⁴”Naung-Ku e nasusa tawẹ sihinge,” angkuěng u Mawu Yesus si sire, ”pẹ̌pěndangeng seng sal᷊a makapatẹ e. Kěngkatanạko sini kụ pěmpělukadẹ̌ko!”

³⁵Mawu Yesus nẹ̌těngkagheang kadodọ bọu e nẹ̌těngkasumagẹ̌ su ěntana kụ nẹ̌kal᷊iomaneng. Su ral᷊ungu kal᷊iomanenge i Sie mědẹ̌dorong sěngapam botonge tadeạu i Sie manịeng tawe kahombangengu tempon sigěsạ ene.

³⁶”Amang, o i Amang,” angkuěnge, ”tawẹu sarang sěmbaụ kụ kai ta makoạ su Ruata. Apakapuạko kasasigěsạ ini e wọu anuku. Kẹ̌tạeweng bal᷊inewe kapuluku e kaiso kawe kapulung Amang.”

³⁷Bọu e Mawu Yesus nẹ̌sul᷊e kụ sěngkakakěllane manga muritẹ̌ e kạpahuntikịe. I Sie nẹ̌bera si Petrus, ”Simon, mẹ̌tikị i kau e? Kětạeng beng sěngkaorasẹ̌, kụ i kau mang tawe makal᷊ukadẹ̌?”

³⁸Tangu Mawu Yesus něhengetang si sire, ”Pakaral᷊ukadẹ̌ko, ringangu pěmpẹ̌kal᷊iomanengko tadeạu i kamene tawe kasal᷊ukateng. Rohkẹ̌ ete wue mambeng mapulu mẹ̌koạ apam mětẹ̌tatal᷊ahino, kai arawe i kamene e mambeng ta makatohạ ual᷊ingu ghẹ̌si e kai lome.”

³⁹Kạpia Mawu Yesus tamai nẹ̌kal᷊iomanengu kerẹewe wawerane kal᷊imona.

⁴⁰Bọu e i Sie nẹ̌sul᷊e kapia su anum manga muritʼE kụ nikahombangenge i sire mang bědang mětẹ̌tikị, ual᷊ingu i sire kai mẹ̌tikị-tikị. Tangu i sire wěga wue měnsang kai mẹ̌berạeng apa su Mawu Yesus.

⁴¹Kutẹu Mawu Yesus nẹ̌sul᷊ẹ e kapia su anun sire su katěllun sul᷊ene, i Sie něhengetang, ”Měngkai wẹ̌dang měmpạhuntikị dingangu měmpạngirul᷊e i kamene? Pianẹ e! Seng nịdating tempone, Ahusʼu Taumata e isarakang su l᷊iman taumata warạdosa.

⁴²Pěmpẹ̌bangungke, bọete i kitẹ mahundal᷊eng. Kakělla! Taumata kụ měndal᷊akị si Siạ e seng diměnta!”

⁴³Ene Mawu Yesus bẹ̌dang kapẹ̌lẹ̌hengetange, narěntạe i Yudas sěngkatau wọu manga muritʼE mapul᷊o dua e. Sěngkakarěnta ringangʼE mal᷊awọ l᷊ai taumata měmpẹ̌bẹ̌bawa warạ dingangu pal᷊o-pal᷊o. I sire nirolohu manga imang těmbonange, manga mananěntirong agama ringangu manga těmbonangu tau Yahudi.

⁴⁴I něndal᷊aị e seng něgěllịu tatialane si sire u. ”Taumata kụ takụ děnguange,” angkuěnge si sire e, ”Ute kai i Sie taumatane. Samẹ e i Sie kụ bawạ e ringangu riagate pakapia.”

⁴⁵Sarạeng i Yudas diměnta, i sie měngkatewe himaung Mawu Yesus kụ nẹ̌bera, ”Tuang Guru!” bọu e i sie riměngu Mawu Yesus.

⁴⁶Mase i sire sěngkakarěnta ringangi Yudas e měngkatewe něnamẹ Mawu Yesus kụ něhapusẹ̌ si Sie.

⁴⁷Arawe sěngkatau wọʼi sire sene měngkate nanawụ barạ e mase namilị ěllangu imang mawantugẹ̌ e hakịu nasahing tul᷊ine.

⁴⁸Bọu e Mawu Yesus něhengetang si sire, ”Kai taumata ral᷊akị Iạ e, hakịu i kamene ruměntan barạ dingangu pal᷊o-pal᷊o kụ měnamẹ si Siạ?

⁴⁹ Apang kal᷊aěllo e Iạ mạněntiro su Wal᷊em Mawu su těngong kamene, kai i kamene tawe měmpanamẹ si Siạ. Kai mang seng hinong kerene, tadeạu misěhụ apang kạbawohẹ su ral᷊ungu Winohẹ Susi e.”

⁵⁰Kěbị muritẹ̌ e timal᷊ang němpanentangu Mawu Yesus.

⁵¹Umbaseng sěngkatau, kụ kětạeng měkẹ̌kakingkaengu hekạ leneng nipěhěmbung awạ e, tụtol᷊e Mawu Yesus. I sire mapulu měmpanamẹ si sie,

⁵²kai i sie měngkatewe naměllọu kakingkaenge, kụ timal᷊ang těntol᷊e.

⁵³Mawu Yesus niěntudʼi sire su wal᷊eng imang mawantugẹ̌. Paịse, kal᷊awọu imang těmbonange ringangu manga matatimaden tau Yahudi ringangu mananěntirong agama e mạtatampung.

⁵⁴I Petrus timol᷊e Mawu Yesus wọu marau sarạeweng nasuẹ̌ su rěllahʼu wal᷊eng imang mawantugẹ̌. Sene i sie mạiang su rěduhu putung sěngkapěndarang dingangu manga měndariagạe.

⁵⁵Manga imang těmbonange ringangkewen sěnaung Sanhedrin měngkatewe měmpědẹ̌deạ karal᷊ahẹu sahiding sire mapẹ̌sal᷊an Mawu Yesus tadeạu makapěhukungu papate si Sie. Kai i sire tawe nakahombang sal᷊a kadiongeng sarang sěmbaụ.

⁵⁶Mal᷊awọ sahidi nikuiang ipẹ̌sẹ̌sahiding konti waugu Mawu Yesus, kaiso sasahiding sire e mědẹ̌dal᷊ewang sěmbaụ su wal᷊ine.

⁵⁷Ene kai piạ pirang katau rimarisị kụ němpẹ̌sahiding konti, kerei mạanun Mawu Yesus,

⁵⁸ ”I kami e nakaringihẹ̌ tau ini nẹ̌bera, ’Iạ sarung měnggoghahẹ̌ Bal᷊em Mawu kinoạu taumata, kụ samurin těllu ěllo, kụ Iạ e sarung mamětịewe lai wal᷊ine kụ bal᷊inewe koạ u taumata.’ ”

⁵⁹Kai sasahidin sire ene e mal᷊aing nẹ̌dal᷊ewang sěmbaụ su wal᷊ine.

⁶⁰Tangu imang mawantugẹ̌ e rimarisị su těngon sire kěbị mase nakiwal᷊o su Mawu Yesus, ”Unụe i Kau tawe sumimbahẹ̌ kal᷊awọu laěnsilẹ̌ itẹ̌timona si Kau e?”

⁶¹Kai Mawu Yesus mang tawẹ kakěndịe. I Sie tawe kadiongeng simimbahẹ̌ sarang kadodọ. Mase imang mawantugẹ̌ e saụ nakiwal᷊o sěnsul᷊e si Sie, ”Kahěngang i Kau e Ratu Mananal᷊amatẹ̌, Ahusʼu Ruata L᷊imembon Susi?”

⁶² ”Seng Iạ e i Sie,” angkuěngu Mawu Yesus, ”kụ i kamene kěbị e sarung makasilo Ahusʼu Taumata e kụkaiang su sěmběkang koanengu[24] Mawu Ruata Lembong Kawasa kụ diměnta su ral᷊ungu winawa wọu l᷊angị!”

⁶³Tangu imang mawantugẹ̌ e něningkasẹ̌ pakeange[25] ringangu nẹ̌berạe u, ”Tawe wahal᷊uasu piạ sahidine!

⁶⁴ I kamene hala e semben nakaringihẹ̌ manga wawerane mělẹ̌hinakang Duata. Kụ orasẹ̌ ini e kereapa su tiněnnang kamene?” I sire kěbị němpamutusẹ̌ u Mawu Yesus nẹ̌sal᷊a, kụ i Sie mambeng hinom pateěng.

⁶⁵Tangu sěnggạe wue nanětạe němpangědu Mawu Yesus, dingangu i sire němpanakạ matanʼE, kụ němpangoka si Sie kạpěberane, ”Kěnang panikạ, i sai nangoka si Kau?” Manga měndariagạ e mal᷊aing němpameru Mawu Yesus.

⁶⁶Těntal᷊ang i Petrus bědang su rěllahẹ̌, sěngkatau wọu ěllang bawine ěllangu imang mawantugẹ̌ e riměnta sene.

⁶⁷Sarang nakasilo si Petrus mẹ̌děndarang su putung i sie timingangke mapia-pia gahị i Petrus dingangu nẹ̌bera, ”Wal᷊inẹbe i kau lai ringangu Mawu Yesus tau Nazaret?”

⁶⁸Kaiso i Petrus kawe nẹ̌děndilẹ̌, ”Iạ e wẹ̌ga wue ringangu tawe nakahěngang měnsang apa wue timonanu,” angkuěnge su ěllang ene. Mase i Petrus simẹ̌bang sol᷊ong tukadʼu wal᷊eng imang mawantugẹ̌ ene. [Tangu manụ kimukụe.]

⁶⁹Tangu ěllang bawine ene saụewe nakasilo si Petrus, kụ nẹ̌bera kapia si sire apang sene, angkuěng, ”I anu ěndaịe mal᷊aing dingangi sire!”

⁷⁰Kai i Petrus saụewe nẹ̌děndilẹ̌ kapia. Tawe nararěnnạ, i sire apang sene němpẹ̌bera kapia si Petrus, ”Sembelaing tawe ikapẹ̌sunial᷊ẹ̌ i kau mang sěngkatau wọʼi sire u i kau e wọu Galilea!”

⁷¹Mase i Petrus nanětạ e nẹ̌salu ringangu nẹ̌bera, ”Iạ wěgangbeng taumata itẹ̌timonang kamene ene!”

⁷²Su orasẹ̌ ene lai tangu manụ kimukụ karuan sul᷊ene. Kụ i Petrus nakatahěndung u Mawu Yesus bọuwen něhengetang si sie, ”Těntal᷊ang manụ tawe kimẹ̌kukụ duan sul᷊e, i kau e seng těllun sul᷊e nẹ̌sunial᷊u Iạ.” Ene i Petrus měngkatewe simangị marehe.