Read Sangir MARKUS 15 Bible Online

MARKUS 15 - Sangir bible

MARKUS 15

¹Deng bẹ̌dang mal᷊uka-l᷊ukadẹ̌ sěnaungkewen dal᷊ohon Sanhedrin sarangkewelain manga imang těmbonange manga těmbonang u tau Yahudi ringangu manga mananěntiro agama měngkatewe lighạ němpẹ̌dal᷊ahintau. I sire němpẹ̌hapusẹ̌ Mawu Yesus, mase němpẹ̌bawa si Sie kụ němpěnarakang i Sie si Pilatus.

²I Pilatus nakiwal᷊o su Mawu Yesus, ”Kahěngang bue i Kau ratun tau Yahudi?” ”Kerẹewe niweranu,” angkuěngu Mawu Yesus.

³Manga imang těmbonange měngkate mapạsěpụ u laěnsilʼi sire lawọ-lawọ su Mawu Yesus.

⁴Mase i Pilatus nakiwal᷊o kạpia su Mawu Yesus, ”Kai ta sumasimbang i Kau? Kakěllạe tamai kal᷊awọe laěnsilʼi sire itẹ̌timona si Kau!”

⁵Arawe Mawu Yesus e mambeng tawe saụ simimbang, hakịu i Pilatus naherang.

⁶Suapan Sal᷊imbangu Paskah, lulun Pilatusẹ̌ e kai mělẹ̌lěsọu sěngkatau wọu taumatang hukumang, tuhụewe kapulun taumata lawọ e.

⁷Su ral᷊ungu tahungkụe, sutal᷊oaran tahapěnggohaeng kụ němate su tempong gohaenge, piạ sěngkatau arenge i Barabas.

⁸Taumata lawọ e nẹ̌komol᷊ẹ̌ kụ němpẹ̌dorong si Pilatus tadeạu i sie apělẹ̌sọu sěngkatau wọu tal᷊oarang taumatang hukumang kerẹewe nạung tundune.

⁹I Pilatus nakiwal᷊o si sire, ”I kamene mapulu iạ mělěsọu ratun tau Yahudi e waugʼi kamene?”

¹⁰Batụu i Pilatus nakaěnna u manga imang těmbonange něnarakangu Mawu Yesus si sie kai ual᷊ingu pananoi.

¹¹Kai manga imang těmbonange měngkai němpanahowong taumata l᷊awọ tadeạu měmpẹ̌dorong si Pilatus apělěsọ i Barabas baugʼi sire.

¹²Tangu i Pilatus nẹ̌berạewe kapia su taumata lawọ e, ”Kamageng kerene ute kawe takụ pẹ̌kapuraneng tau isẹ̌sěbạ i kamene ratun tau Yahudi e?”

¹³I sire němpamansagẹ̌, ”Kuruise i Sie!”

¹⁴”Piạbe kakanoạ dal᷊akị apa tangu i Sie?” angkuěng i Pilatus. Tangu i sire němpẹ̌bansagẹ̌ kapia limembọewen kaihạe, ”Kuruise i Sie!”

¹⁵I Pilatus mapulu mapakal᷊uasu naungu taumata l᷊awọ, tangu i sie nakilěsọen Barabas si sire, Bọu e i sie rimolohen taumata pinělimadẹ̌ Mawu Yesus, mase nisarakange pinakikuruisẹ̌.

¹⁶Mawu Yesus nịbawawaʼm manga sordado sol᷊ong bal᷊eng mělahukung su istanang guběrnurẹ̌. Bọu e kạguwạu wuntuange nikuiang pinẹ̌tampung.

¹⁷Mase i sire němpěluheng lakụ kamumụ su Mawu Yesus, bọu e nikoateng makotane wọu manga hakonda piạ hanggange, kụ nipakẹ su těmbọu Mawu Yesus.

¹⁸Bọu e i sire němpẹ̌tabeạ si Sie, ”Tabeạ Datun tau Yahudi!” angkuěng i sire.

¹⁹I sire němpěměbahu těking su těmbọu Mawu Yesus, mase i sire němpangědu si Sie dingangu němpẹ̌suba su těngonʼE.

²⁰Bọuten němpẹ̌taghunalangu Mawu Yesus, i sire němpěluạeng lakụ kamumụe mase niawengangu pakeange tutune. Su samurine i Sie niwawa sol᷊ong likude mědeạu i kuruisẹ̌.

²¹ Su tal᷊oaran dal᷊eng i sire něnihasa sěngkatau niapěmasaěng kuruisʼu Mawu Yesus. Tau ene nạung buhụ e lai sụsěbang bọu rarukutange kạsuẹ̌ e sol᷊ong soa. (Arenge i Simon, — bọu Kirene — i amang i Aleksander dẹ̌duan Rufus).

²²Mawu Yesus niěntudẹ̌ su tampạ arenge Golgota mangal᷊ene ”Wanuang Daran Těmbọ”.

²³Sene, i sire mapulu mangonggọu anggorẹ̌ laụ u mur si Sie, kai Mawu Yesus tawe nanginung anggorẹ̌ ene.

²⁴ Samurine i sire němpanguruisen Sie, kụ němpẹ̌papahiạ pakeangʼE pinẹ̌dal᷊ahurị, baugʼu pělahekang buạ u sěngkatau-sěngkatau.

²⁵Pěnganguruisẹ̌ e nariadi pukul᷊ẹ̌ sio mal᷊ukadẹ̌.

²⁶Su wowong kuruisẹ̌ e nipapělokangu wohẹ mạanun laěnsilẹ̌ si Sie, kere ini: ”Datun Tau Yahudi e”.

²⁷Nẹ̌sion Mawu Yesus e i sire nanguruisẹ̌ lai tahapěhampasẹ̌ duang katau, sěngkatau su koanengʼE, dingangu sěngkataue su sěmbẹ̌ka kaihi. [

²⁸ Tangu ual᷊ingu ene nasěhụe apa mạbawohẹ su ral᷊ungu Winohẹ Susi e: ”I Sie kai nirekeng kere nasowa su komol᷊angu taumata ral᷊aị.”]

²⁹ Sumasahe sene měngkate apa mạhungkiling[26] dingangu měmpělẹ̌hodatẹ̌ Mawu Yesus. I sire němpẹ̌bera, ”Ei, Kau ěndaị mapulu měnggoghahẹ̌ Bal᷊em Mawu kụ irarisịu kạpia su ral᷊ungu těllu ěllo.

³⁰Kěnnangko rěllusẹ̌ bọu kuruisẹ̌ e kụ pẹ̌těngkal᷊ěsọkoʼm batangengu e!”

³¹Kerene lai manga imang těmbonange ringangu manga mananěntirong agama e měmpěbẹ̌baheaun Mawu Yesus. I sire mạhumbisara sěmbaụ dingangu wal᷊ine, ”I Sie měngambang taumata wal᷊ine, arawe watangengʼE tawe makaambang!

³²Kereu i Sie ratung Israel, Datu Mananal᷊amatẹ̌, kapiaěnge i Sie pẹ̌těngkarělluse bọu kuruisẹ̌ e, tadeạu i kami makasilo kụ mangimang si Sie!” I rẹ̌dua nikuruisẹ̌ dingangu Mawu Yesus e mal᷊aing němpẹ̌baheaun Mawu Yesus.

³³Su ěllo mal᷊ěttu e, su ral᷊ungu těllung kaorasẹ̌ sěnaung kạguwạu wanua e narěndungke.

³⁴ Kụ pukul᷊ẹ̌ tatěllu wawěllo e Mawu Yesus nẹ̌kiạ e maihạ, ”Eloi, Eloi lama sabakhtani?” mangal᷊ene, ”Duata-Ku, Ruata-Ku, kawe unụe i Kau naněntangu Iạ e?”

³⁵Pirang katau sene nakaringihẹ̌ kakiạʼE kụ nẹ̌bera, ”E wědị, i Sie kụkui si Elia!”

³⁶ Sěngkatau wọu i sire měngkate masahawụ-sahawụ tamai něngal᷊ạ bungan saghẹ nịlauno su ral᷊ungu anggorẹ̌ mahaesẹ̌. Bọu ene bungang saghẹ e nisusụe su pondol᷊u kalu sěmpědi kụ niogore pinakaratingu wiwihu Mawu Yesus, kạpěberane, ”Ampal᷊eko, i kitẹ deng kumakělla měnsang i Elia e reng duměnta měnděllusʼi Sie wọu kuruisẹ̌ ene.”

³⁷Mase Mawu Yesus gimaghahẹ e maihạ-ihạ naminsul᷊u singongone kụ naněntang.

³⁸ Gorden mạbawiting su ral᷊ungu Wal᷊em Mawu e natingkasẹ̌ darua wọu rasị sarang bawa.

³⁹Těmbonangu sordado e rụdarisị su těngon kuruisẹ̌ e nakasilo kereapa kakakoạe Mawu Yesus napohong.[27] Těmbonangu sordado e nẹ̌berạe, ”Mambeng kahěngang tau ini e Ahusʼu Ruata!”

⁴⁰ Ěndaị sene piạ lai manga wawine pirang katau měmpěmẹ̌manda patikụ ene wọu maraune. Su tal᷊oaran sire piạ i Salome, i Maria Magdalena, ringang i Maria i ninang i Yakobus umbaseng dingangi Yoses.

⁴¹Seng i sire e manga wawine nạung mạhuntol᷊e ringangu němpẹ̌tul᷊ung Mawu Yesus nạung piạ i Sie su Galilea. Dingangu l᷊awọ lai manga wawine wal᷊ine apang sene kụ sěngkakarěnta su Yerusalem dingangu Mawu Yesus e.

⁴²Ene ělloe seng kakạhěbine piạ i Yusup bọu Arimatea nasongọe. I sie kai ral᷊ohon Sanhedrin kụ Lẹ̌adateng. I sie mal᷊aing mạngampal᷊ẹ̌ tempo Mawu kasěllahenge manětạ mẹ̌parenta kere sěngkatau Ratu. Ěllo ene kai ěllon Pẹ̌darariahi (kụ kai ěllo kal᷊amonan ěllon Sabatẹ̌). Ual᷊ingu ene i Yusup měngkatewe nẹ̌tumbahani nẹ̌těngon Pilatus kụ nẹ̌dorong bal᷊unangu Mawu Yesus.

⁴³

⁴⁴Ene i Pilatus naherangke nakaringihẹ̌ u Mawu Yesus kai seng napohong. Kụ i sie nakireạen těmbonangu sordado kụ nakiwal᷊ọe si sie měnsang Mawu Yesus seng marěngụ napohong.

⁴⁵Sarạeng nakaringihẹ̌ habaru těmbonangu sordado ene, i Pilatus buhụewe napakawalan Yusup měngal᷊ạ badang i Yesus.

⁴⁶Mase i Yusup naměllịe hekạ al᷊usẹ̌ bọu leneng kụ bọuten nělintụ badangu Mawu Yesus, nipikungken sie ringangu hekạ ene. Bọu e i sie naměllọen bal᷊unangu Mawu Yesus su kubul᷊ẹ̌ nipakange su watu hanibẹ̌ kụ nitaho su ral᷊unge. Bọu ene i sie nělunggin batu ghẹ̌guwạ nipěhěping tukadʼu kubul᷊ẹ̌ e.

⁴⁷Su orasẹ̌ ene i Maria Magdalena rẹ̌duang Maria i ninangi Yoses nạung kụkakělla suapa piněnampakengu Mawu Yesus e.