Read Sangir MARKUS 16 Bible Online

MARKUS 16 - Sangir bible

MARKUS 16

¹Sarạeng ěllon Sabatẹ̌ e seng nal᷊iu, i Maria Magdalena, i Maria i ninang Yakobus, dingangu i Salome rimal᷊eng němpamělli manga wěngi waugʼu ipělanisẹ̌ badangu Mawu Yesus.

²Dongkeng mal᷊uka-l᷊ukadẹ̌ su sasěbangu matangěllo, su ěllo kahumotongange su sěngkamisa ene, i sire něngkakoạ sol᷊ong kubul᷊ẹ̌.

³Kạdal᷊enge i sire mạhumbisara sěmbaụ su wal᷊ine, ”I saị e ngae makatul᷊ung i kitẹ mameho batu l᷊ahěping tukadu kubul᷊ẹ̌ e?” Batụu watu e kai masaria-saria. Ene sarạeng i sire nahumpạ sene, sěngkakakěllane watu e kai seng naweho.

⁵Tangu i sire nahunsuẹ̌ e su kubul᷊ẹ̌ e. Su ral᷊unge su sěmběka koaneng, i sire nakasilo piạ umbaseng pakeange mawira mạiang, kụ i sire mengkatewe němpẹ̌hěkosẹ̌.

⁶Umbaseng ene nẹ̌bera, ”Abe kěngkatakụ! Iạ e masingkạ i kamene mědẹ̌deạ Mawu Yesus tau Nazaret nạung seng nikuruisẹ̌ e. I Sie tawẹdise sini. I Sie kai seng nẹ̌bangung! Kakěllaịe, ěndaị tampạ e pinamělloěng i sire si Sie.

⁷ Kụ dakọe, kụ bunạko wěke ini su manga muritʼE, sarạeweng i Petrus. Pẹ̌bera, ’I Sie tamai měngal᷊imona si kamene sol᷊ong Galilea. Paị sene i kamene sarung makasilo si Sie, kerẹewe apan seng nịbaweranʼE si kamene.’ ”

⁸Tangu i sire měngkatewe nahunsẹ̌bang bọu kubul᷊ẹ̌ ene mase němpẹ̌tal᷊ang ual᷊ingu němpẹ̌hěkosẹ̌ dingangu něngkatakụ. I sire tawe nẹ̌bera apa si saiewe lai, ual᷊ingu natakụ. [

⁹Sarạeng Mawu Yesus nẹ̌bangung bọu papatene, su ěllo Misa reng mal᷊uka-l᷊ukadẹ̌, i Sie kahumotongange nẹ̌těngkasiloʼm batangengʼE si Maria Magdalena. (Bọʼi Maria ene, nạung Mawu Yesus něnokol᷊u rohkẹ̌ pitu ral᷊akị.)

¹⁰Tangu i Maria Magdalena e natamaịe něhabaru hal᷊ẹ̌ ene su manga hapịu Mawu Yesus, kụ bědang měngkạsusa ringangu mạhunsangị.

¹¹Kai sarạeng i sire nakaringihẹ̌ u Mawu Yesus kai nẹ̌biahẹ̌, dingangu i Maria seng bọu nakasilo si Sie, i sire tawe němpangimang.

¹²Bọu e Mawu Yesus nẹ̌těngkasiloʼm batangengʼE su muritʼE ruang katau su ral᷊ungu kakakoạe naněntani. Ene tangu nariadi piạ i rẹ̌dua měmpạhundal᷊eng sol᷊ong kampong sěmbaụ.

¹³Kụ i rẹ̌dua němpẹ̌sul᷊e kụ němpẹ̌habaru hal᷊ẹ̌ ene si sire wal᷊ine. Kaiso i rẹ̌dua e tawẹu němpangimang si sire.

¹⁴Pangěnsueěnge Mawu Yesus nẹ̌těngkasiloʼm batangengʼE si sire manga muritʼE mapul᷊o ěsa e, piạ i sire kạpahungkaěnge. I Sie naněngkul᷊ẹ̌ si sire puhinengu i sire kai kadodọ pangangimange ringangu tumanịu makakětị těmbo i sire hakịu i sire tawe měmpangimang su taumata kụ seng bọu nakasilo mal᷊ahẹ u Mawu Yesus e wiahẹ̌.

¹⁵ Mase Mawu Yesus něhengetangke si sire, ”Dakọe pěmpaměpidẹ̌ kạguwạu dunia e kụ pěmpẹ̌habaru Injilʼu Mawu Ruata e su patikụ taumata.

¹⁶I sai tawe mangimang sarung ihukung. Arawe i sai mangimang kụ makisahani, sarung masal᷊amatẹ̌.

¹⁷Makoạ tatiala u i sire mạngimang, i sire ene sarung měnguserẹ̌ rohkẹ̌ dalakị su ral᷊ungu areng-Ku; i sire sarung mahumbisara su ral᷊ungu haghin bera, kụ tawe kahěnganeng i sire.

¹⁸Kereu i sire makaumbelẹ těmpu arau makainung doti, ute tawẹ makapẹ̌kapura. Kamageng i sire měmpaněllidu l᷊iman sire su taumata masasakị, ute sarung měngkapia!”

¹⁹ Sarạeng Mawu Yesus bọuten něhengetang si sire, i Sie nasapuạ sol᷊ong sorga. Dasị sene i Sie sěngkapẹ̌parenta ringangu Mawu Kasěllahenge.

²⁰Tangu manga muritʼE němpahundal᷊eng kụ němpěhabaru injilʼu Mawu Ruata suapan tampạ. Kụ Mawu e mal᷊aing mẹ̌sasumbalane si sire ringangu mapạl᷊ahẹu haghin tanda makạdal᷊inaụ u pěnganginjilʼi sire mambeng kahěngang.] [ PANGĚNSUEĚNGU WOHẸU KAL᷊IMONANE SĚNGGẠ E [28] Manga wawine ene němpẹ̌tamai sol᷊ong anum Petrus dingangu manga ringange, mase němpẹ̌běkẹ e mahatedẹ̌ kěbị apan nipaul᷊ịu umbaseng ene si sire. Bọu ene, Mawu Yesus sẹ̌sane limiu manga muritʼE němpěhabarẹ̌ bọu raki sol᷊ong bahẹ, habarẹ̌ susi ringangu kakalẹ̌ mạanun kasasal᷊amatẹ̌ kakalẹ̌ e.]